‘વ્હાઈટ ફર્ન્સ’ તરફથી ડેબ્યૂ કરનારી પ્રથમ ભારતીય મૂળની ક્રિકેટર બની, દેશનું પ્રતિનિધિત્વ કરવું અને સિલ્વર ફર્ન પહેરવું મારા માટે ગર્વની વાત- નેન્સી પટેલે મેચ બાદ આપ્યું નિવેદન
હેમિલ્ટન: ન્યુઝીલેન્ડમાં વસતા ભારતીય સમુદાય માટે ગૌરવની ક્ષણ ત્યારે આવી જ્યારે ૨૩ વર્ષીય નેન્સી પટેલે ઝિમ્બાબ્વે સામેની વ્હાઈટ-બોલ સીરીઝમાં ન્યુઝીલેન્ડનું પ્રતિનિધિત્વ કરીને ઈતિહાસ રચ્યો. હેમિલ્ટનના સેડન પાર્ક ખાતે રમાયેલી મેચમાં નેન્સીએ ન્યુઝીલેન્ડની જર્સી અને ‘સિલ્વર ફર્ન’ (ન્યુઝીલેન્ડનું રાષ્ટ્રીય પ્રતીક) ધારણ કરી મેદાનમાં પગ મૂક્યો હતો.
ઘરઆંગણે શાનદાર ડેબ્યૂ
નેન્સી પટેલ એક ઓફ-સ્પિન ઓલરાઉન્ડર છે. નોર્ધન બ્રેવ (Northern Brave) માટે ડોમેસ્ટિક ક્રિકેટમાં શાનદાર દેખાવ કર્યા બાદ તેને રાષ્ટ્રીય ટીમમાં સ્થાન મળ્યું છે. પોતાના પ્રથમ અનુભવ વિશે વાત કરતા નેન્સીએ જણાવ્યું કે, “દેશનું પ્રતિનિધિત્વ કરવું અને સિલ્વર ફર્ન પહેરવું મારા માટે ગર્વની વાત છે. મારા હોમ ગ્રાઉન્ડ સેડન પાર્ક પર રમવું અદ્ભુત હતું. પ્રથમ ઓવરમાં થોડો ફફડાટ હતો, પણ બીજી ઓવરથી હું સ્થિર થઈ ગઈ હતી.”
માતા-પિતાની હાજરીએ ક્ષણને ખાસ બનાવી
નેન્સીની આ ઐતિહાસિક સફરના સાક્ષી બનવા માટે તેના માતા-પિતા સ્ટેડિયમમાં હાજર રહ્યા હતા. નેન્સીએ ભાવુક થતા કહ્યું, “મારા માતા-પિતાએ મને આ આખી સફરમાં ઘણો સાથ આપ્યો છે. તેમને પ્રેક્ષકોમાં જોવા એ મારા માટે ખૂબ જ ખાસ ક્ષણ હતી. તેમને અને ભારતમાં રહેલા મારા પરિવારને ગૌરવ અપાવવું એ મારા માટે મોટી વાત છે.”
ઐતિહાસિક સિદ્ધિથી હતી અજાણ
નેન્સી પટેલે એક રસપ્રદ ખુલાસો કરતા જણાવ્યું કે, શરૂઆતમાં તેને ખબર નહોતી કે તે ન્યુઝીલેન્ડ તરફથી આંતરરાષ્ટ્રીય સ્તરે રમનારી પ્રથમ ભારતીય મૂળની ખેલાડી છે. મુખ્ય કોચ બેન સોયર અને કેપ્ટન અમેલી કેરની આગેવાનીમાં નેન્સી હવે ટીમમાં ફ્રન્ટલાઈન સ્પિનર તરીકે મહત્વની ભૂમિકા ભજવી રહી છે.
વૈવિધ્યતાનું નવું પ્રતીક
નેન્સી પટેલનું ડેબ્યૂ માત્ર તેની વ્યક્તિગત સિદ્ધિ નથી, પરંતુ તે ન્યુઝીલેન્ડના રમત જગતમાં બદલાતા ચહેરા અને વિવિધ સમુદાયો માટે ખુલતા નવા દ્વારનું પ્રતીક છે. ન્યુઝીલેન્ડની ટીમ અત્યારે પરિવર્તનના તબક્કામાંથી પસાર થઈ રહી છે, ત્યારે નેન્સી જેવી યુવા ટેલેન્ટ ટીમમાં નવો ઉત્સાહ અને વિવિધતા લાવી રહી છે.
