કથિત રીતે યુએસ મિલિટરી દ્વારા સ્વબચાવમાં ફાયરિંગ કરવામાં આવ્યું, કરાચી જ નહીં, પરંતુ પાકિસ્તાનના અન્ય ભાગોમાં પણ વિરોધની જ્વાળાઓ ફેલાઈ
કરાચી/ઈસ્લામાબાદ: ઈઝરાયેલ-અમેરિકાના હુમલામાં ઈરાનના સુપ્રીમ લીડર આયતુલ્લા ખામેનેઈના મોત બાદ પાકિસ્તાનના અનેક શહેરોમાં સ્થિતિ કાબૂ બહાર ગઈ છે. કરાચી, લાહોર, ઈસ્લામાબાદ અને સ્કાદુંમાં ફાટી નીકળેલા ઉગ્ર વિરોધ પ્રદર્શનમાં અત્યાર સુધીમાં 35 લોકોના મોત થયાના અહેવાલ છે.
કરાચીમાં યુએસ કોન્સ્યુલેટ પાસે લોહીયાળ જંગ
કરાચીમાં સ્થિતિ સૌથી વધુ ગંભીર છે. અહીં શિયા સંગઠનો દ્વારા અમેરિકી કોન્સ્યુલેટ તરફ કૂચ કરવામાં આવી હતી. પ્રદર્શનકારીઓએ તોડફોડ અને આગજની શરૂ કરતા સુરક્ષા દળોએ જવાબી કાર્યવાહી કરી હતી. અહેવાલો મુજબ, કરાચીમાં થયેલી હિંસા અને ગોળીબારમાં અત્યાર સુધીમાં 16 પાકિસ્તાનીઓના મોત થયા છે. પોલીસને ભીડ પર કાબૂ મેળવવા માટે અશ્રુવાયુના ગોળા છોડવા પડ્યા હતા અને લાઠીચાર્જ કરવો પડ્યો હતો.
સ્કાદું અને ઈસ્લામાબાદમાં આગજની
માત્ર કરાચી જ નહીં, પરંતુ પાકિસ્તાનના અન્ય ભાગોમાં પણ વિરોધની જ્વાળાઓ ફેલાઈ છે:
- સ્કાદું: પ્રદર્શનકારીઓએ અમેરિકી કાર્યાલયમાં આગ લગાવી દીધી હતી, જેમાં 7 લોકોના મોત થયા છે.
- ઈસ્લામાબાદ: પાકિસ્તાનની રાજધાનીમાં વિરોધ દરમિયાન 6 લોકોએ જીવ ગુમાવ્યા છે.
- ગિલગિટ: અહીં પણ હિંસામાં 7 લોકોના મોત થયાના સમાચાર છે.
યુએસ મિલિટરી દ્વારા ફાયરિંગના અહેવાલ
ચોંકાવનારી વિગતો મુજબ, કરાચીમાં પ્રદર્શનકારીઓ જ્યારે કોન્સ્યુલેટની સુરક્ષા દીવાલો તોડવાનો પ્રયાસ કરી રહ્યા હતા, ત્યારે કથિત રીતે યુએસ મિલિટરી દ્વારા સ્વબચાવમાં ફાયરિંગ કરવામાં આવ્યું હતું. પ્રદર્શનકારીઓ સુલ્તાનાબાદથી માઈ કોલાચી રોડ થઈને દૂતાવાસ તરફ વધી રહ્યા હતા ત્યારે આ હિંસા ફાટી નીકળી હતી.
કરાચીમાં કડક સુરક્ષા અને માતમનો માહોલ
હિંસાને જોતા કરાચી પ્રશાસને સંવેદનશીલ વિસ્તારોમાં પોલીસની વધારાની ટુકડીઓ તૈનાત કરી છે. એમટી ખાન રોડ અને માઈ કોલાચી રોડને સંપૂર્ણપણે સીલ કરી દેવામાં આવ્યા છે. બીજી તરફ, કરાચીની મસ્જિદો અને ઈમામબારાઓમાં ખામેનેઈના માતમમાં શોક સભાઓ યોજાઈ રહી છે.
