રાજ્યસભાના સભ્ય તરીકે ચૂંટાયા બાદ નિયમ મુજબ વિધાન પરિષદમાંથી આપ્યું રાજીનામું; આગામી દિવસોમાં મુખ્યમંત્રી પદ છોડવા પર સસ્પેન્સ
બિહારના મુખ્યમંત્રી નીતીશ કુમારે સોમવારે વિધાન પરિષદના સભ્ય (MLC) પદેથી રાજીનામું આપી દીધું છે. સવારે 10:15 વાગ્યે આ અંગે સત્તાવાર પુષ્ટિ કરવામાં આવી હતી. નીતીશ કુમાર તાજેતરમાં જ રાજ્યસભાના સભ્ય તરીકે બિનહરીફ ચૂંટાયા છે, જેના કારણે નિયમ મુજબ તેમણે MLC પદ છોડવું અનિવાર્ય હતું.
રાજીનામાની પ્રક્રિયા અને રાજકીય હલચલ
નીતીશ કુમારના રાજીનામાને લઈને સોમવારે સવારથી જ બિહારના રાજકારણમાં ગરમાવો જોવા મળ્યો હતો. JDU નેતા સંજય ગાંધી નીતીશ કુમારનો રાજીનામાનો પત્ર લઈને વિધાન પરિષદ પહોંચ્યા હતા. વરિષ્ઠ મંત્રી વિજય કુમાર ચૌધરીએ મીડિયા સમક્ષ આ પત્ર બતાવ્યો હતો અને સ્પષ્ટ કર્યું હતું કે નીતીશ કુમારે વિધાન પરિષદની સદસ્યતા છોડી દીધી છે. રવિવાર સાંજથી જ JDU ના દિગ્ગજ નેતાઓ મુખ્યમંત્રી આવાસ પર બેઠકો કરી રહ્યા હતા.
મુખ્યમંત્રી પદ પર શું થશે?
નીતીશ કુમારે ભલે MLC પદ છોડ્યું હોય, પરંતુ તેઓ હાલમાં મુખ્યમંત્રી પદે યથાવત છે.
- 6 મહિનાનો સમય: નિયમ મુજબ, વિધાનમંડળના કોઈપણ ગૃહના સભ્ય ન હોવા છતાં નીતીશ કુમાર આગામી 6 મહિના સુધી મુખ્યમંત્રી પદ પર રહી શકે છે.
- રાજ્યસભા જશે: તેઓ હવે રાજ્યસભાની સદસ્યતા પોતાની પાસે રાખશે, જેના કારણે દિલ્હીની રાજનીતિમાં તેમની મોટી ભૂમિકા જોવા મળી શકે છે. જોકે, તેઓ બિહારના મુખ્યમંત્રીની ખુરશી ક્યારે છોડશે તે અંગે હજુ પણ રહસ્ય અકબંધ છે.
ભાવુક થયા નેતાઓ
નીતીશ કુમારની આ વિદાય પર જેડીયુના નેતા અશોક ચૌધરી ભાવુક જોવા મળ્યા હતા. તેમણે નીતીશ કુમારના પુત્ર નિશાંત ને લઈને પણ સૂચક નિવેદન આપતા તેમને ‘CM મટિરિયલ’ ગણાવ્યા હતા, જેનાથી બિહારમાં વારસાના રાજકારણની ચર્ચાઓએ જોર પકડ્યું છે.
