નોર્થલેન્ડ (Northland), ઓકલેન્ડ (Auckland), કોરોમંડલ (Coromandel) અને બે ઓફ પ્લેન્ટી (Bay of Plenty) માં ભારે પાયે અસર થવાની સંભાવના
સાયક્લોન વાયાનુ (Cyclone Vaianu) હાલમાં ફિજીની આસપાસ છે અને ઝડપથી ન્યૂઝીલેન્ડ તરફ આગળ વધી રહ્યું છે.
મેટસર્વિસ (MetService) ના હવામાનશાસ્ત્રી જોન લો ના જણાવ્યા અનુસાર, સાયક્લોન વાયાનુ અત્યારે ‘કેટેગરી-3’ ના અત્યંત શક્તિશાળી ચક્રવાતમાં પરિવર્તિત થઈ ગયું છે. હાલમાં તે ફિજીની પશ્ચિમે સ્થિત છે અને તેના કેન્દ્રમાં પવનની ગતિ 150 કિમી પ્રતિ કલાક થી પણ વધુ છે. આ સિસ્ટમ દક્ષિણ-પૂર્વ તરફ આગળ વધી રહી છે અને રવિવાર સુધીમાં ન્યૂઝીલેન્ડના ભાગોમાં ભારે પવન, અતિભારે વરસાદ અને સમુદ્રમાં ઊંચા મોજા લાવશે તેવી આગાહી છે.
ચક્રવાત અને વર્તમાન વરસાદ વચ્ચેનો તફાવત હવામાનશાસ્ત્રી હીથર કીટ્સે સ્પષ્ટતા કરી છે કે અત્યારે (બુધવાર અને ગુરુવારે) નોર્થ આઈલેન્ડમાં જે વરસાદ પડી રહ્યો છે, તે ચક્રવાતને કારણે નથી. હાલનો વરસાદ એક અલગ ‘સબટ્રોપિકલ લો’ (ઓછા દબાણની સ્થિતિ) ને કારણે છે. સાયક્લોન વાયાનુ તો શનિવાર રાતથી ન્યૂઝીલેન્ડના “દરવાજા ખટખટાવવાનું” શરૂ કરશે. તેથી લોકોએ સમજવું જરૂરી છે કે અસલી વાવાઝોડું વીકેન્ડમાં આવવાનું બાકી છે.
ભારે વરસાદની ચેતવણી (Orange Warning) ચક્રવાત આવે તે પહેલા જ, મધ્ય ન્યૂઝીલેન્ડના અનેક વિસ્તારોમાં ભારે વરસાદની ચેતવણી આપવામાં આવી છે. બે ઓફ પ્લેન્ટી (Whakatāne ની પશ્ચિમે) અને રોટોરુઆ માટે ‘ઓરેન્જ હેવી રેઈન વોર્નિંગ’ જાહેર કરવામાં આવી છે. આ વિસ્તારોમાં ગુરુવાર સુધી ગાજવીજ સાથે વરસાદ અને સ્થાનિક પૂરની શક્યતા છે. જે વિસ્તારોમાં છેલ્લા બે અઠવાડિયામાં ભારે વરસાદ પડ્યો છે, ત્યાં સ્થિતિ વધુ ગંભીર બની શકે છે.
અસરગ્રસ્ત વિસ્તારો અને પવનની ગતિ ચક્રવાતની સૌથી વધુ અસર નોર્થલેન્ડ (Northland), ઓકલેન્ડ (Auckland), કોરોમંડલ (Coromandel) અને બે ઓફ પ્લેન્ટી (Bay of Plenty) માં જોવા મળશે. હવામાનશાસ્ત્રીઓના જણાવ્યા મુજબ, દરિયાકાંઠાના વિસ્તારોમાં પવનની ગતિ 120 થી 150 કિમી પ્રતિ કલાક સુધી પહોંચી શકે છે. આટલા વેગીલા પવનને કારણે વીજળીના થાંભલા પડી જવાની, ઝાડ ઉખડી જવાની અને મકાનોના છાપરા ઉડવાની શક્યતા રહેલી છે.
