રોમાંચક ફાઇનલમાં આર્જેન્ટિનાને હરાવીને 16 વર્ષ બાદ ફિફા વર્લ્ડ કપ જીત્યો, ફેરાન ટોરેસે વિજયી ગોલ કર્યો; લિયોનેલ મેસીનું ટાઇટલ ડિફેન્ડ કરવાનું સપનું તૂટ્યું
ન્યૂ જર્સી: વિશ્વના સૌથી લોકપ્રિય રમત ઉત્સવ ફિફા વર્લ્ડ કપ 2026 નું રવિવારે રાત્રે ન્યૂ જર્સીના મેટલાઇફ સ્ટેડિયમ (MetLife Stadium) ખાતે ભવ્ય સમાપન થયું છે. સ્પેનિશ ટીમે શાનદાર પ્રદર્શનની પરંપરા જાળવી રાખતા ડિફેન્ડિંગ ચેમ્પિયન આર્જેન્ટિનાને 1-0 થી હરાવીને ફૂટબોલ જગત પર પોતાનો તાજ પહેર્યો છે. નિર્ધારિત 90 મિનિટના સમય સુધી બંને ટીમો 0-0 ની બરાબરી પર રહેતા મેચ એક્સ્ટ્રા ટાઇમમાં પ્રવેશી હતી, જ્યાં સ્પેને વિજયી ગોલ દાંગીને 16 વર્ષ લાંબો સુકાળ ખતમ કર્યો હતો.
મેચની 106મી મિનિટે સબસ્ટિટ્યુટ ખેલાડી નિકો વિલિયમ્સના શાનદાર પાસ પર અન્ય સબસ્ટિટ્યુટ ખેલાડી ફેરાન ટોરેસે ગોલ કરીને સ્પેનને ઐતિહાસિક જીત અપાવી હતી. સ્પેનના ફૂટબોલ ઇતિહાસમાં આ બીજી વર્લ્ડ કપ જીત છે, આ અગાઉ ટીમ વર્ષ 2010 માં ચેમ્પિયન બની હતી. બીજી તરફ, લિયોનેલ મેસીની આગેવાની હેઠળની આર્જેન્ટિનાની ટીમ ચોથી વખત ખિતાબ જીતવામાં અને ઇટાલી તેમજ બ્રાઝિલની જેમ બેક-ટુ-બેક વર્લ્ડ કપ જીતવાનો રેકોર્ડ બનાવવામાં નિષ્ફળ રહી હતી. ફાઇનલમાં આર્જેન્ટિનાના સુકાની મેસી ધાર્યું પ્રદર્શન કરી શક્યા નહોતા.
પ્રથમ અને દ્વિતીય હાફની રણનીતિ
મેચનો પ્રથમ હાફ બંને ટીમો વચ્ચે અત્યંત રસાકસીભર્યો રહ્યો હતો. સ્પેનિશ ટીમે શરૂઆતથી જ આક્રમક રમત દાખવીને 65% બોલ પઝેશન પોતાના નિયંત્રણમાં રાખ્યું હતું અને બે વખત શૉટ ઓન ટાર્ગેટ લગાવ્યા હતા. સ્પેનિશ ડિફેન્ડર્સે લિયોનેલ મેસીને સખત માર્કિંગ હેઠળ રાખતા આર્જેન્ટિના પ્રથમ હાફમાં એક પણ શૉટ લગાવી શક્યું નહોતું. આ દરમિયાન આર્જેન્ટિનાના ડિફેન્ડર લિસાન્ડ્રો માર્ટિનેઝ ઇજાગ્રસ્ત થતાં નિકોલસ ઓટામેન્ડીને મેદાન પર ઉતારવામાં આવ્યા હતા.
બીજા હાફમાં પણ સ્પેનનું વર્ચસ્વ રહ્યું હતું અને તેમણે 68% બોલ પઝેશન જાળવી રાખ્યું હતું. સ્પેને આઠ વખત આર્જેન્ટિનાના ગોલપોસ્ટ પર સચોટ પ્રહારો કર્યા હતા, પરંતુ આર્જેન્ટિનાના ગોલકીપર એમિલિયાનો માર્ટિનેઝે તમામ આક્રમણોનો અદભુત બચાવ કર્યો હતો. બીજા હાફના ઇન્જરી ટાઇમમાં આર્જેન્ટિનાને મોટો ઝટકો લાગ્યો જ્યારે એન્ઝો ફર્નાન્ડીઝને મેચમાં બીજી વાર યલો કાર્ડ મળતાં રેડ કાર્ડ આપી મેદાનની બહાર મોકલી દેવામાં આવ્યા હતા.
ફાઇનલ સુધીની સફર અને હેડ-ટુ-હેડ રેકોર્ડ
ચેમ્પિયન બનેલી સ્પેનની ટીમે ગ્રુપ H માં સાત પોઇન્ટ સાથે ટોચનું સ્થાન મેળવ્યા બાદ રાઉન્ડ ઓફ-32 માં ઓસ્ટ્રિયાને 3-0 થી, રાઉન્ડ ઓફ-16 માં પોર્ટુગલને, ક્વાર્ટર ફાઇનલમાં બેલ્જિયમને 2-1 થી અને સેમિફાઇનલમાં મજબૂત ફ્રાન્સને 2-0 થી હરાવીને ફાઇનલમાં પ્રવેશ કર્યો હતો.
જ્યારે રનર્સ-અપ બનેલી આર્જેન્ટિનાની ટીમે ગ્રુપ સ્ટેજમાં અલ્જીરિયા, ઓસ્ટ્રિયા અને જોર્ડનને હરાવ્યા બાદ નોકઆઉટ સ્ટેજમાં ઇજિપ્ત, સ્વિટ્ઝર્લેન્ડ અને સેમિફાઇનલમાં ઇંગ્લેન્ડ સામે રોમાંચક જીત મેળવી હતી.
આ ઐતિહાસિક ફાઇનલ પૂર્વે બંને ટીમો વચ્ચે કુલ 14 આંતરરાષ્ટ્રીય મુકાબલા ખેલાયા હતા, જેમાં બંને ટીમો 6-6 મેચ જીતી હતી અને 2 મેચ ડ્રો રહી હતી. વર્લ્ડ કપના ઇતિહાસમાં 1966 પછી એટલે કે પૂરા 60 વર્ષ બાદ બંને ટીમો વચ્ચે રમાયેલી આ ટક્કરે સ્પેનને વિશ્વ વિજેતા બનાવીને ફૂટબોલના ઇતિહાસમાં નવું પ્રકરણ લખ્યું છે.
