ઓંઝલ ગામથી ઓકલેન્ડ સુધીની સફર: સમાજસેવા, શિક્ષણ અને રાજકીય આગેવાનીનું સન્માન, સમુદાય સેવા થકી ગુજરાતનું ગૌરવ વધાર્યું
નમસ્કાર ગુજરાત ન્યૂઝ. ઓકલેન્ડ
ન્યુઝીલેન્ડમાં ભારતીય અને બહુ-સાંસ્કૃતિક સમુદાયોની ઉત્કૃષ્ટ સેવાઓ માટે ઓકલેન્ડ સ્થિત ગુજરાતી અગ્રણી નેતા નરેન્દ્ર ભાણાને ‘કિંગ્સ સર્વિસ મેડલ’ (KSM)થી સન્માનિત કરવામાં આવ્યા છે. ન્યુઝીલેન્ડના ગવર્નર-જનરલ ડેમ સિન્ડી કિરો દ્વારા તેમને આ મેડલ એનાયત કરવામાં આવ્યો, જેણે ગુજરાતના મૂળને વૈશ્વિક મંચ પર ગૌરવ અપાવ્યું છે.
ગુજરાતથી ન્યુઝીલેન્ડની સફર: નરેન્દ્ર ભાણાનો જન્મ નવસારી જિલ્લાના ઓંઝલ ગામમાં થયો હતો. ૧૬ વર્ષની ઉંમરે તેઓ ન્યુઝીલેન્ડ આવ્યા હતા. તેમના માતા-પિતા, ગોવિંદભાઈ ધીરુભાઈ પટેલ અને રતનબેન ગોવિંદભાઈ પટેલ, ગુજરાતમાં શિક્ષક હતા. આજે તેમના માતા રતનબેન તેમની સાથે ન્યુઝીલેન્ડમાં રહે છે, જ્યારે પિતાનું અવસાન થયું છે.
ભાણાએ ઑકલેન્ડ યુનિવર્સિટી ઓફ ટેકનોલોજી (AUT)માંથી એમબીએની ડિગ્રી મેળવી છે અને હાલમાં ન્યુઝીલેન્ડમાં કંપનીઓના સમૂહના ડાયરેક્ટર તરીકે સેવા આપી રહ્યા છે.
સમુદાય સેવામાં અગ્રણી ભૂમિકા: ભાણાએ ભારતીય સમુદાયની સેવાને જીવનનું ધ્યેય બનાવ્યું છે. તેઓ જણાવે છે કે, “હું સમુદાય સેવા અને ન્યુઝીલેન્ડના ભારતીય મૂળના લોકોના જીવનને સુધારવા માટે ખૂબ જ ઉત્સાહી છું.”
- તેમણે ઓકલેન્ડ ઇન્ડિયન એસોસિયેશનના પ્રમુખ તરીકે 2018 થી 2021 સુધી સેવા આપી.
- તેમજ તેમણે ન્યુઝીલેન્ડ ઇન્ડિયન સેન્ટ્રલ એસોસિયેશન (NZICA)ના પ્રમુખ તરીકે ગર્વ સાથે 2022 થી 2025 સુધી સેવા આપી, જ્યાં તેમણે ન્યુઝીલેન્ડમાં ભારતીય સમુદાયને એક કરવા માટે મહત્ત્વની ભૂમિકા ભજવી.
- તેમણે ન્યુઝીલેન્ડ સરકારને ભારતીયોને અસર કરતા કાયદો અને વ્યવસ્થાના મુદ્દાઓના નિરાકરણમાં મદદ કરી છે અને ઇમિગ્રેશન વિભાગની નીતિઓમાં ફેરફાર માટે પણ કામ કર્યું છે.
રાષ્ટ્રીય સ્તરે પ્રતિનિધિત્વ: નરેન્દ્ર ભાણાએ ન્યુઝીલેન્ડના રાજકીય ફલક પર પણ સન્માન મેળવ્યું છે. માર્ચ 2025માં ન્યુઝીલેન્ડના વડાપ્રધાન ક્રિસ્ટોફર લક્સનના ભારત પ્રતિનિધિમંડળ (Delegation)ના ભાગ બનવાનું તેમને ગૌરવ પ્રાપ્ત થયું હતું.
પુરસ્કાર સમર્પણ અને જવાબદારીનું પ્રતિક: નરેન્દ્ર ભાણા નરેન્દ્ર ભાણાએ જણાવ્યું હતું કે, “કિંગ્સ સર્વિસ મેડલ પ્રાપ્ત થવો એ શબ્દોથી પરનું સન્માન છે. ઓકલેન્ડના ગવર્નમેન્ટ હાઉસમાં ઊભા રહીને, મેં જોયું કે કેટલા ન્યુઝીલેન્ડવાસીઓ અન્યોની ભલાઈ માટે પોતાનો સમય અને પ્રતિભા આપી રહ્યા છે, જેનાથી મને યાદ આવ્યું કે સેવા એ માન્યતા (recognition) મેળવવાનું નથી, પરંતુ તે એક જવાબદારી છે.“
સમગ્ર સ્વયંસેવક સમુદાયને શ્રદ્ધાંજલિ: તેમણે આ પુરસ્કારનો શ્રેય સમગ્ર સમુદાયને આપ્યો અને કહ્યું કે, “આ પુરસ્કાર એ દરેક સ્વયંસેવક, માર્ગદર્શક અને સમુદાય નેતાને શ્રદ્ધાંજલિ છે જેઓ ઑટેરોઆ (ન્યુઝીલેન્ડ)માં સમજણ અને એકતાના સેતુઓનું નિર્માણ કરવાનું ચાલુ રાખે છે. જેઓ ચૂપચાપ સેવા કરીને દરરોજ એક અસાધારણ તફાવત લાવે છે, તે સૌ વતી હું કૃતજ્ઞતા સાથે આ સન્માન સ્વીકારું છું.”
તેમણે આ અમૂલ્ય મેડલ તેમના માતા-પિતા, પરિવાર, જેમાં તેમના કાકા-કાકી, અને પિતરાઈ ભાઈ જગદીશ તથા ભાભી ગીતા ભાણાનો સમાવેશ થાય છે, તેમને સમર્પિત કર્યો છે. આ સન્માન ન્યુઝીલેન્ડમાં ગુજરાતી ડાયસ્પોરાના યોગદાન અને સખત મહેનતને વધુ એકવાર પ્રકાશિત કરે છે.
