અમદાવાદ પહોંચેલા ખેલાડીઓને કોરોના, શ્રેયશ ઐયર, ઋતુરાજ ગાયકવાડને કોરોના, શિખર ધવન, સ્ટેન્ડબાય નવદીપ સૈની પણ કોરોના સંક્રમિત
કેતન જોશી. નમસ્કાર ગુજરાત ન્યૂઝ
અમદાવાદમાં રમાનારી ભારત અને વેસ્ટ ઈન્ડિઝ વચ્ચેની શ્રેણી પહેલા ટીમ ઈન્ડિયાને મોટો ઝટકો લાગ્યો છે. ભારતીય ટીમના 8 ખેલાડીઓ કોરોના પોઝિટિવ હોવાનું સામે આવ્યું છે. જેમાં શિખર ધવન, ઋતુરાજ ગાયકવાડ સહિત કેટલાક ખેલાડીઓના નામ સામેલ છે. માહિતી અનુસાર, ટીમ ઈન્ડિયામાં જે કોરોનાના કેસો સામે આવ્યા છે તેમાં ખેલાડીઓ અને સપોર્ટ સ્ટાફ બંનેનો સમાવેશ થાય છે.
કોરોના પોઝિટિવ મળી આવતા તમામને ક્વોરેન્ટાઈન કરવામાં આવ્યા છે. આમાં શિખર ધવન, ઋતુરાજ ગાયકવાડને કોરોના હોવાની પુષ્ટિ થઈ છે. જ્યારે બાકીના સંબંધમાં સત્તાવાર પુષ્ટિ માટે BCCI મેડિકલ ટીમના નિવેદનની રાહ જોવાઈ રહી છે. તમામ ખેલાડીઓ અમદાવાદમાં વ્યસ્ત છે. તમને જણાવી દઈએ કે, ટીમ ઈન્ડિયાના તમામ ખેલાડીઓ દક્ષિણ આફ્રિકાના પ્રવાસથી પરત ફર્યા બાદ પોતાના ઘરે હતા, પરંતુ હવે તમામ ODI સીરિઝ પહેલા અમદાવાદમાં ભેગા થઈ રહ્યા હતા. આવી સ્થિતિમાં અહીં કોરોના ટેસ્ટ કરાવ્યા બાદ કેટલાક ખેલાડીઓનો રિપોર્ટ પોઝિટિવ આવ્યો છે.
સભ્યોને 31મી જાન્યુઆરી 2022ના રોજ વેસ્ટ ઈન્ડિઝ સામે થનારી Paytmની ત્રણ મેચની ODI અને T20I શ્રેણી માટે અમદાવાદમાં રિપોર્ટ કરવાનું કહેવામાં આવ્યું હતું. દરેક સભ્યને અમદાવાદની મુસાફરી શરૂ કરતા પહેલા ઘરે RT-PCR ટેસ્ટ કરાવવાનું પણ કહેવામાં આવ્યું હતું અને નેગેટિવ ટેસ્ટ આવ્યા પછી જ મુસાફરી હાથ ધરવામાં આવી હતી. બીસીસીઆઈની મેડિકલ ટીમ પોઝિટિવ કેસને સંભાળી રહી છે અને જ્યાં સુધી સંપૂર્ણ સ્વસ્થતા પ્રાપ્ત ન થાય ત્યાં સુધી તેઓ આઈસોલેશનમાં રહેશે.
વિગતવાર અપડેટ નીચે મુજબ છે:
1) ઓપનિંગ બેટ્સમેન શિખર ધવન અને ફાસ્ટ બોલર નવદીપ સૈની (સ્ટેન્ડબાય પ્લેયર)ના સોમવારે (31મી જાન્યુઆરી)ના રોજ હાથ ધરવામાં આવેલા RT-PCR ટેસ્ટમાં સકારાત્મક પરિણામો આવ્યા છે.
2) ફિલ્ડિંગ કોચ ટી. દિલીપ અને સિક્યુરિટી લાયઝન ઓફિસર બી. લોકેશના સોમવારે (31 જાન્યુઆરી)ના રોજ હાથ ધરવામાં આવેલા RT-PCR પરીક્ષણોના પોઝિટિવ રિપોર્ટ આવ્યા છે.
3) બેટ્સમેન રુતુરાજ ગાયકવાડની મંગળવાર (1લી ફેબ્રુઆરી)ના રોજ કરવામાં આવેલ RT-PCR ટેસ્ટનું પરિણામ પોઝિટિવ આવ્યું છે. સોમવારે પ્રથમ રાઉન્ડના ટેસ્ટિંગ દરમિયાન તેમનો ટેસ્ટ નેગેટિવ આવ્યો હતો.
4) બેટ્સમેન શ્રેયસ અય્યર અને સ્પોર્ટ્સ મસાજ થેરાપિસ્ટ રાજીવ કુમારના બુધવારે (2જી ફેબ્રુઆરી)ના રોજ હાથ ધરવામાં આવેલા RT-PCR પરીક્ષણોના પોઝિટિવ પરિણામો આવ્યા છે. બંને ટેસ્ટિંગના પ્રથમ બે રાઉન્ડમાં નેગેટિવ આવ્યા હતા.
ODI શ્રેણી દર્શકો વિના રમાશે
ભારતીય ટીમ 6 ફેબ્રુઆરીથી વેસ્ટ ઈન્ડિઝ સામે વનડે શ્રેણી રમવાની છે. અમદાવાદમાં ત્રણેય વનડે રમાશે તે પહેલા ટીમ ઈન્ડિયા અહીં પહોંચી ગઈ છે અને ક્વોરેન્ટાઈનમાં છે. કોરોના વાયરસને ધ્યાનમાં રાખીને, BCCI દ્વારા નિર્ણય લેવામાં આવ્યો હતો કે તમામ ODI મેચો દર્શકો વિના રમાશે.
ફુલ ટાઇમ કેપ્ટનશિપ હેઠળ રોહિત શર્માની પ્રથમ સિરીઝ
તમને જણાવી દઈએ કે રોહિત શર્માના ફુલ ટાઈમ કેપ્ટન બન્યા બાદ ભારતીય ટીમની આ પહેલી વનડે સિરીઝ છે, પરંતુ તેને ગ્રહણ લાગી ચૂક્યું છે. રોહિત શર્મા ઈજામાંથી સાજા થઈને વાપસી કરી રહ્યો છે, આવી સ્થિતિમાં ટીમ ઈન્ડિયાએ વર્લ્ડ કપ પહેલા પોતાની તૈયારીઓ માટે તૈયાર થઈ જવું પડશે.
વેસ્ટ ઈન્ડિઝ પ્રવાસ માટે ટીમ ઈન્ડિયાઃ રોહિત શર્મા (કેપ્ટન), કેએલ રાહુલ (વાઈસ-કેપ્ટન), ઋતુરાજ ગાયકવાડ, શિખર ધવન, વિરાટ કોહલી, સૂર્યકુમાર યાદવ, શ્રેયસ ઐયર, દીપક હુડા, ઋષભ પંત (વિકેટમેન), દીપક ચહર, શાર્દુલ ઠાકુર, યુઝવેન્દ્ર ચહલ, કુલદીપ યાદવ, વોશિંગ્ટન સુંદર, રવિ બિશ્નોઈ, મોહમ્મદ સિરાજ, ફેમસ ક્રિષ્ના અને અવેશ ખાન.
T20 ટીમઃ રોહિત શર્મા (કેપ્ટન), કેએલ રાહુલ (વાઈસ-કેપ્ટન), ઈશાન કિશન, વિરાટ કોહલી, શ્રેયસ ઐયર, સૂર્યકુમાર યાદવ, ઋષભ પંત (વિકેટમેન), વેંકટેશ ઐયર, દીપક ચહર, શાર્દુલ ઠાકુર, રવિ બિશ્નોઈ, અક્ષર પટેલ, યુઝવેન્દ્ર ચહલ, વોશિંગ્ટન સુંદર, મોહમ્મદ સિરાજ, ભુવનેશ્વર કુમાર, અવેશ ખાન અને હર્ષલ પટેલ.
ભારત વિ વેસ્ટ ઈન્ડિઝ શ્રેણી:
1લી ODI – 6 ફેબ્રુઆરી, અમદાવાદ
બીજી ODI – 9 ફેબ્રુઆરી, અમદાવાદ
ત્રીજી ODI – 12 ફેબ્રુઆરી, અમદાવાદ
1લી T20I મેચ – 15 ફેબ્રુઆરી, કોલકાતા
બીજી T20I મેચ – 18 ફેબ્રુઆરી, કોલકાતા
ત્રીજી T20 મેચ – 20 ફેબ્રુઆરી, કોલકાતા
