વર્લ્ડ ટેસ્ટ ચેમ્પિયનશિપની ત્રીજી આવૃત્તિ ઓસ્ટ્રેલિયા અને ઈંગ્લેન્ડ વચ્ચે પાંચ ટેસ્ટની એશિઝ શ્રેણી સાથે શરૂ થશે. ઓસ્ટ્રેલિયા 16 જૂનથી બર્મિંગહામમાં ઈંગ્લેન્ડ સામે પ્રથમ ટેસ્ટ રમશે.
વર્લ્ડ ટેસ્ટ ચેમ્પિયનશિપ (2023-25)ની ત્રીજી આવૃત્તિનું શેડ્યૂલ સત્તાવાર રીતે જાહેર કરવામાં આવ્યું છે. ICCએ બુધવારે (14 જૂન) શેડ્યૂલની જાહેરાત કરી હતી. ત્રીજી આવૃત્તિની શરૂઆત ઓસ્ટ્રેલિયા અને ઈંગ્લેન્ડ વચ્ચે પાંચ ટેસ્ટની એશિઝ શ્રેણીથી થશે. ઓસ્ટ્રેલિયા 16 જૂનથી બર્મિંગહામમાં ઈંગ્લેન્ડ સામે પ્રથમ ટેસ્ટ રમશે. જે બાદ બાકીની ચાર મેચ લોર્ડ્સ, લીડ્સ, માન્ચેસ્ટર અને ઓવલ ખાતે રમાશે.
ભારતીય ટીમની વાત કરીએ તો આ સાઇકલમાં તેને મુશ્કેલ ડ્રો મળ્યો છે. વેસ્ટ ઈન્ડિઝ ઉપરાંત તેને ઓસ્ટ્રેલિયા અને દક્ષિણ આફ્રિકાનો પ્રવાસ પણ કરવાનો છે. આ સાથે જ ભારત પોતાના હોમ ગ્રાઉન્ડ પર ન્યૂઝીલેન્ડ, ઈંગ્લેન્ડ અને બાંગ્લાદેશ સામે રમશે.
ટીમ ઈન્ડિયાની કઈ ટીમ સામે કેટલી મેચ?
ભારતીય ટીમ વિદેશ પ્રવાસમાં વેસ્ટ ઈન્ડિઝ સામે બે, ઓસ્ટ્રેલિયા સામે પાંચ અને દક્ષિણ આફ્રિકા સામે બે ટેસ્ટ મેચ રમશે. આ સાથે જ તેને ઘરઆંગણે ન્યૂઝીલેન્ડ સામે ત્રણ ટેસ્ટ મેચની શ્રેણી રમવાની છે. ઈંગ્લેન્ડની ટીમ પાંચ મેચ માટે ભારત આવશે. આ સાથે જ બાંગ્લાદેશ ભારતની ધરતી પર બે ટેસ્ટ રમશે.
ઓસ્ટ્રેલિયાનું શિડ્યુલ
વર્તમાન ટેસ્ટ ચેમ્પિયન ઓસ્ટ્રેલિયાની ટીમ ઈંગ્લેન્ડના પ્રવાસ પર પાંચ ટેસ્ટ રમશે. આ ચક્રમાં તેણે ન્યૂઝીલેન્ડ અને શ્રીલંકાનો પ્રવાસ પણ કરવાનો છે. આ દરમિયાન બે ટેસ્ટ મેચોની શ્રેણી રમાશે. આ સાથે જ કાંગારૂ ટીમ ભારત સામે પાંચ, પાકિસ્તાન સામે ત્રણ અને ઘરઆંગણે વેસ્ટ ઈન્ડિઝ સામે બે ટેસ્ટ રમશે.
ઇંગ્લેન્ડ શેડ્યૂલ
ઈંગ્લિશ ટીમ ઘરઆંગણે 10 ટેસ્ટ મેચ અને વિદેશી મેદાન પર 11 મેચ રમશે. ઓસ્ટ્રેલિયા ઉપરાંત તે વેસ્ટ ઈન્ડિઝ (ત્રણ ટેસ્ટ) અને શ્રીલંકા (બે ટેસ્ટ)ની યજમાની કરશે. ઈંગ્લેન્ડ પાંચ ટેસ્ટ, પાકિસ્તાન ત્રણ ટેસ્ટ અને ન્યૂઝીલેન્ડ ત્રણ ટેસ્ટ માટે ભારતનો પ્રવાસ કરશે.
દક્ષિણ આફ્રિકાને સૌથી સરળ ડ્રો મળ્યો
દક્ષિણ આફ્રિકાની ટીમને સૌથી સરળ ડ્રો મળ્યો છે. તેણે પોતાના હોમ ગ્રાઉન્ડ પર ત્રણ એશિયન ટીમોનો સામનો કરવાનો છે. પાકિસ્તાન, શ્રીલંકા અને ભારતની ટીમ આફ્રિકાની ધરતી પર ટેસ્ટ મેચ રમશે. જ્યારે, દક્ષિણ આફ્રિકા આ ચક્રમાં ન્યુઝીલેન્ડ, વેસ્ટ ઈન્ડિઝ અને બાંગ્લાદેશનો પ્રવાસ કરશે.
