દેશમાં લોકસભાની ચૂંટણી ક્યારે થશે તે સવાલ લોકોમાં ઉઠ્યા છે ત્યારે સૂત્રો જણાવે છે કે ચૂંટણી પંચ આગામી તા.14-15 માર્ચે લોકસભા ચૂંટણીની જાહેરાત કરી શકે છે.
સૂત્રોના જણાવ્યા અનુસાર 2019ની લોકસભા ચૂંટણીની તર્જ પર આ વખતે પણ 7 તબક્કામાં જ ચૂંટણી યોજવામાં આવી શકે છે.
અહેવાલ એવા પણ છે કે એપ્રિલના બીજા સપ્તાહમાં પ્રથમ તબક્કા માટે મતદાન થઈ શકે છે.
સૂત્રોના જણાવ્યા અનુસાર ચૂંટણી પંચ આગામી સપ્તાહે કોઈપણ સમયે લોકસભા ચૂંટણીની તારીખોની જાહેરાત કરી શકે છે.
હાલમાં આયોગ સામાન્ય ચૂંટણીની તૈયારીઓનું મૂલ્યાંકન કરવા માટે વિવિધ રાજ્યોના પ્રવાસ પર છે અને
તમામ રાજ્યોમાં તૈયારીઓનું આકલન કર્યા પછી જ પંચ ચૂંટણીની તારીખો જાહેર કરશે.
સૂત્રોએ જણાવ્યું કે ચૂંટણી પંચની ટીમ હાલમાં પશ્ચિમ બંગાળમાં છે.
આ પછી ટીમ ઉત્તર પ્રદેશ અને પછી જમ્મુ-કાશ્મીરનો પ્રવાસ કરશે.
મળતી માહિતી મુજબ ચૂંટણી અધિકારી 13 માર્ચ સુધીમાં તેમનો પ્રવાસ પૂર્ણ કરશે.
દરમિયાન, ચૂંટણી પંચ તમામ રાજ્યોના મુખ્ય ચૂંટણી અધિકારીઓ સાથે સતત બેઠકો કરી રહ્યું છે.
ચૂંટણી પંચ આગામી લોકસભા ચૂંટણીના મુક્ત અને ન્યાયી સંચાલન માટે આર્ટિફિશિયલ ઈન્ટેલિજન્સ (AI) ટેકનોલોજીનો ઉપયોગ કરી શકે છે. આ માટે, કમિશન એક વિભાગ પણ બનાવી શકે છે, જે સોશિયલ મીડિયા અને ડિજિટલ પ્લેટફોર્મ પર ખોટી માહિતીને ઓળખશે અને દૂર કરશે.
ચૂંટણીને ધ્યાનમાં રાખીને તમામ રાજકીય પક્ષો પણ પોતપોતાની તૈયારીઓમાં વ્યસ્ત છે.
ચૂંટણીની તારીખોની જાહેરાત પહેલા જ અનેક પક્ષોએ પોતાના ઉમેદવારોની જાહેરાત કરી દીધી છે.
શાસક ભાજપે તાજેતરમાં 195 બેઠકો માટે તેના ઉમેદવારોની જાહેરાત કરી છે જ્યારે આમ આદમી પાર્ટી, સમાજવાદી પાર્ટી અને રાષ્ટ્રીય લોકદળે પણ પોતાના ઉમેદવારોની યાદી જાહેર કરી છે.
