Asia Cup 2025 PAK vs BAN Match: પાકિસ્તાની ટીમે બાંગ્લાદેશ પર 11 રને જીત મેળવી, બાંગ્લાદેશને જીત માટે 136 રનનો ટાર્ગેટ મળ્યો હતો, પરંતુ ટીમ 20 ઓવરમાં 9 વિકેટે માત્ર 124 રન જ બનાવી શકી.
એશિયા કપ 2025 ની મેચ નંબર-17માં 25 સપ્ટેમ્બર (ગુરુવારે) ના રોજ બાંગ્લાદેશ અને પાકિસ્તાન વચ્ચે ટક્કર થઈ હતી. દુબઈના દુબઈ ઇન્ટરનેશનલ ક્રિકેટ સ્ટેડિયમમાં રમાયેલા આ સુપર-ફોર મુકાબલામાં પાકિસ્તાની ટીમે બાંગ્લાદેશ પર 11 રને જીત મેળવી. આ જીત સાથે પાકિસ્તાની ટીમ ફાઇનલમાં પ્રવેશી ચૂકી છે.
હવે 28 સપ્ટેમ્બર (રવિવારે) રમાનારી ફાઇનલમાં પાકિસ્તાનનો મુકાબલો ભારત સામે થશે. એશિયા કપના 41 વર્ષના ઇતિહાસમાં આ પ્રથમ વખત હશે જ્યારે ભારત અને પાકિસ્તાન વચ્ચે ફાઇનલ મેચ રમાશે. આ મેચમાં બાંગ્લાદેશને જીત માટે 136 રનનો ટાર્ગેટ મળ્યો હતો, પરંતુ તેની ટીમ 20 ઓવરમાં 9 વિકેટે માત્ર 124 રન જ બનાવી શકી.
બાંગ્લાદેશ તરફથી શમીમ હુસૈને સૌથી વધુ 30 રન બનાવ્યા. આ સાથે જ સૈફ હસન (18 રન), રિક્ષાદ હુસૈન (અણનમ 16 રન) અને નુરુલ હસન (16 રન) એ પણ ક્રિઝ પર ટકી રહેવાનો પ્રયાસ કર્યો. પાકિસ્તાન તરફથી શાહીન આફ્રિદી અને હારિસ રઉફે ત્રણ-ત્રણ વિકેટ ઝડપી. જ્યારે સેમ અયુબે બે વિકેટ લીધી. મોહમ્મદ નવાઝને પણ એક વિકેટ મળી.
પાકિસ્તાની ટીમે ટોસ હાર્યા બાદ પ્રથમ બેટિંગ કરતા 8 વિકેટે 135 રન બનાવ્યા હતા. વિકેટકીપર બેટ્સમેન મોહમ્મદ હારિસે 2 ચોગ્ગા અને એક છગ્ગાની મદદથી 23 બોલમાં સૌથી વધુ 31 રનનું યોગદાન આપ્યું. જ્યારે મોહમ્મદ નવાઝે 15 બોલનો સામનો કરીને 25 રન બનાવ્યા, જેમાં બે છગ્ગા અને એક ચોગ્ગાનો સમાવેશ થાય છે.
સલમાન અલી આગા (19 રન), શાહીન આફ્રિદી (19 રન) અને ફખર ઝમાન (13 રન) પણ ડબલ આંકડા સુધી પહોંચવામાં સફળ રહ્યા. બાંગ્લાદેશ તરફથી ફાસ્ટ બોલર તસ્કીન અહેમદે સૌથી વધુ ત્રણ વિકેટ ઝડપી. સ્પિન બોલરો રિક્ષાદ હુસૈન અને મેહેદી હસને બે-બે સફળતા મેળવી. જ્યારે મુસ્તફિઝુર રહેમાનને એક વિકેટ મળી.
