ઇન્ડોનેશિયા ભારતની ‘અસ્ત્ર’ મિસાઈલ પણ ખરીદશે; વડાપ્રધાન નરેન્દ્ર મોદીને ઇન્ડોનેશિયાનું સર્વોચ્ચ નાગરિક સન્માન એનાયત

ભારત અને ઇન્ડોનેશિયાએ મંગળવારે બ્રહ્મોસ સુપરસોનિક ક્રૂઝ મિસાઈલની સપ્લાય માટે એક અત્યંત મહત્વપૂર્ણ કરાર પર હસ્તાક્ષર કર્યા છે. આ ઐતિહાસિક સમજૂતીથી બંને દેશો વચ્ચેના સંરક્ષણ અને વ્યૂહાત્મક સહયોગને એક નવી તાકાત મળશે, સાથે જ ભારતના સ્થાનિક સંરક્ષણ ઉત્પાદન ઉદ્યોગને પણ મોટો વેગ મળશે. આ કરાર વડાપ્રધાન નરેન્દ્ર મોદીની ઇન્ડોનેશિયા મુલાકાત દરમિયાન થયો છે, જે તેમના 3 દેશોના પ્રવાસનો પ્રથમ તબક્કો છે.

ભારતની ‘અસ્ત્ર’ મિસાઈલ પણ ખરીદશે ઇન્ડોનેશિયા

બ્રહ્મોસ ઉપરાંત, ઇન્ડોનેશિયાએ ભારતમાં જ વિકસિત કરવામાં આવેલી ‘અસ્ત્ર’ (Astra) એર-ટુ-એર (હવામાંથી હવામાં પ્રહાર કરતી) મિસાઈલ ખરીદવા માટે પણ સહમતિ દર્શાવી છે. ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) દ્વારા વિકસાવવામાં આવેલી ‘અસ્ત્ર’ એક ‘બિયોન્ડ-વિઝ્યુઅલ-રેન્જ’ મિસાઈલ છે, જે દુશ્મનના અત્યંત ઝડપી અને દિશા બદલતા વિમાનોને ટ્રેક કરીને હવામાં જ નષ્ટ કરવા માટે સક્ષમ છે. આ સાથે જ, ભારત ઇન્ડોનેશિયાને બ્રહ્મોસ મિસાઈલની વધારાની બેટરીઓ પણ પૂરી પાડે તેવી શક્યતા છે.

સંરક્ષણ, આરોગ્ય અને ખનિજ ક્ષેત્રે સહયોગ વધશે

વડાપ્રધાન નરેન્દ્ર મોદીએ જણાવ્યું હતું કે ભારત અને ઇન્ડોનેશિયા વચ્ચે વધી રહેલો પરસ્પર વિશ્વાસ સંરક્ષણ, સુરક્ષા અને દરિયાઈ સહયોગને વધુ મજબૂત બનાવી રહ્યો છે. બંને દેશો વચ્ચે સંરક્ષણ આદાનપ્રદાન, આપત્તિ વ્યવસ્થાપન અને ઔદ્યોગિક સહયોગને પ્રોત્સાહન આપવા માટે પણ કરારો થયા છે.

મુલાકાત દરમિયાન અન્ય મહત્વના ક્ષેત્રોમાં પણ સહમતિ સાધવામાં આવી છે:

  • આરોગ્ય ક્ષેત્ર: નવા કરારોને કારણે ઇન્ડોનેશિયાના નાગરિકોને ભારતની ઉચ્ચ ગુણવત્તાયુક્ત અને સસ્તી દવાઓ સરળતાથી મળી રહેશે. ભારત ત્યાંના ડોક્ટરો અને આરોગ્ય કર્મચારીઓની ક્ષમતા નિર્માણમાં પણ મદદ કરશે.
  • ખનિજ સપ્લાય: બંને દેશોએ સ્ટીલ સપ્લાય ચેઈન માટે જરૂરી એવા મહત્વપૂર્ણ ખનિજો અને ટેક્નોલોજીના ક્ષેત્રમાં કરાર કર્યા છે, જેનાથી કિંમતી ખનિજોની પુરવઠા સાંકળ વધુ મજબૂત બનશે.
  • ચૂંટણી ટેક્નોલોજી (EVM): ભારત ઇન્ડોનેશિયા માટે ખાસ ઇલેક્ટ્રોનિક વોટિંગ મશીન (EVM) વિકસાવવામાં પણ સહયોગ કરશે અને ચૂંટણી ટેક્નોલોજીના ક્ષેત્રમાં પોતાનો અનુભવ વહેંચશે.

PM મોદીને ઇન્ડોનેશિયાનું સર્વોચ્ચ સન્માન મળ્યું

ઇન્ડોનેશિયાના રાષ્ટ્રપતિ પ્રબોવો સુબિયાન્ટોએ વડાપ્રધાન નરેન્દ્ર મોદીને તેમના દેશના સર્વોચ્ચ નાગરિક અને સૈન્ય સન્માન ‘બિંતાંગ આદિપૂર્ણા ઓફ ધ રિપબ્લિક ઓફ ઇન્ડોનેશિયા’ (Bintang Adipurna of the Republic of Indonesia) થી નવાજ્યા છે.

વર્ષ 1959 માં શરૂ કરાયેલું આ સન્માન અસાધારણ અને સર્વોચ્ચ સેવાઓ માટે આપવામાં આવે છે. વડાપ્રધાન મોદીને વિદેશોમાં મળેલા સર્વોચ્ચ આંતરરાષ્ટ્રીય સન્માનોની યાદીમાં આ વધુ એક મોટી અને મહત્વપૂર્ણ સિદ્ધિ છે.