ગર્ભવતી કર્મચારીને રજા લેવા બદલ દંડ કર્યો અને એક મજૂરને વેનમાં સુવા મજબૂર કર્યો; કોર્ટે 50,000 ડોલર ચૂકવવાનો આદેશ આપ્યો
મહિલા બિઝનેસમેન દ્વારા કામદારોનું ભયાનક શોષણ: 11 મહિનાની હોમ ડિટેન્શનની સજા
ન્યુઝીલેન્ડના હેમિલ્ટન અને ઓકલેન્ડમાં અનેક વ્યવસાયો ધરાવતી સ્નેહા પટેલ (જે સેજલ પટેલ તરીકે પણ ઓળખાય છે) ને કામદારોના ગંભીર શોષણ બદલ 11 મહિનાની હોમ ડિટેન્શનની સજા ફટકારવામાં આવી છે. 36 વર્ષીય સ્નેહાએ તેના ત્રણ કર્મચારીઓના અંદાજે $50,000 (આશરે 42 લાખ રૂપિયા) પગાર અને રજાના હક પોકેટમાં નાખી દીધા હતા અને તેનો ઉપયોગ પોતાનું બિઝનેસ સામ્રાજ્ય વધારવા માટે કર્યો હતો.
શોષણની પરાકાષ્ઠા અને અમાનવીય વર્તન
તપાસમાં સ્નેહા પટેલના અત્યંત ક્રૂર કૃત્યો સામે આવ્યા છે:
- ગર્ભવતી મહિલા સાથે ગેરવર્તન: તેના બ્યુટી પાર્લરમાં કામ કરતી એક ગર્ભવતી મહિલાએ જ્યારે પોતાનું બાળક ગુમાવ્યું અને ડોક્ટરે તેને બે અઠવાડિયા આરામ કરવાની સલાહ આપી, ત્યારે સ્નેહાએ તેને મદદ કરવાને બદલે તેની પાસેથી $3212 પરત માંગ્યા હતા.
- અમાનવીય રહેઠાણ: એક કર્મચારીને પગાર આપવાનું બંધ કરી દેવામાં આવ્યું હતું અને તેને સ્નેહાની વેન (ગાડી) ના પાછળના ભાગમાં ગાદલું નાખીને સુવા માટે મજબૂર કરવામાં આવ્યો હતો. બાદમાં તે ડેરીના ફ્લોર પર સુતો હતો.
- વીઝાના નામે છેતરપિંડી: કામદારોને એવું કહીને પગાર નહોતો અપાતો કે તેણી એક ‘સારી બહેન’ બનીને તેમના વીઝા સુરક્ષિત કરવા માટે પગારની બચત કરી રહી છે.
કોર્ટની કાર્યવાહી અને સજા
MBIE (Ministry of Business, Innovation and Employment) દ્વારા સ્નેહા પર નવ આરોપો મૂકવામાં આવ્યા હતા. પ્રોસિક્યુટરે જણાવ્યું કે સ્નેહાનું આ કૃત્ય જાણીજોઈને અને વ્યાવસાયિક લાભ ખાતર કરવામાં આવ્યું હતું. જોકે, સ્નેહાએ પોતાની બચાવમાં માનસિક સ્વાસ્થ્ય અને હાલની ગંભીર ગર્ભાવસ્થાના કારણો રજૂ કર્યા હતા, જેના કારણે તેને જેલની સજાને બદલે 11 મહિનાની હોમ ડિટેન્શન (ઘરમાં કેદ) ની સજા આપવામાં આવી છે.
ન્યાયાધીશ સ્ટીફન ક્લાર્કે સ્નેહાના બચાવમાં આપેલી દલીલોને “બકવાસ” ગણાવી હતી અને કહ્યું હતું કે, “તે કર્મચારીઓએ તારા પર વિશ્વાસ કર્યો હતો અને તેં તેમનો વિશ્વાસ તોડ્યો છે.”
આર્થિક દંડ અને ચેતવણી
કોર્ટે સ્નેહા પટેલને નીચે મુજબના આદેશો આપ્યા છે:
- પીડિતોને કુલ $49,858.96 વળતર તરીકે ચૂકવવા.
- જેમાંથી $30,000 તાત્કાલિક અને બાકીની રકમ છ મહિનામાં ચૂકવવી.
ઇમિગ્રેશન ન્યુઝીલેન્ડના નેશનલ મેનેજર જેસન પેરીએ જણાવ્યું હતું કે આ કેસ એવા લોકો માટે કડક સંદેશ છે જેઓ કામદારોની મજબૂરીનો ફાયદો ઉઠાવે છે. આ પાંચ વર્ષ લાંબી તપાસ બાદ મળેલી સફળતા છે જે કામદારોના અધિકારોનું રક્ષણ કરવાની કટિબદ્ધતા દર્શાવે છે.
Article courtesy NZ herald.
