કોંગ્રેસના વરિષ્ઠ નેતા સોનિયા ગાંધી આજે તા.14 ફેબ્રુઆરીએ રાજ્યસભા માટે ઉમેદવારી નોંધાવશે.
સોનિયા રાજસ્થાન અથવા હિમાચલ પ્રદેશમાંથી ઉમેદવારી નોંધાવી શકે છે. હાલમાં તેઓ ઉત્તર પ્રદેશના રાયબરેલીથી લોકસભાના સાંસદ છે.
ઉલ્લેખનીય છે કે તાજેતરમાં જ ભાજપે આગામી રાજ્યસભા ચૂંટણી માટે બિહાર, છત્તીસગઢ, હરિયાણા, કર્ણાટક, ઉત્તર પ્રદેશ, ઉત્તરાખંડ અને પશ્ચિમ બંગાળમાંથી પોતાના 14 ઉમેદવારોના નામની જાહેરાત કરી છે. ઉત્તર પ્રદેશમાંથી સુધાંશુ ત્રિવેદી અને આરપીએન સિંહ ઉપરાંત પાર્ટીએ યુપીમાંથી કુલ 7 ઉમેદવારોના નામની જાહેરાત કરી હતી. તે જ સમયે, પાર્ટીએ સુભાષ બરાલાને હરિયાણાથી ઉમેદવાર જાહેર કર્યા હતા.
ભાજપે યુપીથી આરપીએન સિંહ, સુધાંશુ ત્રિવેદી, ચૌધરી તેજવીર સિંહ, સાધના સિંહ, અમરપાલ મૌર્ય, સંગીતા બળવંત, નવીન જૈનના નામની જાહેરાત કરી છે. જ્યારે પશ્ચિમ બંગાળમાંથી સમિક ભટ્ટાચાર્ય, ઉત્તરાખંડમાંથી મહેન્દ્ર ભટ્ટ, કર્ણાટકમાંથી નારાયણ કૃષ્ણસા ભાંડગે અને છત્તીસગઢથી દેવેન્દ્ર પ્રતાપ સિંહને ઉમેદવાર બનાવવામાં આવ્યા છે.
યુપીમાંથી રાજ્યસભાની 10 બેઠકો ખાલી થઈ રહી છે,તેમાંથી ભાજપે 7 બેઠકો પર અને સમાજવાદી પાર્ટીએ 3 બેઠકો પર પોતાના ઉમેદવારોની જાહેરાત કરી છે.
સમાજવાદી પાર્ટીએ જયા બચ્ચન, રામજીલાલ સુમન અને આલોક રંજનને રાજ્યસભામાં પોતાના ઉમેદવાર બનાવ્યા છે.
આલોક રંજન અખિલેશ યાદવના સલાહકાર છે અને પડદા પાછળના મુખ્ય વ્યૂહરચનાકાર માનવામાં આવે છે, જ્યારે જયા બચ્ચન યાદવ પરિવાર સાથે ગાઢ પારિવારિક સંબંધો ધરાવે છે,સાથે જ અખિલેશ રામજીલાલ સુમન દ્વારા દલિત સમુદાયને આકર્ષવાનો પ્રયાસ કરશે.
