સાલ્મોનેલાના ભયને કારણે NZમાં ઉત્પાદનો રિકોલ, ભારતથી આયાત થયેલા લીલું લસણ, મઠ, મગ અને ઊંધિયું મિક્સ રિકોલ; ગ્રાહકોને સાવચેતી રાખવા સૂચન
વેલિંગ્ટન, ન્યુઝીલેન્ડ: ન્યુઝીલેન્ડ ફૂડ સેફ્ટી (MPI) દ્વારા ‘દીપ બ્રાન્ડ‘ના કેટલાક ફ્રોઝન શાકભાજી ઉત્પાદનોને સાલ્મોનેલા બેક્ટેરિયાના સંભવિત જોખમને કારણે તાત્કાલિક પાછા ખેંચવાનો આદેશ આપવામાં આવ્યો છે.
વિમ્સ એન્ટરપ્રાઇઝ લિમિટેડ દ્વારા આયાત કરાયેલા આ ઉત્પાદનોમાં ‘દીપ બ્રાન્ડ‘ના લીલું લસણ, સ્પ્રાઉટેડ મઠ, સ્પ્રાઉટેડ મગ અને સુરતી ઊંધિયું મિક્સનો સમાવેશ થાય છે. સ્પ્રાઉટેડ મઠ, મગ અને ઊંધિયું મિક્સના તમામ બેચ અને તારીખો રિકોલમાં શામેલ છે, જ્યારે લીલા લસણના નવેમ્બર 2026ની ‘યુઝ બાય’ તારીખવાળા ઉત્પાદનોને પાછા ખેંચવામાં આવ્યા છે.
આ ઉત્પાદનો ભારતથી આયાત કરવામાં આવ્યા હતા અને દેશભરની ભારતીય સુપરમાર્કેટ્સમાં તેમજ વિમ્સ એન્ટરપ્રાઇઝ લિમિટેડના ઓનલાઈન સ્ટોર પર વેચવામાં આવ્યા હતા.
MPI દ્વારા જણાવાયું છે કે, જે ગ્રાહકો પાસે આ ઉત્પાદનો હોય તેમણે તેનું સેવન ન કરવું જોઈએ, સિવાય કે તેને સંપૂર્ણપણે (ગરમ થાય ત્યાં સુધી) રાંધવામાં આવે. અત્યાર સુધી, આ ઉત્પાદનોના સેવનથી કોઈ બીમારીનો અહેવાલ મળ્યો નથી. તેમ છતાં, જો કોઈને આ ઉત્પાદનોનું સેવન કર્યા બાદ સ્વાસ્થ્યને લઈને કોઈ ચિંતા હોય, તો તાત્કાલિક તબીબી સલાહ લેવી જોઈએ.
ગ્રાહકો આ ઉત્પાદનોને ખરીદ્યા હોય તે સ્ટોર પર પાછા આપીને સંપૂર્ણ રિફંડ મેળવી શકે છે. સાલ્મોનેલાના ચેપથી ઝાડા, તાવ, પેટમાં ખેંચાણ, માથાનો દુખાવો, ઉબકા અને ઉલટી જેવા લક્ષણો થઈ શકે છે. આ બીમારી સામાન્ય રીતે ચારથી સાત દિવસ સુધી ચાલે છે, પરંતુ ગંભીર કિસ્સાઓમાં તે 10 દિવસ સુધી ચાલી શકે છે.
