IPL 2026: RRનો વિજય, CSKની 8 વિકેટે હાર, સૂર્યવંશીનું વાવાઝોડું

વૈભવ સૂર્યવંશીની 15 બોલમાં તોફાની ફિફ્ટી; ચેન્નાઈના બેટ્સમેનો સંપૂર્ણપણે ફ્લોપ રહ્યા, CSK 127, RR 128/2, નાન્દ્રે બર્ગર, જાડેજા અને આર્ચરના ફાળે બે-બે વિકેટ

ગુવાહાટી (બારસાપારા સ્ટેડિયમ): સોમવારે રમાયેલી IPL 2026 ની ત્રીજી મેચમાં રાજસ્થાન રોયલ્સે ચેન્નાઈ સુપર કિંગ્સને 8 વિકેટે હરાવીને સિઝનની શાનદાર શરૂઆત કરી છે. રાજસ્થાને ટોસ જીતીને પ્રથમ બોલિંગ કરવાનો નિર્ણય કર્યો હતો, જે સાચો સાબિત થયો હતો. ચેન્નાઈની ટીમ માત્ર 127 રન જ બનાવી શકી હતી, જેને રાજસ્થાને 13મી ઓવરમાં જ હાંસલ કરી લીધો હતો.

વૈભવ સૂર્યવંશીનો પાવર-શો

રાજસ્થાન તરફથી ઓપનિંગ કરવા ઉતરેલા વૈભવ સૂર્યવંશીએ માત્ર 15 બોલમાં ફિફ્ટી ફટકારીને સનસનાટી મચાવી દીધી હતી. તેણે કુલ 17 બોલમાં 52 રન બનાવ્યા, જેમાં 4 ચોગ્ગા અને 5 છગ્ગાનો સમાવેશ થાય છે. જ્યારે વૈભવ આઉટ થયો ત્યારે રાજસ્થાનનો સ્કોર માત્ર 5.2 ઓવરમાં 75 રન હતો. ત્યારબાદ યશસ્વી જયસ્વાલ અને કેપ્ટન રિયાન પરાગે બાજી સંભાળીને ટીમને 13.1 ઓવરમાં જીત અપાવી હતી.

ચેન્નાઈની બેટિંગમાં ધબડકો

ચેન્નાઈની શરૂઆત ખૂબ જ ખરાબ રહી હતી. ચેન્નાઈ માટે ડેબ્યૂ કરી રહેલા સંજુ સેમસન માત્ર 6 રન બનાવીને આઉટ થયો હતો. ત્યારબાદ કેપ્ટન ઋતુરાજ ગાયકવાડ (6 રન) અને આયુષ મ્હાત્રે (0 રન) પણ જલ્દી પેવેલિયન ભેગા થયા હતા. નાન્દ્રે બર્ગર અને રવીન્દ્ર જાડેજાની ધારદાર બોલિંગ સામે ચેન્નાઈના બેટ્સમેનો ટકી શક્યા નહોતા. એક સમયે CSK નો સ્કોર 51 રનમાં 5 વિકેટ હતો. અંતમાં જીમી ઓવરટને 43 રનની ઇનિંગ રમીને ટીમને 127 રન સુધી પહોંચાડી હતી.