માત્ર 10 ઓવરમાં 154 રનનો ટાર્ગેટ ચેઝ કર્યો; અભિષેકની 14 બોલમાં ફિફ્ટી અને સૂર્યાની આક્રમક બેટિંગ, કેપ્ટન સૂર્યકુમાર યાદવે 26 બોલમાં અણનમ 57 રન ફટકાર્યા
ભારત અને ન્યૂઝીલેન્ડ વચ્ચે ગુવાહાટીના બારસાપારા ક્રિકેટ સ્ટેડિયમમાં રમાયેલી પાંચ મેચોની શ્રેણીની ત્રીજી T20 મેચમાં ભારતે 8 વિકેટે ભવ્ય વિજય મેળવ્યો છે. આ જીત સાથે જ ભારતે 5 મેચોની શ્રેણીમાં 3-0 ની અજેય સરસાઈ મેળવીને ટ્રોફી પોતાના નામે કરી લીધી છે. ટોસ જીતીને ભારતે પહેલા બોલિંગ કરવાનો નિર્ણય લીધો હતો, જેને ભારતીય બોલરોએ સાચો સાબિત કર્યો હતો.
ન્યૂઝીલેન્ડની શરૂઆત ખૂબ જ નબળી રહી હતી. હર્ષિત રાણાએ પહેલી જ ઓવરમાં ડેવોન કોનવેને આઉટ કરીને ભારતને પ્રથમ સફળતા અપાવી હતી. ત્યારબાદ હાર્દિક પંડ્યાએ રચિન રવીન્દ્ર અને જસપ્રીત બુમરાહે ટિમ સીફર્ટને સસ્તામાં પેવેલિયન ભેગા કર્યા હતા. જોકે, માર્ક ચેપમેન (32) અને ગ્લેન ફિલિપ્સ (48) વચ્ચે અડધી સદીની ભાગીદારી થઈ હતી, પરંતુ રવિ બિશ્નોઈએ આ જોડી તોડીને ભારતની વાપસી કરાવી હતી. અંતમાં મિશેલ સેન્ટનરના 27 રનની મદદથી કીવી ટીમે 20 ઓવરમાં 9 વિકેટે 153 રન બનાવ્યા હતા. ભારત તરફથી જસપ્રીત બુમરાહે સૌથી વધુ 3 વિકેટ ઝડપી હતી.
154 રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત આંચકાજનક રહી હતી અને સંજુ સેમસન મેટ હેનરીના પહેલા જ બોલે શૂન્ય રને આઉટ થઈ ગયો હતો. પરંતુ, ત્યારબાદ ઈશાન કિશને 13 બોલમાં 28 રન ફટકારી કીવી બોલરો પર દબાણ વધાર્યું હતું. કિશનના આઉટ થયા બાદ અભિષેક શર્માએ આક્રમક બેટિંગનું પ્રદર્શન કર્યું હતું. તેણે માત્ર 14 બોલમાં અડધી સદી ફટકારી હતી, જે ભારત માટે T20 માં બીજી સૌથી ઝડપી ફિફ્ટી છે. અભિષેકે 20 બોલમાં 7 ચોગ્ગા અને 5 છગ્ગાની મદદથી અણનમ 68 રન બનાવ્યા હતા.
મેચના અંતિમ તબક્કે કેપ્ટન સૂર્યકુમાર યાદવે પણ પોતાની આગવી શૈલીમાં બેટિંગ કરતા 26 બોલમાં અણનમ 57 રન ફટકાર્યા હતા. આ બંને બેટ્સમેનોએ ત્રીજી વિકેટ માટે 102 રનની અણનમ ભાગીદારી કરીને ભારતને માત્ર 10 ઓવરમાં જ જીત અપાવી દીધી હતી. ભારતે આક્રમક રમત રમીને ન્યૂઝીલેન્ડના બોલિંગ આક્રમણને વેરવિખેર કરી નાખ્યું હતું. જસપ્રીત બુમરાહને તેના શાનદાર સ્પેલ (3/17) માટે ‘પ્લેયર ઓફ ધ મેચ’ જાહેર કરવામાં આવ્યો હતો.
