પેટના કેન્સરથી પીડાઇ રહ્યા હતા જજ કેપ્રિઓ, લાખો લોકોએ સોશિયલ મીડિયા પર શોક વ્યક્ત કર્યો, આરોપીઓને અવનવી સજા સંભળાવતા જજ કેપ્રિઓના વીડિયો સોશિયલ મીડિયામાં ખુબ વાઇરલ થતા હતા
પોતાના દયાળુ સ્વભાવ માટે “દુનિયાના સૌથી સારા જજ” તરીકે ઓળખાતા રોડ આઇલેન્ડના જજ ફ્રેન્ક કેપ્રિઓનું પેટના કેન્સર (pancreatic cancer) ના કારણે નિધન થયું છે. તેમના લોકપ્રિય સોશિયલ મીડિયા એકાઉન્ટ્સ પર એક પોસ્ટ દ્વારા આ દુઃખદ સમાચારની જાણકારી આપવામાં આવી હતી.
નિધનના એક દિવસ પહેલા, બુધવારે, કેપ્રિઓએ હોસ્પિટલના બેડ પરથી પોતાના ફોલોઅર્સને પ્રાર્થના કરવા વિનંતી કરી હતી. તેમણે કહ્યું હતું કે, “કમનસીબે, મને ફરીથી તકલીફ થઈ છે, હું ફરીથી હોસ્પિટલમાં દાખલ છું અને હું ફરી એકવાર તમને મારી પ્રાર્થનામાં યાદ કરવા વિનંતી કરું છું.” તેમણે અગાઉ આ જ બીમારી સામેની લડાઈનો ઉલ્લેખ કર્યો હતો.
રોડ આઇલેન્ડના ગવર્નર ડેન મેકીએ કેપ્રિઓને “ખજાનો” ગણાવ્યો હતો અને તેમના સન્માનમાં રાજ્યના ધ્વજને અડધી કાઠીએ ફરકાવવાનો આદેશ આપ્યો હતો. ગવર્નરે કહ્યું કે કેપ્રિઓએ ન્યાય અને માનવતાનું અનોખું મિશ્રણ દર્શાવ્યું હતું.
જજ ફ્રેન્ક કેપ્રિઓ, તેમના એમી-નોમિનેટેડ શો “કોર્ટ ઇન પ્રોવિડન્સ” અને સોશિયલ મીડિયા પર તેમની મોટી ઉપસ્થિતિને કારણે ખૂબ જ લોકપ્રિય બન્યા હતા. તેમના દયાળુ અને હસમુખા સ્વભાવને કારણે તેમના વીડિયોઝ વાયરલ થયા હતા.
તેમના મૃત્યુની જાહેરાત કરતી પોસ્ટમાં લખવામાં આવ્યું હતું કે, “તેમને માત્ર એક આદરણીય ન્યાયાધીશ તરીકે જ નહીં, પરંતુ એક સમર્પિત પતિ, પિતા, દાદા અને મિત્ર તરીકે પણ યાદ કરવામાં આવશે. તેમની દયાના અસંખ્ય કાર્યોમાં તેમનો વારસો જીવંત રહેશે.” પોસ્ટમાં અપીલ કરવામાં આવી હતી કે, “તેમના સન્માનમાં, આપણે સૌએ દુનિયામાં થોડી વધુ કરુણા લાવવાનો પ્રયાસ કરવો જોઈએ, જેમ તેમણે દરરોજ કર્યો હતો.”
