ઑકલેન્ડ એરપોર્ટ પર 1.5°C અને વેન્યુઆપાઈ એરપોર્ટ પર -2.5°C તાપમાન નોંધાયું, પાવર ગ્રીડ પર વીજ વપરાશનો નવો રેકોર્ડ સર્જાયાની શક્યતા
નમસ્કાર ગુજરાત ન્યૂઝ.ઑકલેન્ડ
સમગ્ર ન્યૂઝીલેન્ડમાં શીત લહેર (Cold Snap) ની તીવ્ર અસર જોવા મળી રહી છે, જેના કારણે ઑકલેન્ડ સહિત દેશના મોટાભાગના વિસ્તારોમાં તાપમાનમાં ભારે ઘટાડો નોંધાયો છે. મેટસર્વિસ (MetService) ના અહેવાલ મુજબ, ઑકલેન્ડમાં વર્ષ 2021 પછીનો સૌથી ઠંડો દિવસ નોંધાયો છે, જ્યાં ઑકલેન્ડ એરપોર્ટ પર 1.5°C અને વેન્યુઆપાઈ એરપોર્ટ પર -2.5°C તાપમાન નોંધાયું હતું. ઉત્તર દ્વીપના તૌમરુનુઇ (Taumarunui) માં પારો ગગડીને -6.4°C સુધી પહોંચી ગયો હતો, જે 2007 પછી આ વિસ્તારનો ત્રીજો સૌથી ઓછો તાપમાનનો રેકોર્ડ છે.
દક્ષિણ દ્વીપ (South Island) ના વિસ્તારોમાં થિજવી દેતી ઠંડીનો પ્રકોપ જોવા મળ્યો છે. માઉન્ટ કૂક એરપોર્ટ પર તાપમાન -10°C, પુકાકી એરપોર્ટ પર -9°C, એલેક્ઝાન્ડ્રામાં -8°C અને ક્વીન્સટાઉનમાં -5.2°C નોંધાયું છે. ક્રાઇસ્ટચર્ચમાં -3.7°C અને ઇન્વરકાર્ગિલમાં -5.3°C તાપમાન સાથે આ વર્ષનો સૌથી ઠંડો દિવસ રહ્યો છે. ઉત્તર દ્વીપના ટૌપો (-5.8°C), પામર્સ્ટન નોર્થ (-2.8°C) અને હેમિલ્ટન (-2.4°C) માં પણ આકરી ઠંડી નોંધાઈ છે. વેલિંગ્ટનમાં વાદળછાયા વાતાવરણના કારણે તાપમાન 7.8°C રહ્યું હતું.
આ થિજવતી ઠંડીના કારણે ડ્યુનેડિનમાં વાહનવ્યવહાર ખોરવાયો હતો અને વેલિંગ્ટનમાં બરફના હળવા છાંટા પડ્યા હતા. ટ્રાન્સપાવર (Transpower) ના જણાવ્યા અનુસાર, ઠંડીના કારણે હીટિંગનો વપરાશ વધતા વીજળીની માંગમાં નવો રેકોર્ડ સર્જાયો હોવાની શક્યતા છે, જોકે વીજ પુરવઠામાં કોઈ વિક્ષેપ પડશે નહીં. મેટસર્વિસે આગામી સવારે પણ ઉત્તર અને દક્ષિણ બંને દ્વીપમાં સખત બરફવર્ષા (Frost) અને ઠંડી જળવાઈ રહેવાની આગાહી કરી છે.
