અમેરિકા સ્થિત ભારતીય મૂળના ટેક ઉદ્યોગપતિ Kal Somaniના નેતૃત્વ હેઠળના કન્સોર્ટિયમે RRને ખરીદી, સોદો IPL 2026ની સીઝન પૂર્ણ થયા બાદ સત્તાવાર રીતે અમલમાં આવશે
Rajasthan Royals Sold : રાજસ્થાન રોયલ્સ હવે આઈપીએલ (IPL) ઈતિહાસની સૌથી મોંઘી ફ્રેન્ચાઈઝી બની ગઈ છે. અમેરિકા સ્થિત ભારતીય મૂળના ટેક ઉદ્યોગપતિ કાલ સોમાની (Kal Somani) ના નેતૃત્વ હેઠળના કન્સોર્ટિયમે આ ટીમને 1.63 બિલિયન ડોલર (આશરે 15,290 કરોડ રૂપિયા) માં ખરીદી લીધી છે. આ સોદો બ્રિટિશ-ભારતીય ઉદ્યોગપતિ મનોજ બદાલેની માલિકીની ‘ઈમર્જિંગ મીડિયા’ સાથે થયો છે, જે અત્યાર સુધી ટીમમાં 65% હિસ્સેદારી ધરાવતા હતા.
કોણ છે કાલ સોમાની અને તેમનું કન્સોર્ટિયમ?
કાલ સોમાની એરિઝોના સ્થિત જાણીતા ટેક ઉદ્યોગપતિ છે અને તેઓ 2021 થી આ ટીમમાં લઘુમતી હિસ્સેદાર (Minority Investor) તરીકે જોડાયેલા હતા. આ મોટા સોદામાં તેમની પાછળ વિશ્વના દિગ્ગજ રોકાણકારોનું પીઠબળ છે:
- રોબ વોલ્ટન: વિશ્વની સૌથી મોટી રિટેલ કંપની ‘વોલમાર્ટ’ (Walmart) પરિવારના વારસદાર અને ડેનવર બ્રોન્કોસ ટીમના માલિક.
- હેમ્પ ફેમિલી: અમેરિકાની જાણીતી ‘ફોર્ડ મોટર કંપની’ (Ford) સાથે જોડાયેલું પરિવાર અને એનએફએલ (NFL) ટીમ ડેટ્રોઈટ લાયન્સના માલિક.
- આ કન્સોર્ટિયમે આદિત્ય બિરલા ગ્રુપ અને ટાઇમ્સ ઇન્ટરનેટ જેવા મોટા બિડર્સને પાછળ છોડીને આ ડીલ હાંસલ કરી છે.
ક્યારે અમલમાં આવશે આ ફેરફાર?
આ માલિકી હકનો ફેરફાર IPL 2026 ની સીઝન પૂર્ણ થયા બાદ સત્તાવાર રીતે અમલમાં આવશે. બીસીસીઆઈ (BCCI) ના નિયમો મુજબ આ ટ્રાન્ઝેક્શન પર 5% ફી પણ ચૂકવવામાં આવશે. નવા માલિકોનો હેતુ રાજસ્થાન રોયલ્સને માત્ર એક ક્રિકેટ ટીમ નહીં, પરંતુ આર્ટિફિશિયલ ઇન્ટેલિજન્સ (AI) અને ડેટા એનાલિટિક્સના ઉપયોગ દ્વારા વૈશ્વિક સ્પોર્ટ્સ બ્રાન્ડ બનાવવાનો છે.
મેદાન પરની તૈયારીઓ: રિયાન પરાગ નવા કેપ્ટન
એક તરફ જ્યારે મેનેજમેન્ટમાં ફેરફાર થઈ રહ્યો છે, ત્યારે મેદાન પર પણ ટીમે નવા ફેરફારો કર્યા છે. આઈપીએલ 2026 માટે સંજુ સેમસન ચેન્નાઈ સુપર કિંગ્સમાં ટ્રેડ થઈ ગયા બાદ, યુવા ખેલાડી રિયાન પરાગ ને ટીમના નવા કેપ્ટન તરીકે નિયુક્ત કરવામાં આવ્યા છે. કુમાર સંગાકારા ટીમના હેડ કોચ તરીકે કાર્યરત રહેશે. રાજસ્થાન રોયલ્સ તેની પ્રથમ મેચ 30 માર્ચના રોજ ગુવાહાટીમાં ચેન્નાઈ સામે રમીને પોતાના અભિયાનની શરૂઆત કરશે.
