જોખમી રમકડું વેચવા બદલ ‘The Warehouse’ પર $234,000નો દંડ

દંડ “Roo Crew Take-Apart Vehicle Toys” નામના રમકડાં વેચવા બદલ કરવામાં આવ્યો, 3 વર્ષથી નાના બાળકો માટે ગૂંગળામણનું જોખમ (Choking Risk) ઊભું કરતા હતા

ઓકલેન્ડ ડિસ્ટ્રિક્ટ કોર્ટ દ્વારા ‘ધ વેરહાઉસ’ (The Warehouse) ને $234,000 (આશરે 1.18 કરોડ રૂપિયા) નો દંડ ફટકારવામાં આવ્યો છે. અગાઉના અહેવાલોમાં આ દંડ $200,000 થી વધુ હોવાનું કહેવાયું હતું, પરંતુ સત્તાવાર આંકડો $234,000 નક્કી કરવામાં આવ્યો છે. આ દંડ “Roo Crew Take-Apart Vehicle Toys” નામના રમકડાં વેચવા બદલ કરવામાં આવ્યો છે, જે 3 વર્ષથી નાના બાળકો માટે ગૂંગળામણનું જોખમ (Choking Risk) ઊભું કરતા હતા.

સુરક્ષા પરીક્ષણમાં નિષ્ફળતા

કોમર્સ કમિશનના જણાવ્યા અનુસાર, આ રમકડાંમાં અનેક નાના ભાગો હતા જે રમત દરમિયાન સરળતાથી છૂટા પડી જતા હતા. તપાસમાં જાણવા મળ્યું કે આ રમકડાં સુરક્ષાના અનેક પરીક્ષણોમાં નિષ્ફળ રહ્યા હતા. કમિશનના Simon Pope એ જણાવ્યું હતું કે, જોકે રમકડાં પર કેટલીક ચેતવણીઓ લખેલી હતી, પરંતુ તેનું માર્કેટિંગ અને પેકેજિંગ 36 મહિના (3 વર્ષ) થી ઓછી ઉંમરના બાળકો માટે કરવામાં આવ્યું હતું, જે ફેર ટ્રેડિંગ એક્ટ હેઠળ સુરક્ષાના ધોરણોનું ઉલ્લંઘન છે.

પેકેજિંગ અને માર્કેટિંગનો વિવાદ

આ કેસમાં સૌથી વિવાદાસ્પદ મુદ્દો રમકડાનું પેકેજિંગ હતું. કમિશનના જણાવ્યા મુજબ, પેકેજિંગ પર નેપી પહેરેલા નાના બાળકની તસવીર હતી જે અડધા ખુલેલા રમકડા સાથે રમી રહ્યું હતું. આ તસવીરને કારણે વાલીઓને એવું લાગી શકે કે આ રમકડું 3 વર્ષથી નાના બાળકો માટે સુરક્ષિત છે. જોકે, ધ વેરહાઉસનો દાવો છે કે આ રમકડું પહેલેથી જ સુરક્ષિત હતું અને મુખ્ય વાંધો તેના પેકેજિંગ સામે હતો, રમકડા સામે નહીં.

કંપનીનો બચાવ અને રિકોલ

ધ વેરહાઉસના પ્રવક્તાએ જણાવ્યું હતું કે, આ રમકડું વેચાયું તે દરમિયાન કોઈ પણ બાળકને ઈજા થઈ હોવાના સમાચાર નથી. કંપનીએ જ્યારે આ ખામી વિશે જાણ થઈ ત્યારે તરત જ તેને વેચાણમાંથી હટાવી લીધું હતું અને સ્વૈચ્છિક રીતે ગ્રાહકો પાસેથી રમકડાં પાછા ખેંચવાની (Recall) પ્રક્રિયા શરૂ કરી હતી. કંપનીએ એવી પણ ચિંતા વ્યક્ત કરી હતી કે સ્થાનિક કંપનીઓ પર કડક નિયમો લાદવામાં આવે છે, જ્યારે વિદેશી ઓનલાઇન રિટેલર્સ કોઈપણ સુરક્ષા તપાસ વગર ન્યૂઝીલેન્ડમાં રમકડાં વેચી રહ્યા છે.