હાઇસ્કોરિંગ ગેમમાં ભારતે ઇંગ્લેન્ડને 7 રને હરાવ્યું, ભારત 253/7, ઇંગ્લેન્ડ 246/7, મેન ઓફ ધ મેચ સંજુ સેમસનના 89 રન, તો ઇંગ્લેન્ડના જેકોબ બેથલની સદી, બુમરાહે ડેથ ઓવરમાં શાનદાર બોલિંગ કરી
હવે ન્યૂઝીલેન્ડ સામે 8મી માર્ચે ફાઇનલ મુકાબલો
મુંબઈ: ગુરુવારે વાનખેડે સ્ટેડિયમ ખાતે રમાયેલી T20 વર્લ્ડ કપ 2026ની બીજી સેમીફાઇનલમાં ભારતે ઇંગ્લેન્ડને 7 રને હરાવીને ફાઇનલમાં પ્રવેશ કર્યો છે. 254 રનના વિશાળ લક્ષ્યાંકનો પીછો કરતા ઇંગ્લેન્ડની ટીમ 246 રન જ બનાવી શકી હતી. હવે 8 માર્ચના રોજ અમદાવાદમાં ભારત અને ન્યૂઝીલેન્ડ વચ્ચે ખિતાબી જંગ જામશે.
સંજુ સેમસનની તોફાની બેટિંગ: 42 બોલમાં 89 રન
ભારતની જીતમાં સંજુ સેમસન હીરો સાબિત થયો હતો. સંજુએ માત્ર 42 બોલમાં 89 રનની વિસ્ફોટક ઇનિંગ રમી હતી, જેમાં 8 ચોગ્ગા અને 7 છગ્ગાનો સમાવેશ થાય છે. જોકે, જ્યારે સંજુ 15 રન પર હતો ત્યારે હેરી બ્રુકે તેનો કેચ છોડ્યો હતો, જે ઇંગ્લેન્ડને ઘણો મોંઘો પડ્યો હતો. સૂર્યકુમાર યાદવની આગેવાનીમાં ભારતીય બેટિંગે રનનો પહાડ ખડકી દીધો હતો.
અક્ષર પટેલની ‘ગેમ ચેન્જિંગ’ ફિલ્ડિંગ
મેચમાં અક્ષર પટેલની ફિલ્ડિંગ ટર્નિંગ પોઈન્ટ સાબિત થઈ હતી. તેણે હવામાં ઉડીને ઇંગ્લિશ કેપ્ટન હેરી બ્રુકનો અદ્ભુત કેચ ઝડપ્યો હતો. આ ઉપરાંત, સેટ થઈ ચૂકેલા વિલ જેક્સને પેવેલિયન ભેગો કરવામાં અને ફિલ સોલ્ટનો કેચ પકડવામાં પણ અક્ષરે મહત્વની ભૂમિકા ભજવી હતી.
બુમરાહ અને હાર્દિકે છેલ્લી ઘડીએ મેચ પલટી
જ્યારે ઇંગ્લેન્ડ જીતની નજીક જતું જણાતું હતું, ત્યારે 18મી અને 19મી ઓવરે પાસું પલટી નાખ્યું:
- 18મી ઓવર (બુમરાહ): જસપ્રીત બુમરાહે અત્યંત ચોકસાઈથી બોલિંગ કરી માત્ર 6 રન આપ્યા.
- 19મી ઓવર (હાર્દિક): હાર્દિક પંડ્યાએ માત્ર 9 રન ખર્ચ્યા અને સેમ કરન જેવી મહત્વની વિકેટ ઝડપી. આ બે ઓવરને કારણે ઇંગ્લેન્ડને છેલ્લી ઓવરમાં 30 રન કરવાના આવ્યા હતા, જે અશક્ય સાબિત થયા.
ઇતિહાસ રચવાની સુવર્ણ તક
ભારત હવે સતત બીજો T20 વર્લ્ડ કપ જીતવા માટે મેદાનમાં ઉતરશે. અત્યાર સુધી કોઈ પણ યજમાન ટીમ T20 વર્લ્ડ કપ જીતી શકી નથી, અને કોઈ ટીમે સતત બે વાર આ ખિતાબ જીત્યો નથી. ભારત પાસે 8 માર્ચે ન્યૂઝીલેન્ડને હરાવીને નવો ઇતિહાસ રચવાની તક છે.
