અલ્હાબાદ ઉચ્ચ ન્યાયાલયની લખનૌ પીઠે કેન્દ્રીય ફિલ્મ પ્રસારણ બોર્ડ (CBFC)ને સવાલ પૂછ્યો હતો કે નેટફ્લિક્સ, અમેજોન પ્રાઇમ સહિત તમામ પ્રકારના OTT પ્લેટફોર્મ કે સોશ્યલ મીડિયા ઉપર ફિલ્મના પ્રસારણ માટે પ્રમાણપત્ર આપવાનો અધિકાર કોની પાસે હોય છે ?
હાઈકોર્ટે કેન્દ્ર અને CBFCને OTT ફિલ્મો માટે પ્રમાણપત્ર આપવા માટે અધિકૃત છે કે કેમ તે જણાવવા માટે કાઉન્ટર એફિડેવિટ દાખલ કરવા જણાવ્યું છે.
હાઈકોર્ટે આગામી સુનાવણી માટે 13 ઓગસ્ટની તારીખ નક્કી કરી છે.
આ આદેશ જસ્ટિસ રાજન રોય અને જસ્ટિસ ઓમ પ્રકાશ શુક્લાની ડિવિઝન બેંચે દિપાંકર કુમારની પીઆઈએલ પર આપ્યો છે.
અરજીમાં તેલુગુ ફિલ્મ ‘તકાતવર પોલીસવાલા’ પર બિહારના લોકો વિરુદ્ધ વાંધાજનક ટિપ્પણી કરવાનો આરોપ લગાવવામાં આવ્યો છે.
આ ફિલ્મ તેલુગુ ફિલ્મ ‘ધી આંટે ધી’નું હિન્દી રૂપાંતરણ છે.
અરજીકર્તાએ અરજીમાં કહ્યું છે કે મૂળ 2015માં તેલુગુ ભાષામાં બનેલી આ ફિલ્મ યુટ્યુબ પર ઉપલબ્ધ છે, જેમાં બિહારના લોકોને ગંદકી ફેલાવતા ગણાવવામાં આવ્યા છે.
અરજીમાં ફિલ્મનું સેન્સર સર્ટિફિકેટ રદ કરવાની માંગ કરવામાં આવી છે. અરજીની સુનાવણી કરતી વખતે, કોર્ટે એડવોકેટ જનરલ કુલદીપ પાટી ત્રિપાઠીને એમિકસ ક્યુરી (એમિકસ ક્યુરી) તરીકે નિયુક્ત કર્યા અને તેમને કેસની સુનાવણીમાં સહકાર આપવા કહ્યું છે.
ફિલ્મ જોયા બાદ ત્રિપાઠીએ કોર્ટને કહ્યું કે ફિલ્મમાં અત્યંત વાંધાજનક સંવાદો છે, જે પ્રદેશના આધારે ભેદભાવ, વિવિધ રાજ્યોના લોકોમાં કડવાશ અને શાંતિમાં ભંગાણ પેદા કરી શકે છે.
