અમેરિકા રશિયાને આર્થિક રીતે નબળું પાડવા પ્રયાસ કરી રહ્યું છે, પરંતુ યુરોપિયન યુનિયનના દેશો આ પ્રસ્તાવથી ચિંતિત, G7 દેશોના નાણાં મંત્રીઓની 12 સપ્ટેમ્બરે બેઠક
નવી દિલ્હી: રશિયા પર આર્થિક દબાણ વધારવા માટે અમેરિકાએ તેના સહયોગી દેશો સામે એક નવો દાવ ખેલ્યો છે. ફાઇનાન્સિયલ ટાઇમ્સના અહેવાલ મુજબ, અમેરિકાના રાષ્ટ્રપતિ ડોનાલ્ડ ટ્રમ્પ ઇચ્છે છે કે G7 દેશો ભારત અને ચીન દ્વારા ખરીદવામાં આવતા રશિયન તેલ પર 50 થી 100 ટકા સુધીનો ભારે ટેરિફ (જકાત) લગાવે.
આ પ્રસ્તાવ પર ચર્ચા કરવા માટે G7 દેશોના નાણાં મંત્રીઓ શુક્રવારે વીડિયો કોલ દ્વારા બેઠક કરશે. આ પહેલાં પણ ટ્રમ્પે યુરોપિયન યુનિયન (EU) ને અપીલ કરી હતી કે તેઓ ભારત અને ચીન પર 100 ટકા સુધીનો ટેરિફ લગાવે.
અમેરિકન ટ્રેઝરીના પ્રવક્તાએ આ અંગે જણાવ્યું કે, “ચીન અને ભારત દ્વારા ખરીદવામાં આવતું રશિયન તેલ, પુતિનની યુદ્ધ મશીનરીને ચલાવી રહ્યું છે અને યુક્રેનિયન લોકોની હત્યાઓને લંબાવી રહ્યું છે. યુદ્ધ સમાપ્ત થતાં જ આ ટેરિફ હટાવી દેવામાં આવશે.” અમેરિકા આને તેની “પીસ એન્ડ પ્રોસ્પેરિટી એડમિનિસ્ટ્રેશન” (શાંતિ અને સમૃદ્ધિ પ્રશાસન) નો એક મહત્વનો ભાગ ગણાવી રહ્યું છે, જેના હેઠળ રશિયાને શાંતિ વાટાઘાટો માટે ટેબલ પર લાવવાનો પ્રયાસ કરવામાં આવી રહ્યો છે.
યુરોપિયન યુનિયનની ચિંતાઓ
જોકે, આ પ્રસ્તાવ પર યુરોપિયન યુનિયન (EU) સહમત થતું નથી. બ્રસેલ્સનું માનવું છે કે ભારત અને ચીન જેવા મોટા વ્યાપારી ભાગીદારો પર આટલો મોટો ટેરિફ લગાવવાથી આર્થિક જોખમ અને પ્રતિશોધની શક્યતા વધી શકે છે. EU તેના બદલે 2027 સુધીમાં રશિયન ઊર્જા પરની પોતાની નિર્ભરતા સમાપ્ત કરવા અને નવા કડક પ્રતિબંધો લગાવવાના પક્ષમાં છે.
હાલ G7 ની અધ્યક્ષતા કરી રહેલા કેનેડાએ પણ બેઠકની પુષ્ટિ કરી છે અને કહ્યું કે તે રશિયાની યુદ્ધ કરવાની ક્ષમતા પર વધુ દબાણ વધારવા માટે “આગળના પગલાં” પર વિચાર કરશે.
