બ્રેવરમેન દ્વારા કરવામાં આવેલી “અપમાનજનક” ટિપ્પણીથી ભારત “આઘાત અને નિરાશ”
લંડન:યુકેના ગૃહ સચિવ સુએલા બ્રેવરમેનની વિઝા અંગેની ટિપ્પણીએ ભારત સરકારને નારાજ કર્યા પછી ભારત-યુકે ફ્રી ટ્રેડ એગ્રીમેન્ટ (FTA) કથિત રીતે તૂટી જવાની આરે છે. યુકેના એક મીડિયા રિપોર્ટમાં બુધવારે આ દાવો કરવામાં આવ્યો છે.
ટાઇમ્સ અખબારે સરકારી સૂત્રોને ટાંકીને જણાવ્યું હતું કે બ્રેવરમેન દ્વારા કરવામાં આવેલી “અપમાનજનક” ટિપ્પણીથી ભારત “આઘાત અને નિરાશ” છે. મંત્રીએ FTA હેઠળ ભારતને ઓફર કરવામાં આવી રહેલી “ખુલ્લી સરહદો” પર ચિંતા વ્યક્ત કરી હતી. ભૂતપૂર્વ બ્રિટિશ વડા પ્રધાન બોરિસ જોન્સને આ વર્ષે FTA માટે દિવાળીની સમયમર્યાદા નક્કી કરી હતી. જો કે, આ સમય સુધીમાં સમાધાનની શક્યતા ઓછી છે.
અખબારે એક સ્ત્રોતને ટાંકીને કહ્યું હતું કે, “હજુ પણ ઘણી સદ્ભાવના છે, પરંતુ જો (યુકે) સરકારમાં કેટલાક લોકો હજુ પણ રહેશે તો આ વાતચીત તૂટી શકે છે.” ગયા અઠવાડિયે, ભારતીય મૂળના બ્રેવરમેને એક ઇન્ટરવ્યુમાં કહ્યું હતું કે તેણીને ડર છે કે ભારત સાથે વેપાર સોદો યુકેમાં આવતા ભારતીયોની સંખ્યામાં વધારો કરી શકે છે.
