ટાઈમ્સ મેગેઝીન દ્વારા વર્ષ 2024ના સૌથી પ્રભાવશાળી લોકોની જાહેર કરાયેલી યાદીમાં ભારતીય અભિનેત્રી આલિયા ભટ્ટનું નામ સામેલ છે. આલિયાએ પોતાના કામ દ્વારા દેશમાં જ નહીં વિદેશમાં પણ પોતાની ઓળખ બનાવી છે.
ટાઈમ્સ મેગેઝીનની યાદીમાં આલિયા ભટ્ટને અદભૂત પ્રતિભા તરીકે વર્ણવવામાં આવી છે. આ સિવાય ભારતીય મુળના બ્રિટિશ અભિનેતા દેવ પટેલ અને પ્રખ્યાત ગાયિકા દુઆ લિપાના નામ પણ આ યાદીમાં સામેલ કરવામાં આવ્યા છે.
આ લિસ્ટની જાહેરાત કરતી વખતે આલિયા ભટ્ટની પ્રોફાઇલમાં લખવામાં આવ્યું છે કે તે વિશ્વની ટોચની અભિનેત્રીઓમાંની એક છે. તે એક દાયકાથી હિન્દી ફિલ્મ ઈન્ડસ્ટ્રીમાં પ્રશંસનીય કામ કરી રહી છે. આ સાથે તેમના સારા સ્વભાવ અને પ્રમાણિકતાના પણ વખાણ થયા છે. તમને જણાવી દઈએ કે અભિનેત્રી આલિયાએ તેની પહેલી હોલીવુડ ફિલ્મ ‘હાર્ટ ઓફ સ્ટોન’માં ‘ટોમ હાર્પર’ સાથે કામ કર્યું છે.
100 પ્રભાવશાળી લોકોની યાદીમાં ઓસ્કાર વિજેતા ડો.વાઈન જોય રેન્ડોલ્ફ અને ઓસ્કાર નામાંકિત અભિનેતા જેફરી રાઈટ અને કોલમેન ડોમિંગોના નામ પણ સામેલ છે.
આ ઉપરાંત તારાજી પી હેન્સન, ઈલિયટ પેજ, માઈકલ જે. ફોક્સ, સોફિયા કોપોલા અને હાયાઓ મિયાઝાકીને પણ આ યાદીમાં સ્થાન મળ્યું છે.
આલિયા ભટ્ટના વર્ક ફ્રન્ટની વાત કરીએ તો તે છેલ્લે ‘રોકી ઔર રાની કી પ્રેમ કહાની’માં જોવા મળી હતી. હાલમાં તે ‘જીગરા’ના શૂટિંગમાં વ્યસ્ત છે. આ સિવાય તે સંજય લીલા ભણસાલીની ફિલ્મ લવ એન્ડ વોરમાં પણ જોવા મળશે.
