ભારત સામેનો બહિષ્કાર PCBને તબાહ કરી શકે, PSLમાંથી વિદેશી ખેલાડીઓ ફેંકાઈ જશે? કરોડોની ફંડિંગ રોકવા અને પાકિસ્તાનની જગ્યાએ યુગાન્ડાને રમવા દેવા સુધીની તૈયારી
ભારત વિરુદ્ધ 15 ફેબ્રુઆરીના રોજ યોજાનારી મેચના બહિષ્કારના ડ્રામાએ પાકિસ્તાન ક્રિકેટ બોર્ડ (PCB) ને અસ્તિત્વના સંકટમાં મૂકી દીધું છે. પાકિસ્તાન સરકારના આદેશ બાદ જો PCB સત્તાવાર રીતે મેચ રમવાનો ઇનકાર કરશે, તો ICC આગામી 48 કલાકમાં વર્ચ્યુઅલ મીટિંગ કરીને પાકિસ્તાન પર કડક પ્રતિબંધો લાદી શકે છે. સૂત્રોના જણાવ્યા અનુસાર, ICC પાકિસ્તાનને આખા વર્લ્ડ કપમાંથી બહાર કરીને તેની જગ્યાએ યુગાન્ડાને ટૂર્નામેન્ટમાં સામેલ કરવાના વિકલ્પ પર પણ વિચાર કરી રહ્યું છે.
આ સંઘર્ષ પાકિસ્તાન માટે આર્થિક રીતે પણ આત્મઘાતી સાબિત થઈ શકે છે. ભારત-પાક મેચ રદ થવાથી બ્રોડકાસ્ટર્સને જાહેરાતની આવકમાં અંદાજે ₹200 કરોડથી વધુનું નુકસાન થઈ શકે છે, જેની ભરપાઈ PCBએ કરવી પડી શકે છે. આટલું જ નહીં, ICC પાકિસ્તાનને મળતું વાર્ષિક ₹316.50 કરોડનું ફંડિંગ રોકી શકે છે અને વિદેશી ખેલાડીઓને પાકિસ્તાન સુપર લીગ (PSL) માં રમતા અટકાવી શકે છે. જો આવું થાય, તો PSL માત્ર નિવૃત્ત ખેલાડીઓની લીગ બનીને રહી જશે અને તેની બ્રાન્ડ વેલ્યુ સંપૂર્ણપણે ખતમ થઈ જશે.
વ્યૂહાત્મક રીતે પણ પાકિસ્તાન વિશ્વ ક્રિકેટમાં એકલું પડી જાય તેવી શક્યતા છે. ICCના સૂત્રોના મતે, પાકિસ્તાન સાથે દ્વિપક્ષીય શ્રેણીઓ રમવા પર અન્ય દેશો પણ પ્રતિબંધ લગાવી શકે છે અને વર્લ્ડ ટેસ્ટ ચેમ્પિયનશિપ (WTC) માં પણ પાકિસ્તાનના પોઈન્ટ્સ કાપી નાખવામાં આવી શકે છે. પાકિસ્તાન અગાઉ પણ આવા ‘યુ-ટર્ન’ લેવા માટે જાણીતું છે, ત્યારે નિષ્ણાતોનું માનવું છે કે ક્રિકેટના સૌથી મોટા બજાર એટલે કે ભારત (BCCI) સાથે ટકરાવ પાકિસ્તાન ક્રિકેટને સંપૂર્ણપણે પાયમાલ કરી દેશે. હવે જોવાનું એ રહેશે કે પાકિસ્તાન પોતાની જીદ પર અડગ રહે છે કે અંતિમ સમયે નમતું જોખે છે.
