મિત્રો સાથેના ડીનર દરમિયાન મામલો મારામારી સુધી પહોંચ્યો
માઈકલ ક્લાર્કના અંગત જીવનમાં ફરી એકવાર ભૂકંપ આવ્યો છે. માઈકલ ક્લાર્ક પર તેની ગર્લફ્રેન્ડ જેડ યારબ્રો દ્વારા છેતરપિંડીનો આરોપ લગાવવામાં આવ્યો છે. સોશિયલ મીડિયા પર હાલમાં એક વીડિયો વાયરલ થઈ રહ્યો છે, જેમાં ક્લાર્કને તેની ગર્લફ્રેન્ડ થપ્પડ મારી રહી છે. ક્લાર્ક જેડ યારબ્રોની બહેન, જાસ્મિનને મુક્કો મારતો જાય છે. ડેઇલી ટેલિગ્રાફે ક્લાર્ક અને જેડ યારબ્રો વચ્ચેની આ અથડામણ વિશે પણ પોસ્ટ કર્યા હતા.
વીડિયોમાં માઈકલ ક્લાર્ક શર્ટલેસ જોવા મળી રહ્યો છે.વીડિયોમાં ક્લાર્ક તેના પર લાગેલા આરોપોને નકારતા સાંભળી શકાય છે. ક્લાર્ક વીડિયોમાં કહી રહ્યો છે કે હું કસમ ખાઉં છું કે આ સાચું નથી. હું મારી પુત્રીના જીવનની શપથ લેઉ છું. માઈકલ ક્લાર્ક તેની ગર્લફ્રેન્ડ, યારબ્રોની બહેન જાસ્મીન અને તેના પતિ કાર્લ સ્ટેફાનોવિક સાથે રજા પર હતા. કહેવામાં આવી રહ્યું છે કે ચારેય તેમના મિત્ર સાથે ડિનર કરી રહ્યા હતા, ત્યારે આ વિવાદ થયો. યારબ્રોની બહેન જાસ્મીન ઓસ્ટ્રેલિયામાં પ્રખ્યાત ટીવી હોસ્ટ છે.
ક્લાર્કના અંગત જીવનમાં ગરબડ
આ ભૂતપૂર્વ વર્લ્ડ કપ વિજેતા ઓસ્ટ્રેલિયાના કેપ્ટનનું નામ સૌથી પહેલા મોડલ લારા બિંગલ સાથે જોડાયું હતું. 2007માં બંનેએ ડેટિંગ શરૂ કરી હતી. ક્લાર્ક અને બિંગલ 2010માં અલગ થઈ ગયા હતા જ્યારે બિંગલની શાવર પિક્ચર સોશિયલ મીડિયા પર લીક થઈ હતી. 2012માં માઈકલ ક્લાર્કે કાઈલી બોલ્ડી સાથે લગ્ન કર્યા હતા.
કાઈલી બોલ્ડી સિડનીના વેસ્ટફિલ્ડ સ્પોર્ટ્સ હાઈ ખાતે ક્લાર્કની ક્લાસમેટ રહી હતી. કાઈલી અને ક્લાર્કે 2015 માં એક બાળક છોકરાનું એકસાથે સ્વાગત કર્યું. પરંતુ 2020માં બંને વચ્ચે છૂટાછેડા થઈ ગયા. તે પછી ક્લાર્કે ફેશન ડિઝાઇનર પીપ એડવર્ડ્સને ડેટ કરવાનું શરૂ કર્યું, પરંતુ તે પીપ સાથે પણ અલગ થયો હતો.
હાલ પોલીસે શરૂ કરી છે તપાસ
ફૂટેજ સામે આવ્યા બાદ ક્વીન્સલેન્ડ પોલીસ સમગ્ર ઘટનાની તપાસ કરી રહી છે. પોલીસે ગુરુવારે સાંજે કહ્યું, ‘ક્વીન્સલેન્ડ પોલીસ 30 વર્ષની મહિલા અને 41 વર્ષના પુરુષ વચ્ચેની ઘટનાની તપાસ કરી રહી છે. ક્લાર્ક 41 વર્ષનો છે અને તેની ગર્લફ્રેન્ડ જેડ યારબ્રો 30 વર્ષની છે.
તમને જણાવી દઈએ કે માઈકલ ક્લાર્કની કેપ્ટન્સીમાં ઓસ્ટ્રેલિયાએ 2015માં વર્લ્ડ કપનો ખિતાબ જીત્યો હતો. ક્લાર્કે પણ પોતાની ટીમને ટેસ્ટ રેન્કિંગમાં ફરી ટોચના સ્થાને લાવવામાં મહત્વની ભૂમિકા ભજવી હતી. ક્લાર્કે 2011માં રિકી પોન્ટિંગ પાસેથી કેપ્ટનશીપ સંભાળી હતી. ત્યારબાદ વર્ષ 2015માં એશિઝ સિરીઝ બાદ તેણે નિવૃત્તિની જાહેરાત કરી હતી.
