જીલોંગ રિફાઇનરીમાં ‘અભૂતપૂર્વ’ આગથી આકાશ ભભૂકી ઉઠ્યું, સ્થાનિક સમય મુજબ રાત્રે 11:05 વાગ્યે અનેક વિસ્ફોટોના અવાજ સાથે લાગી આગ
ઓસ્ટ્રેલિયામાં કાર્યરત માત્ર બે ઓઇલ રિફાઇનરીઓ પૈકીની એક એવી જીલોંગ (Geelong) સ્થિત ‘વાઇવા એનર્જી રિફાઇનરી’ (Viva Energy Refinery) માં ગત રાત્રે ભીષણ આગ ફાટી નીકળી હતી. સ્થાનિક સમય મુજબ રાત્રે 11:05 વાગ્યે અનેક વિસ્ફોટોના અવાજ સાથે લાગેલી આ આગને કારણે સમગ્ર વિસ્તારમાં અફરાતફરી મચી ગઈ હતી. ફાયર સર્વિસના જણાવ્યા અનુસાર, આગ પ્લાન્ટના ‘મોગાસ’ (Mogas) સેક્શનમાં લાગી હતી જ્યાં મોટર ગેસોલિનનું ઉત્પાદન કરવામાં આવે છે.
આગના કારણે આસપાસના રહેણાંક વિસ્તારોમાં ભયનો માહોલ ફેલાયો હતો. કન્ટ્રી ફાયર ઓથોરિટી (CFA) એ કોરિયો (Corio) અને તેના દક્ષિણ વિસ્તારોના રહેવાસીઓને તાત્કાલિક ઘરમાં આશ્રય લેવાની અને ઝેરી ધુમાડાથી બચવા માટે બારી-બારણાં બંધ રાખવાની ચેતવણી આપી હતી. એક સ્થાનિક રહેવાસીએ જણાવ્યું કે આકાશ એટલું તેજસ્વી થઈ ગયું હતું અને વિસ્ફોટોનો ગડગડાટ એટલો તીવ્ર હતો કે તે દૂરથી પણ સ્પષ્ટ દેખાતો અને સંભળાતો હતો. સદભાગ્યે, આજે સવારે જોખમ ઓછું થતા ચેતવણીમાં ઘટાડો કરવામાં આવ્યો છે.
રિફાઇનરીમાં કાર્યરત તમામ 100 કર્મચારીઓ સુરક્ષિત રીતે બહાર નીકળવામાં સફળ રહ્યા છે. ઓસ્ટ્રેલિયન વર્કર્સ યુનિયનના જણાવ્યા મુજબ, જ્યારે આગ લાગી ત્યારે સ્થિતિ કોઈ ‘યુદ્ધ ક્ષેત્ર’ જેવી લાગતી હતી, પરંતુ કર્મચારીઓની કુશળતાને કારણે કોઈ જાનહાનિ થઈ નથી. આગ આશરે 30 મીટર બાય 30 મીટરના વિસ્તારમાં ફેલાયેલી હતી. પ્રાથમિક તપાસ મુજબ, આ ઘટના પાછળ કોઈ શંકાસ્પદ કારણ જણાતું નથી અને તે પાઇપવર્ક અથવા વાલ્વમાં ખામીને કારણે હોઈ શકે છે.
આ ઘટનાની અસર ઓસ્ટ્રેલિયાના ઇંધણ પુરવઠા પર પડી શકે છે. જીલોંગ રિફાઇનરી વિક્ટોરિયા રાજ્યનું 50 ટકા અને સમગ્ર ઓસ્ટ્રેલિયાનું 10 ટકા ઇંધણ પૂરું પાડે છે. ઓસ્ટ્રેલિયાના ઉર્જા મંત્રી ક્રિસ બોવેને સ્વીકાર્યું છે કે આ ઘટના હકારાત્મક નથી અને તેની ઇંધણ પુરવઠા પર અસર થઈ શકે છે. ખાસ કરીને જ્યારે ઈરાન યુદ્ધને કારણે વૈશ્વિક ઉર્જા કટોકટી ચાલી રહી છે, ત્યારે આ એકમાત્ર કાર્યરત ફેસિલિટીમાં આગ લાગવી એ ચિંતાનો વિષય છે.
વાઇવા એનર્જી રિફાઇનરીની ક્ષમતા અને સુરક્ષા સામે સવાલ. આ રિફાઇનરી દરરોજ 1,20,000 બેરલ તેલ પર પ્રક્રિયા કરવાની ક્ષમતા ધરાવે છે અને પેટ્રોલ, ડીઝલ, એલપીજી અને જેટ ફ્યુઅલ જેવું મહત્વનું ઇંધણ બનાવે છે. જીલોંગના મેયર સ્ટ્રેચ કોન્ટ્રેલ્જે જણાવ્યું કે આગની તીવ્રતા એટલી વધારે હતી કે ફાયર ફાઇટરો માટે તેને ઓલવવી મુશ્કેલ હતી અને તેને કુદરતી રીતે બળીને શાંત થવા દેવી પડી હતી. હાલમાં પ્લાન્ટના જે ભાગો સુરક્ષિત છે ત્યાં કામગીરી ચાલુ રાખવામાં આવી છે.
