યુવા બેરોજગારીમાં વધારો અને વેતન વૃદ્ધિ 5 વર્ષની નીચલી સપાટીએ, આર્થિક અનિશ્ચિતતા યથાવત, આ ક્વાર્ટરમાં 4000 નવી નોકરીઓ ઉમેરાઈ છે
Stats NZ દ્વારા જારી કરવામાં આવેલા તાજેતરના આંકડા મુજબ, માર્ચમાં પૂરા થયેલા ત્રણ મહિનામાં ન્યુઝીલેન્ડનો બેરોજગારીનો દર નજીવો ઘટીને 5.3% થયો છે. જોકે આ ઘટાડો પ્રોત્સાહક લાગે છે, પરંતુ તેની પાછળનું એક કારણ એ પણ છે કે અનેક લોકોએ નોકરીની શોધ કરવાનું બંધ કરી દીધું છે. અર્થતંત્રમાં હાલમાં 1,63,000 લોકો બેરોજગાર છે, જે ગયા વર્ષની સરખામણીએ 7000 વધુ છે. મધ્ય પૂર્વના સંઘર્ષની અસર આગામી સમયમાં શ્રમ બજાર પર જોવા મળી શકે છે તેવી આશંકા અર્થશાસ્ત્રીઓ વ્યક્ત કરી રહ્યા છે.
પ્રાદેશિક તફાવત અને અર્થશાસ્ત્રીઓનો મત
ન્યુઝીલેન્ડના અલગ-અલગ પ્રદેશોમાં બેરોજગારીની સ્થિતિ ભિન્ન જોવા મળી છે. ઓકલેન્ડ (Auckland), વેલિંગ્ટન (Wellington) અને બે ઓફ પ્લેન્ટી (Bay of Plenty) માં બેરોજગારીનો દર સૌથી વધુ 6% થી 7% ની વચ્ચે રહ્યો છે, જ્યારે સાઉથ આઈલેન્ડના મોટાભાગના વિસ્તારોમાં આ દર 5% થી નીચે છે. ‘અન્ડરયુટિલાઈઝેશન’ દર 12.9% પર સ્થિર રહ્યો છે, જે દર્શાવે છે કે બજારમાં હજુ પણ કામની શોધમાં હોય તેવા લોકોની સંખ્યા મોટી છે.
ASB ના મુખ્ય અર્થશાસ્ત્રી નિક ટફલીએ આ આંકડાઓને અપેક્ષા કરતા થોડા સારા ગણાવ્યા છે. તેમણે જણાવ્યું હતું કે વેતન વૃદ્ધિ મધ્યમ છે, જે રિઝર્વ બેંક માટે મોંઘવારીના દૃષ્ટિકોણથી રાહતજનક છે. જોકે, તેમણે ચેતવણી આપી છે કે ઈંધણના વધતા ભાવ અને વ્યવસાયિક સાવચેતીને કારણે વર્ષના મધ્ય ભાગમાં બેરોજગારીનો દર ફરી વધીને 5.5% સુધી પહોંચી શકે છે. મધ્ય પૂર્વના સંઘર્ષને કારણે કંપનીઓ નવી ભરતી પ્રક્રિયામાં થોડો સમય વિરામ લે તેવી શક્યતા છે.
