કોલંબોમાં ઝિમ્બાબ્વેનો સિંહફાળો: કાંગારૂઓને 23 રને હરાવ્યા, 19 વર્ષ જૂના ઇતિહાસનું પુનરાવર્તન
ઝિમ્બાબ્વે: 169/2 (20 ઓવર), ઓસ્ટ્રેલિયા: 146 રન (20 ઓવર), જીતનું અંતર: 23 રન, મેન ઓફ ધ મેચ: બ્રાયન બેનેટ
ટી20 વર્લ્ડ કપ 2026ની ગ્રુપ-બીની 19મી મેચમાં ક્રિકેટ જગતની સૌથી મજબૂત ટીમોમાંની એક એવી ઓસ્ટ્રેલિયાને ઝિમ્બાબ્વેએ 23 રને હાર આપીને જોરદાર આંચકો આપ્યો છે. કોલંબોના આર. પ્રેમદાસા સ્ટેડિયમમાં રમાયેલી આ મેચમાં ઝિમ્બાબ્વેએ તમામ ક્ષેત્રોમાં ઓસ્ટ્રેલિયાને પછાડ્યું હતું. રસપ્રદ વાત એ છે કે, ટી20 વર્લ્ડ કપના ઇતિહાસમાં ઝિમ્બાબ્વેએ બીજી વાર ઓસ્ટ્રેલિયાને હરાવ્યું છે – આ પહેલા 2007ના પ્રથમ વર્લ્ડ કપમાં પણ ઝિમ્બાબ્વેએ ઓસ્ટ્રેલિયાને હરાવીને ચમત્કાર કર્યો હતો.
બ્રાયન બેનેટની શાનદાર બેટિંગ અને 169નો સ્કોર
ઓસ્ટ્રેલિયાએ ટોસ જીતીને ઝિમ્બાબ્વેને પ્રથમ બેટિંગ માટે આમંત્રણ આપ્યું હતું. ઝિમ્બાબ્વેએ આ તકનો ભરપૂર લાભ ઉઠાવ્યો અને ઓપનર બ્રાયન બેનેટની અણનમ 64 રનની (56 બોલ) ધૈર્યપૂર્ણ ઇનિંગ્સના જોરે 20 ઓવરમાં માત્ર 2 વિકેટ ગુમાવીને 169 રનનો પડકારજનક સ્કોર બનાવ્યો હતો. ઓસ્ટ્રેલિયા તરફથી માર્કસ સ્ટોઈનિસ અને કેમેરોન ગ્રીન માત્ર એક-એક વિકેટ ઝડપી શક્યા હતા.
ઓસ્ટ્રેલિયાની બેટિંગ લાઇન-અપ પત્તાના મહેલની જેમ વિખેરાઈ
170 રનના લક્ષ્યાંકનો પીછો કરવા ઉતરેલી ઓસ્ટ્રેલિયાની શરૂઆત અત્યંત ખરાબ રહી હતી. ટીમનો સ્કોર હજુ 29 રન પર પહોંચ્યો હતો ત્યાં સુધીમાં તો જોશ ઈંગ્લિસ, ટ્રેવિસ હેડ, કેમેરોન ગ્રીન અને ટિમ ડેવિડ જેવા મહારથીઓ પેવેલિયન ભેગા થઈ ગયા હતા. જોકે, ગ્લેન મેક્સવેલ (31) અને મેટ રેનશો (65) એ 77 રનની ભાગીદારી કરીને મેચમાં પરત ફરવાનો પ્રયાસ કર્યો હતો, પરંતુ રયાન બર્લે મેક્સવેલને આઉટ કરીને ઓસ્ટ્રેલિયાની આશા પર પાણી ફેરવી દીધું હતું.
ઝિમ્બાબ્વેની ફાઈટબેક અને ઐતિહાસિક વિજય
રેનશોએ 44 બોલમાં 65 રનની લડાયક ઇનિંગ રમી હતી, પરંતુ બીજા છેડે તેને કોઈ સાથ મળ્યો નહીં. ઓસ્ટ્રેલિયાની ટીમ નિર્ધારિત ઓવરોમાં લક્ષ્યાંકથી 23 રન દૂર રહી ગઈ હતી. આ જીત સાથે ઝિમ્બાબ્વેએ સાબિત કરી દીધું છે કે ટી20 ફોર્મેટમાં કોઈ પણ નાની ટીમ ગમે ત્યારે મોટો ઉલટફેર કરી શકે છે. આ હારથી ઓસ્ટ્રેલિયાના આગળના રસ્તા મુશ્કેલ બન્યા છે, જ્યારે ઝિમ્બાબ્વેની આ જીત વર્ષો સુધી યાદ રાખવામાં આવશે.
