ગીલ-જાડેજા અને સુંદરે ઇંગ્લેન્ડને ઘૂંટણીયે પાડ્યું, ચોથી ટેસ્ટ ડ્રોમાં સમાપ્ત

કે.એલ. રાહુલ-ગિલની વિક્રમી ભાગીદારી; જાડેજાએ ઇંગ્લેન્ડમાં નવા રેકોર્ડ સર્જ્યા, શ્રેણીમાં ઇંગ્લેન્ડ 2-1થી આગળ, હવે અંતિમ ટેસ્ટ મેચ 31 ઓગસ્ટે રમાશે

India Vs. England, Old Trafford test, Manchester Test, Ravindra Jadeja, Washington Sundar, KL Rahul, 4th Test Draw,

લંડન, ઇંગ્લેન્ડ: ઇંગ્લેન્ડ સામે રમાયેલી ચોથી ટેસ્ટ મેચમાં ભારતીય ટીમે શુભમન ગિલ, રવીન્દ્ર જાડેજા અને વોશિંગ્ટન સુંદરની સદીઓની મદદથી મેચને ડ્રો કરવામાં સફળતા મેળવી છે. આ મુકાબલામાં ટોસ હારીને પ્રથમ બેટિંગ કરતા ભારતે યશસ્વી જયસ્વાલ, સાઈ સુદર્શન અને રિષભ પંતની અર્ધસદીઓથી 358 રન બનાવ્યા હતા. જવાબમાં ઇંગ્લેન્ડે બીજી ઇનિંગ્સમાં 10 વિકેટે 669 રન બનાવી 311 રનની વિશાળ લીડ મેળવી હતી. જોકે, ભારતે બીજી ઇનિંગ્સમાં ચાર વિકેટે 425 રન બનાવી મેચ ડ્રોમાં સમાપ્ત કરી હતી. પાંચ મેચની આ શ્રેણીમાં ઇંગ્લેન્ડ હજુ પણ 2-1થી આગળ છે, અને અંતિમ મુકાબલો 31 ઓગસ્ટથી ધ ઓવલ ખાતે રમાશે.

રાહુલ-ગિલની ઐતિહાસિક ભાગીદારી:

પાંચમા દિવસે ભારતની બીજી ઇનિંગ્સ બે વિકેટે 174 રનના સ્કોરથી શરૂ થઈ હતી, ત્યારે ટીમ ઇન્ડિયા ઇંગ્લેન્ડથી 137 રન પાછળ હતી. દિવસની શરૂઆતમાં જ બેન સ્ટોક્સે કે.એલ. રાહુલને 90 રન (230 બોલ) પર આઉટ કર્યા. રાહુલે શુભમન ગિલ સાથે ત્રીજી વિકેટ માટે 421 બોલમાં 188 રનની મહત્વપૂર્ણ ભાગીદારી નોંધાવી હતી. આ સાથે કે.એલ. રાહુલ અને શુભમન ગિલની જોડીએ ઇંગ્લેન્ડમાં કોઈપણ ભારતીય જોડી દ્વારા એક ટેસ્ટમાં સૌથી વધુ બોલ રમવાનો (421 બોલ) નવો રેકોર્ડ બનાવ્યો. અગાઉનો રેકોર્ડ 2002માં સંજય બાંગર અને રાહુલ દ્રવિડ (405 બોલ) ના નામે હતો.

ગિલ, સુંદર અને જાડેજાની સદીઓ:

કેપ્ટન શુભમન ગિલે 238 બોલમાં 103 રન બનાવી શ્રેણીમાં ચોથી અને ટેસ્ટ કારકિર્દીની નવમી સદી પૂરી કરી. આ સાથે, એક શ્રેણીમાં કેપ્ટન તરીકે સર્વાધિક સદી ફટકારવાના મામલે ગિલે ડોન બ્રેડમેનની (1947માં ભારત સામે ચાર સદી) બરાબરી કરી. ગિલ આર્ચરનો શિકાર બન્યા બાદ વોશિંગ્ટન સુંદર અને રવીન્દ્ર જાડેજાએ બાજી સંભાળી. બંનેએ ચોથી વિકેટ માટે 334 બોલમાં 203 રનની અતૂટ ભાગીદારી નોંધાવી, જેનાથી ભારત પરની હારનું સંકટ ટળ્યું અને મેચ ડ્રો થઈ. જાડેજાએ 182 બોલમાં પોતાની પાંચમી ટેસ્ટ સદી (107* રન) પૂરી કરી, જ્યારે વોશિંગ્ટન સુંદરે 206 બોલમાં પોતાની પ્રથમ ટેસ્ટ સદી (101* રન) ફટકારી.

જાડેજાના નવા રેકોર્ડ્સ:

રવીન્દ્ર જાડેજાએ ઇંગ્લેન્ડમાં ટેસ્ટમાં નંબર 6 કે તેથી નીચે બેટિંગ કરતા 1000 રન પૂરા કર્યા, જે આ યાદીમાં ગેરી સોબર્સ (1097 રન) પછી બીજા સ્થાને છે. આ ઉપરાંત, 2025ની ઇંગ્લેન્ડ શ્રેણીમાં જાડેજાએ નંબર 6 કે તેથી નીચે બેટિંગ કરતા પાંચ 50+ સ્કોર બનાવ્યા છે, જેણે તેમને વીવીએસ લક્ષ્મણની (2002 વેસ્ટ ઇન્ડિઝ પ્રવાસ) બરાબરી પર લાવી દીધા છે. જાડેજા પાસે આ રેકોર્ડ તોડવાની સુવર્ણ તક છે.