ભારતે સાઉથ આફ્રિકાને ફાઇનલમાં 52 રને આપી હાર, શેફાલી અને દીપ્તિનું પાવર પેક પ્રદર્શન, દીપ્તિની ઓલરાઉન્ડ રમત: બેટિંગમાં બંનેની ફિફ્ટી, ભારત 298/7, સાઉથ આફ્રિકા
મુંબઈ: ભારતીય મહિલા ક્રિકેટ ટીમે ક્રિકેટ જગતમાં એક સુવર્ણ પ્રકરણ ઉમેર્યું છે. હરમનપ્રીત કૌરની આગેવાની હેઠળની ભારતીય ટીમે ICC વિમેન્સ ODI વર્લ્ડ કપ 2025 ની ફાઇનલમાં દક્ષિણ આફ્રિકાને હરાવીને પ્રથમ વખત આ પ્રતિષ્ઠિત ખિતાબ પોતાના નામે કર્યો છે.
વર્લ્ડ કપની 52 વર્ષની સફરનો અંત: ત્રીજા ફાઇનલ પ્રયાસમાં વિજય
વિમેન્સ ક્રિકેટ વર્લ્ડ કપના 52 વર્ષના ઇતિહાસમાં ભારતીય મહિલા ટીમે આ પહેલા બે વાર ફાઇનલમાં પ્રવેશ કર્યો હતો, પરંતુ ટ્રોફી જીતવામાં સફળતા મળી ન હતી. આ વખતે, ત્રીજા અને નિર્ણાયક પ્રયાસમાં, ‘હરમન બ્રિગેડ’ એ તમામ અડચણો પાર કરીને આઇકોનિક ટ્રોફી પર પોતાનું નામ અંકિત કરી દીધું છે. આ જીત ભારતીય મહિલા ક્રિકેટ માટે એક યુગ પરિવર્તન સમાન છે.
દક્ષિણ આફ્રિકાનો સારો પ્રારંભ, પણ નિયમિત વિકેટોએ સંકટ સર્જ્યું
299 રનના લક્ષ્યાંકનો પીછો કરવા ઉતરેલી દક્ષિણ આફ્રિકાની ઓપનિંગ જોડી લૉરા વૉલ્વર્ટ (કેપ્ટન) અને તાજમિન બ્રિટ્સએ સકારાત્મક શરૂઆત કરી. 9મી ઓવરમાં ટીમનો સ્કોર 50ને પાર પહોંચી ગયો હતો.
18 ઓવરમાં સ્કોર 100ને પાર પહોંચ્યા બાદ, શેફાલી વર્માએ બોલિંગમાં કમાલ દેખાડ્યો અને 21મી ઓવરમાં લુસ (25 રન) અને 23મી ઓવરમાં મારિજાન કેપ (4 રન) ને આઉટ કરીને ભારતને મજબૂત સ્થિતિમાં લાવી દીધું.
ભારતીય ઇનિંગ્સ: શેફાલી અને દીપ્તિનું પાવર પેક પ્રદર્શન
10મી ઓવરમાં અમનજોત કૌર દ્વારા બ્રિટ્સ (23 રન) ને રન આઉટ કરીને ભારતને પ્રથમ સફળતા મળી. 12મી ઓવરમાં શ્રી ચરણીએ બોશને શૂન્ય રને આઉટ કરીને દક્ષિણ આફ્રિકાને બીજો ઝટકો આપ્યો.
પ્રથમ બેટિંગ કરવા ઉતરેલી ભારતીય ટીમની શરૂઆત ખૂબ જ શાનદાર રહી હતી. ઓપનર શેફાલી વર્મા અને સ્મૃતિ મંધાનાની જોડીએ દક્ષિણ આફ્રિકાના બોલરો પર પ્રભુત્વ જમાવ્યું હતું. માત્ર 7મી ઓવરમાં જ ભારતે 50 રનનો આંકડો પાર કરી લીધો હતો, અને 17.2 ઓવરમાં 100 રન પૂરા થયા હતા.
- ભારતને પહેલો ઝટકો સ્મૃતિ મંધાના (45 રન) સ્વરૂપે લાગ્યો.
- ત્યારબાદ જેમિમા અને શેફાલીએ મોરચો સંભાળી 25મી ઓવરમાં સ્કોરને 150ને પાર પહોંચાડ્યો.
- શાનદાર ફોર્મમાં રહેલી શેફાલી વર્મા 87 રનની આક્રમક ઇનિંગ રમીને 28મી ઓવરમાં આઉટ થઈ.
- જેમિમાએ 24 રન બનાવ્યા, જ્યારે કેપ્ટન હરમનપ્રીત કૌર 20 રન બનાવીને 40મી ઓવરમાં આઉટ થઈ.
જોકે, અંતિમ ઓવરોમાં દીપ્તિ શર્મા (અણનમ 58 રન) અને ઋચા ઘોષ (34 રન) વચ્ચેની મજબૂત ભાગીદારીએ સ્કોરને સન્માનજનક સ્તરે પહોંચાડ્યો. ભારતે નિર્ધારિત ઓવરોમાં દક્ષિણ આફ્રિકા સામે 299 રનનો લક્ષ્યાંક મૂક્યો.
મેચનો ટર્નિંગ પોઇન્ટ: દીપ્તિ શર્માએ બે ઓવરમાં ત્રણ વિકેટ ઝડપી
મધ્ય ઓવરોમાં દીપ્તિ શર્મા અને અન્ય બોલરોએ દક્ષિણ આફ્રિકાના બેટ્સમેનો પર દબાણ જાળવી રાખ્યું હતું. 30મી ઓવરમાં દીપ્તિએ જાફ્ટા (16 રન) ને આઉટ કરી, જ્યારે 40મી ઓવરમાં એનેરી ડર્કસન (35 રન) ને આઉટ કરીને ભારતને મોટી સફળતા અપાવી.
મેચનો સૌથી મોટો અને નિર્ણાયક વળાંક 42મી ઓવરમાં આવ્યો, જ્યારે દીપ્તિ શર્માએ સૌથી ખતરનાક લાગતી કેપ્ટન લૉરા વૉલ્વર્ટની વિકેટ ઝડપી. લૉરા વૉલ્વર્ટે શાનદાર સદી (100 રન) ફટકારી હતી અને તે ટીમની આશા હતી, પરંતુ તેમના આઉટ થતાં જ દક્ષિણ આફ્રિકાની જીતની આશા ધૂંધળી થઈ ગઈ. તે જ ઓવરમાં દીપ્તિએ ટ્રાયોનની વિકેટ પણ ઝડપીને જીત ભારતની ઝોળીમાં નાખી દીધી.
દીપ્તિની ઓલરાઉન્ડ રમત: બેટિંગમાં ફિફ્ટી, બોલિંગમાં નિર્ણાયક વિકેટો
ભારતીય ટીમની આ જીતમાં દીપ્તિ શર્માનું પ્રદર્શન ઓલરાઉન્ડર તરીકે સર્વશ્રેષ્ઠ રહ્યું. બેટિંગમાં તેમણે અણનમ 58 રનનું મહત્ત્વનું યોગદાન આપી ટીમને મોટા સ્કોર સુધી પહોંચાડી, અને બોલિંગમાં નિર્ણાયક સમયે 3 વિકેટ ઝડપીને વિપક્ષી ટીમને ઘૂંટણિયે પડવા મજબૂર કરી.
