ચેમ્પિયન ટીમનો કેપ્ટન અપશબ્દો બોલીને ફસાઈ ગયો, હવે T20 વર્લ્ડ કપમાંથી બહાર થવાનું જોખમ!
T20 વર્લ્ડ કપ પહેલા યજમાન ઓસ્ટ્રેલિયાની ટીમને મોટો ઝટકો લાગ્યો છે. પર્થમાં ઈંગ્લેન્ડ સામેની પ્રથમ T20 મેચમાં દુર્વ્યવહાર કરવા બદલ ઓસ્ટ્રેલિયાના કેપ્ટન એરોન ફિન્ચને દંડ ફટકારવામાં આવ્યો છે. ફિન્ચને ICC નિયમોનો ભંગ કરવા બદલ દોષી ઠેરવવામાં આવ્યો છે. ICC દ્વારા જારી કરવામાં આવેલા નિવેદન અનુસાર, ઈંગ્લેન્ડની ઈનિંગની 9મી ઓવરમાં એરોન ફિન્ચે કંઈક એવું કહ્યું જે સ્ટમ્પ માઈક પર રેકોર્ડ થઈ ગયું હતું. આ કારણોસર, એરોન ફિન્ચને ICC આચાર સંહિતાની કલમ 2.3નું ઉલ્લંઘન કરવા બદલ દોષી ઠેરવવામાં આવ્યો છે.
એરોન ફિન્ચે આ આરોપો સ્વીકારી લીધા છે અને તેના અનુશાસન રેકોર્ડમાં આ અંગે એક મુદ્દો નોંધવામાં આવ્યો છે. એટલે કે ભવિષ્યમાં જો તે આવું કોઈ કામ કરશે તો તેના પર મોટી કાર્યવાહી થઈ શકે છે. તમને જણાવી દઈએ કે છેલ્લા બે વર્ષમાં એરોન ફિન્ચ દ્વારા કરવામાં આવેલો આ પહેલો ગુનો છે. પરંતુ તેના માટે હજુ પણ ખતરો છે, કારણ કે ICCના નિયમો અનુસાર, જો કોઈ ખેલાડીના અનુશાસન રેકોર્ડમાં ચાર પોઈન્ટ કાપવામાં આવે છે, તો તે ખેલાડી પર પ્રતિબંધ પણ લાગી શકે છે. એટલે કે જો એરોન ફિન્ચ પોતાની ભૂલનું પુનરાવર્તન કરે છે તો તે ઈંગ્લેન્ડ સામે ચાલી રહેલી શ્રેણી અથવા તો T20 વર્લ્ડ કપમાંથી પણ બહાર થઈ શકે છે. તમને જણાવી દઈએ કે ઈંગ્લેન્ડ અને ઓસ્ટ્રેલિયા સામે ચાલી રહેલી સીરીઝમાં હજુ બે ટી20 મેચ બાકી છે, ઓસ્ટ્રેલિયા સીરીઝની પ્રથમ મેચ હારી ગયું છે.
એરોન ફિન્ચ ટી20 વર્લ્ડ કપ 2022 દરમિયાન ઓસ્ટ્રેલિયાની ટીમનું નેતૃત્વ કરશે. ઓસ્ટ્રેલિયાની પ્રથમ મેચ 22 ઓક્ટોબરે ન્યૂઝીલેન્ડ સાથે થવાની છે.
T20 વર્લ્ડ કપ માટેની ઓસ્ટ્રેલિયન ટીમઃ એરોન ફિન્ચ (કેપ્ટન), મેથ્યુ વેડ, ડેવિડ વોર્નર, માર્કસ સ્ટોઈનિસ, એશ્ટન અગર, પેટ કમિન્સ, ટિમ ડેવિડ, જોશ હેઝલવુડ, જોશ ઈંગ્લિસ, મિશેલ માર્શ, ગ્લેન મેક્સવેલ, કેન રિચાર્ડસન, સ્ટીવ સ્મિથ, મિશેલ સ્ટાર્ક અને એડમ ઝમ્પા.
