ટીએમસીના મમતા બેનરજીએ યશવંત સિંહાના નામનો મૂક્યો હતો પ્રસ્તાવ, શરદ પવારની અધ્યક્ષતામાં મળેલી બેઠકમાં વિપક્ષે સિંહાના નામની મંજૂરી આપી
ગુજરાત ગુજરાત ન્યુઝ
પૂર્વ નેતા યશવંત સિન્હાના નામને રાષ્ટ્રપતિ પદ માટે વિપક્ષના ઉમેદવાર તરીકે મંજૂરી આપવામાં આવી છે. NCP નેતા શરદ પવારની અધ્યક્ષતામાં વિપક્ષી દળોની બેઠકમાં આ નિર્ણય લેવામાં આવ્યો છે. આ બેઠકમાં યશવંત સિંહા પણ હાજર હતા. અગાઉ, વિપક્ષ દ્વારા આગળ મૂકવામાં આવેલા ત્રણ નામોએ ઉમેદવાર બનવાનો ઇનકાર કર્યો હતો. જેમાં શરદ પાવર, ફારૂક અબ્દુલ્લા અને ગોપાલકૃષ્ણ ગાંધીના નામ સામેલ હતા. યશવંત સિંહાએ પહેલા જ પાર્ટીમાંથી રાજીનામું આપવાની ઓફર કરી હતી. તેમણે કહ્યું હતું કે હવે સમય આવી ગયો છે કે તેઓ એક મોટા રાષ્ટ્રીય હેતુ માટે પાર્ટીથી દૂર થઈને વિપક્ષની એકતા માટે કામ કરે.
કોંગ્રેસના નેતા જયરામ રમેશે કહ્યું કે તમામ વિપક્ષી દળોએ સાથે મળીને નિર્ણય કર્યો છે કે રાષ્ટ્રપતિની ચૂંટણીમાં યશવંત સિંહા અમારા ઉમેદવાર હશે. રમેશે કહ્યું કે યશવંત સિંહા લાયક ઉમેદવાર છે. તેઓ ભારતના ધર્મનિરપેક્ષતા અને લોકતાંત્રિક માળખામાં માને છે. તેમણે એમ પણ કહ્યું કે અમે દુઃખી છીએ કે મોદી સરકાર રાષ્ટ્રપતિ પદના ઉમેદવાર પર અભિપ્રાય બનાવવા માટે ગંભીર ચર્ચા કરી શકી નથી. તમને જણાવી દઈએ કે મમતા બેનર્જીનો આભાર માનીને તેમણે પાર્ટી છોડવાનો નિર્ણય કર્યો ત્યારથી તેમના રાષ્ટ્રપતિ પદના ઉમેદવાર બનવાની ચર્ચા શરૂ થઈ ગઈ હતી.
