પશ્ચિમી સંસ્કૃતિનો પ્રભાવ ઘટાડવા માટે તાનાશાહે અજીબોગરીબ નિર્ણય લીધો, વિદેશી ફિલ્મો જોવા માટે પણ થાય છે મોતની સજા
પ્યોંગયાંગ, ઉત્તર કોરિયા: પોતાના વિચિત્ર અને કડક નિર્ણયો માટે હંમેશા ચર્ચામાં રહેતા ઉત્તર કોરિયાના (North Korea) તાનાશાહ કિમ જોંગ ઉન (Kim Jong Un) ફરી એકવાર ચર્ચામાં છે. તેમણે પોતાના દેશમાં ઘણા સામાન્ય અંગ્રેજી શબ્દો (English Words ban) પર પ્રતિબંધ લગાવી દીધો છે. આ નિર્ણય પાછળનો મુખ્ય હેતુ દેશમાં પશ્ચિમી સંસ્કૃતિના વધતા પ્રભાવને અટકાવવાનો છે.
રિપોર્ટ્સ અનુસાર, કિમ જોંગ ઉને ‘આઈસ્ક્રીમ’, ‘હેમબર્ગર’, ‘કરાઓકે’ જેવા શબ્દો પર પ્રતિબંધ મૂક્યો છે. આ શબ્દોના બદલે સ્થાનિક શબ્દોનો ઉપયોગ કરવાનો આદેશ આપવામાં આવ્યો છે. ઉદાહરણ તરીકે, ‘હેમબર્ગર’ ને હવે ‘દાજિન-ગોઈ ગ્યોપ્પાંગ’ (બે બ્રેડ વચ્ચે મસાલેદાર બીફ) અને ‘આઈસ્ક્રીમ’ ને ‘એસુકિમો’ કહેવું ફરજિયાત છે. ટુરિસ્ટ ગાઈડ્સને ખાસ તાલીમ કાર્યક્રમમાં આ નવા નિયમોનું પાલન કરવાનું કહેવામાં આવ્યું છે.
આ પહેલીવાર નથી કે ઉત્તર કોરિયાએ આવા કડક નિયમો લાગુ કર્યા હોય. દેશમાં વિદેશી ફિલ્મો અને ટીવી ડ્રામા જોવા કે શેર કરવા માટે મૃત્યુદંડની સજા પણ આપવામાં આવે છે. વર્ષ 2023માં દેશ છોડીને ભાગી ગયેલી એક મહિલાએ બીબીસીને જણાવ્યું હતું કે તેના ત્રણ મિત્રોને ફક્ત એટલા માટે ફાંસી આપવામાં આવી હતી કારણ કે તેમની પાસે દક્ષિણ કોરિયાના ડ્રામા હતા.
તાજેતરમાં જ સંયુક્ત રાષ્ટ્રના એક અહેવાલમાં પણ આ વાતની પુષ્ટિ થઈ છે કે છેલ્લા દસ વર્ષમાં વિદેશી મીડિયાના ઉપયોગ પર પ્રતિબંધો વધુ કડક બનાવવામાં આવ્યા છે. અહેવાલમાં જણાવાયું છે કે ઘરેલુ દરોડા, જાહેરમાં ફાંસી અને કડક સજા દ્વારા તાનાશાહીએ લોકોમાં ભયનું વાતાવરણ ઊભું કર્યું છે. તેમ છતાં, ઘણા ઉત્તર કોરિયન નાગરિકો USB સ્ટિક અને ગેરકાયદેસર રેડિયો પ્રસારણ દ્વારા ગુપ્ત રીતે પ્રતિબંધિત કન્ટેન્ટ જોઈ અને સાંભળી રહ્યા છે.
