24 ઓગસ્ટ 2026થી લાગુ થશે નવા નિયમો; વેતન મર્યાદાની પ્રક્રિયા સરળ કરાઈ, વિદેશી લાયકાત માટે 120-ક્રેડિટની શરત હટાવાઈપરંતુ સેલ્ફ-એમ્પ્લોયમેન્ટના અનુભવ પર પ્રતિબંધ

વેલિંગ્ટન: ઇમિગ્રેશન ન્યુઝીલેન્ડ (INZ) દ્વારા સ્કીલ્ડ માઇગ્રન્ટ કેટેગરી (SMC) રેસિડન્ટ વિઝા અને વર્ક ટુ રેસિડન્સ (WTR) વિઝા પ્રક્રિયામાં કરવામાં આવેલા આખરી ફેરફારોની સત્તાવાર જાહેરાત કરી દેવામાં આવી છે. આ નવા નિયમો 24 ઓગસ્ટ 2026 થી સમગ્ર ન્યુઝીલેન્ડમાં સત્તાવાર રીતે અમલી બનશે.

સરકારે સપ્ટેમ્બર ૨૦૨૫ માં દેશના અર્થતંત્રને મજબૂત કરવા અને એમ્પ્લોયરોને કુશળ કામદારો આકર્ષવામાં મદદ કરવા માટે આ ફેરફારોની રૂપરેખા તૈયાર કરી હતી, જેને હવે આખરી ઓપ આપી દેવામાં આવ્યો છે.

વેતન મર્યાદા (Wage Threshold) ના નિયમો કરાયા સરળ

નવા ફેરફારો બાદ અરજદારોને વેતનના દરમાં મોટી રાહત આપવામાં આવી છે:

  • એક જ વેતન મર્યાદા: ૨૪ ઓગસ્ટ ૨૦૨૬ થી, મોટાભાગના SMC અરજદારોએ વિઝા પ્રક્રિયા દરમિયાન બે અલગ-અલગ વેતન દરના બદલે માત્ર 1 જ વેતન મર્યાદા પૂર્ણ કરવાની રહેશે.
  • પ્રોટેક્શન ગ્રેસ પીરિયડ: જો કોઈ સ્થળાંતરિત વ્યક્તિ કામ શરૂ કરે તે પહેલાં ન્યુઝીલેન્ડમાં વેતન મર્યાદા વધી જાય, તો તેમને ૫ મહિનાનો ગ્રેસ પીરિયડ મળશે. વિઝા મંજૂર થયાના ૫ મહિનાની અંદર કામ શરૂ કરનારને વિઝા મળ્યા તે દિવસનો જ વેતન દર લાગુ પડશે.
  • WTR પાથવેમાં સમાનતા: આ જ વેતન નિયમો ગ્રીન લિસ્ટ (Tier 2), કેર વર્કફોર્સ અને ટ્રાન્સપોર્ટ સેક્ટરના પાથવે પર પણ લાગુ કરવામાં આવ્યા છે.

શૈક્ષણિક લાયકાત અને ક્રેડિટ સિસ્ટમમાં ફેરફાર

ઇમિગ્રેશન વિભાગે ક્વોલિફિકેશનના નિયમો વધુ સ્પષ્ટ કર્યા છે:

  • વિદેશી ડિગ્રીઓને મોટી રાહત: વિદેશમાંથી ટ્રેડ અને ટેકનિશિયન લાયકાત મેળવનારા અરજદારો માટેની ૧૨૦-ક્રેડિટની અનિવાર્ય શરતને સંપૂર્ણપણે હટાવી દેવામાં આવી છે.
  • ન્યુઝીલેન્ડની ડિગ્રીઓ માટે નિયમ: ન્યુઝીલેન્ડની સ્થાનિક ટ્રેડ અને ટેકનિશિયન લાયકાતમાં ઓછામાં ઓછી ૧૨૦-ક્રેડિટ હોવી જરૂરી છે, જે એક કરતાં વધુ સંકળાયેલી ડિગ્રીઓ ભેગી કરીને પણ સાબિત કરી શકાશે.
  • બેચલર્સ ડિગ્રીના પોઈન્ટ્સ વધ્યા: SMC પોઈન્ટ સિસ્ટમ હેઠળ હવે બેચલર્સ ડિગ્રી તેમજ વોશિંગ્ટન અને સિડની એકોર્ડ માન્ય લાયકાતો માટેના પોઈન્ટ્સ ૩ થી વધારીને ૪ કરવામાં આવ્યા છે.
  • સહાયક દસ્તાવેજો: લેવલ ૮ અથવા લેવલ ૯ ની લાયકાત પર પોઈન્ટ્સ મેળવવા માટે હવે સપોર્ટિંગ બેચલર્સ ડિગ્રી અને તેની શૈક્ષણિક ટ્રાન્સક્રિપ્ટ આપવી ફરજિયાત રહેશે, સિવાય કે તે ન્યુઝીલેન્ડની જ માસ્ટર્સ ડિગ્રી હોય.

સેલ્ફ-એમ્પ્લોયમેન્ટ (સ્વ-રોજગાર) પર પ્રતિબંધ

નવા પાથવે હેઠળ વિઝા પ્રક્રિયાની પારદર્શિતા અને અખંડિતતા (Integrity) જાળવી રાખવા માટે ઇમિગ્રેશન વિભાગે કડક વલણ અપનાવ્યું છે. ટ્રેડ્સ-ટેકનિશિયન અને સ્કીલ્ડ વર્ક એક્સપિરિયન્સ પાથવે હેઠળ અરજી કરનારા લોકો પોતાના સીધા સંબંધિત કામના અનુભવ તરીકે ‘સ્વ-રોજગાર’ (Self-employment) ના પુરાવાઓનો ઉપયોગ કરી શકશે નહીં. ટેક્સ રેકોર્ડ ઉપલબ્ધ હોવા છતાં, આવા કામના કૌશલ્યની સ્વતંત્ર ચકાસણી કરવી મુશ્કેલ હોવાથી આ નિર્ણય લેવાયો છે.

જેન્યુઈન એમ્પ્લોયમેન્ટ (સાચી રોજગારી) ની ચકાસણી

ન્યુઝીલેન્ડમાં નકલી નોકરીઓ બતાવીને વિઝા મેળવનારાઓ પર લગામ કસવા માટે ‘Genuine Employment’ ની વ્યાખ્યા વધુ મજબૂત કરાઈ છે. હવે તમામ સ્કીલ્ડ રેસિડન્સ વિઝા માટે નોકરીની ઓફર ‘ઉપલબ્ધ અને ચાલુ’ (Available and ongoing) હોવી જોઈએ અને તે નોકરી વાસ્તવિક રીતે ‘ન્યુઝીલેન્ડ આધારિત’ હોવી અનિવાર્ય છે.

આ નવો નિયમ એક્રેડિટેડ એમ્પ્લોયર વર્ક વિઝા (AEWV) ની વ્યાખ્યા સાથે સુસંગત છે. જોકે, ઇમિગ્રેશન વિભાગના જણાવ્યા અનુસાર આ ફેરફારથી સાચા અરજદારોને કોઈ નુકસાન નહીં થાય, પરંતુ ખોટી કે શંકાસ્પદ અરજીઓને નકારી કાઢવા માટે અધિકારીઓને સ્પષ્ટ કાયદાકીય આધાર મળશે.

For More details Visit INZ Website > Click Here. https://www.immigration.govt.nz/about-us/news-centre/final-details-about-changes-to-the-skilled-migrant-category-resident-visa-and-work-to-residence-visa/