સોનમ ગોદારાને 16 અઠવાડિયાના ‘કોમ્યુનિટી ડિટેન્શન’ની સજા, નકલી બેંક સ્ટેટમેન્ટ્સથી આચરી હતી છેતરપિંડી, સ્મોલ બિઝનેસ કેશફ્લો સ્કીમ’ (SBCS) અને ‘રિસર્જન્સ સપોર્ટ પેમેન્ટ્સ’ (RSP) જેવી સરકારી યોજનાઓનો દુરુપયોગ
વેલિંગ્ટન ડિસ્ટ્રિક્ટ કોર્ટ દ્વારા 13 March ના રોજ વેઇનુઇઓમાતાની (Wellington) રહેવાસી સોનમ ગોદારાને કોવિડ-19 રાહત ભંડોળમાં છેતરપિંડી કરવા બદલ સજા ફટકારવામાં આવી છે. સોનમે ‘સ્મોલ બિઝનેસ કેશફ્લો સ્કીમ’ (SBCS) અને ‘રિસર્જન્સ સપોર્ટ પેમેન્ટ્સ’ (RSP) જેવી સરકારી યોજનાઓનો દુરુપયોગ કરીને હજારો ડોલરની લોન અને સહાય મેળવી હતી, જેના માટે તે હકદાર નહોતી. અદાલતે આ કૃત્યને રાષ્ટ્રીય કટોકટીના સમયે કરવામાં આવેલો ગંભીર ‘વિશ્વાસઘાત’ ગણાવ્યો છે.
છેતરપિંડીની સંપૂર્ણ વિગત
સોનમ ગોદારા દ્વારા આચરેલી છેતરપિંડીની વિગતો નીચે મુજબ છે:
- બંધ કંપનીનો દુરુપયોગ: સોનમે તેની માતાની બંધ થઈ ગયેલી કંપની ‘Yazmed Ltd’ નો ઉપયોગ કર્યો હતો. જુલાઈ 2021 માં કંપની બંધ કરવાની સૂચના અપાઈ હોવા છતાં, ઓગસ્ટમાં લોકડાઉન જાહેર થતાં જ સોનમે પોતાને એકમાત્ર ડાયરેક્ટર તરીકે જાહેર કરી સરકારી સહાય મેળવવા અરજી કરી હતી.
- બેંક વિગતોમાં ફેરફાર: સોનમે કંપનીના બેંક ખાતાની વિગતો બદલીને પોતાનો અંગત બેંક એકાઉન્ટ નંબર આપી દીધો હતો, જેથી સરકારી પૈસા સીધા તેના અંગત ખાતામાં જમા થાય.
- નકલી દસ્તાવેજોનો ઉપયોગ: તપાસ દરમિયાન સોનમે Westpac અને ANZ બેંકના અનેક નકલી સ્ટેટમેન્ટ્સ તૈયાર કર્યા હતા. આ નકલી દસ્તાવેજો દ્વારા તેણે એવું દર્શાવવાનો પ્રયાસ કર્યો હતો કે તેની કંપની ખરેખર કાર્યરત છે અને તેમાં વેચાણ થઈ રહ્યું છે.
- કુલ રકમ: તેણે કુલ $30,603.60 મેળવવા માટે અરજી કરી હતી, જેમાંથી તેણે $21,600 મેળવી લીધા હતા. બાદમાં તેણે વ્યાજ સહિત કુલ $27,737.43 ની રકમ સરકારને પરત કરી દીધી છે.
કોર્ટનો ચુકાદો અને સજા
સોનમ ગોદારાએ કોર્ટમાં પોતાનો ગુનો સ્વીકારી લીધો હતો. સજાના સમયે તેણે વિનંતી કરી હતી કે તેના પર ગુનાની નોંધ (Conviction) કરવામાં ન આવે, પરંતુ કોર્ટે આ વિનંતી ફગાવી દીધી હતી. કોર્ટે તેને દોષિત ઠેરવીને 16 અઠવાડિયાના કોમ્યુનિટી ડિટેન્શન (Community Detention) ની સજા ફટકારી છે. આ સજા હેઠળ તેણે જેલમાં જવાનું નથી, પરંતુ તેના પર રાત્રિના સમયનો કરફ્યુ (Nighttime Curfew) લાદવામાં આવ્યો છે, જે દરમિયાન તેણે ફરજિયાતપણે પોતાના ઘરે જ રહેવું પડશે.
