ICC એ સ્પષ્ટ કર્યું છે કે આવી ‘પસંદગીગીરી’ (Selective Participation) વૈશ્વિક ટૂર્નામેન્ટના મૂળભૂત સિદ્ધાંતોની વિરુદ્ધ ; PCB પર પ્રતિબંધનો ખતરો
આંતરરાષ્ટ્રીય ક્રિકેટ પરિષદ (ICC) એ પાકિસ્તાન સરકારના એ નિર્ણય સામે અત્યંત કડક વલણ અપનાવ્યું છે, જેમાં પાકિસ્તાની ટીમને ટી20 વર્લ્ડ કપ 2026 માં ભારત વિરુદ્ધની મેચનો બહિષ્કાર કરવા સૂચના આપવામાં આવી છે. ICC એ સ્પષ્ટ કર્યું છે કે કોઈ પણ સભ્ય દેશે ટૂર્નામેન્ટના સફળ આયોજનની જવાબદારી નિભાવવી પડે છે અને જો પાકિસ્તાન 15 ફેબ્રુઆરી, 2026 ના રોજ કોલંબોમાં ભારત સામે રમવાનો ઇનકાર કરશે, તો તેણે તેના દૂરગામી અને ગંભીર પરિણામો માટે તૈયાર રહેવું પડશે.
ICC એ પોતાના નિવેદનમાં ભારપૂર્વક જણાવ્યું છે કે આ પ્રકારનું ‘પસંદગીગીરી’નું વલણ વૈશ્વિક રમતગમતના મૂળભૂત સિદ્ધાંતોની વિરુદ્ધ છે. ટૂર્નામેન્ટની નિષ્પક્ષતા અને રમતગમતની પવિત્રતા જાળવવા માટે તમામ ટીમોએ સમાન શરતો પર રમવું અનિવાર્ય છે. આ નિર્ણય માત્ર વર્લ્ડ કપની સાખને જ નહીં, પરંતુ દુનિયાભરના કરોડો ક્રિકેટ ચાહકો અને ખાસ કરીને પાકિસ્તાની ચાહકોના હિતોને પણ નુકસાન પહોંચાડે છે. જો પાકિસ્તાન આ મેચ નહીં રમે તો બ્રોડકાસ્ટર્સ અને સ્પોન્સર્સ તરફથી અંદાજે $38 Million (આશરે ₹320 કરોડ) ના કાનૂની દાવાઓનો સામનો કરવો પડી શકે છે.
આ ઉપરાંત, જો પાકિસ્તાન આ જીદ પર અડગ રહેશે તો ICC ભવિષ્યમાં પાકિસ્તાની ખેલાડીઓને વિદેશી લીગમાં રમવા માટે અપાતા NOC (No Objection Certificates) પર રોક લગાવી શકે છે, જેની સીધી અસર PSL જેવી લીગ પર પણ પડી શકે છે. વધુમાં, પાકિસ્તાન પર આગામી એશિયા કપ કે અન્ય આંતરરાષ્ટ્રીય શ્રેણીઓ રમવા પર પણ પ્રતિબંધ લાગી શકે છે. ICC એ પાકિસ્તાન ક્રિકેટ બોર્ડ (PCB) ને અપીલ કરી છે કે તેઓ આ ગંભીર પાસાઓ પર વિચાર કરે અને રમતગમતના હિતમાં વહેલી તકે કોઈ સર્વસંમતિ સાધે.
