પૂર્વીય લદ્દાખ: ચીનના J-11 સહિત ઘણા વધુ ફાઇટર એરક્રાફ્ટ વાસ્તવિક નિયંત્રણ રેખાની નજીક ઉડી રહ્યા છે. ભારતીય વાયુસેનાએ પણ ડ્રેગનની ઉશ્કેરણીનો જવાબ આપવા માટે કડક પગલાં લીધા
Chinese Fighter Jet : ચીન (China) તેની હરકતોથી બચી રહ્યું નથી. ચીન અને ભારત વચ્ચે કોર્પ્સ કમાન્ડર સ્તરની વાતચીત બાદ પણ ડ્રેગન ફાઈટર જેટ પૂર્વી લદ્દાખ (Eastern Laddakh )માં તૈનાત ભારતીય સૈન્ય દળોને ઉશ્કેરવાનો પ્રયાસ કરી રહ્યા છે. ચાઈનીઝ ફાઈટર જેટ્સ અનેક પ્રસંગોએ લાઈન ઓફ એક્ચ્યુઅલ કંટ્રોલ (LAC)ની નજીકથી ઉડાન ભરી રહ્યા છે. છેલ્લા ત્રણથી ચાર અઠવાડિયામાં ચાઈનીઝ એરક્રાફ્ટ નિયમિતપણે એલએસીની નજીકથી ઉડાન ભરી રહ્યા છે, જેને આ વિસ્તારમાં ભારતીય સંરક્ષણ તંત્રની તપાસ કરવાના પ્રયાસ તરીકે જોવામાં આવી રહ્યું છે.
ભારતીય વાયુસેનાના જવાનો પણ મોટી જવાબદારી સાથે ચીનની હરકતો પર નજર રાખી રહ્યા છે અને પરિસ્થિતિનો જવાબ આપી રહ્યા છે. ભારતીય વાયુસેના આ ખતરાને પહોંચી વળવાની કોઈ તક છોડી રહી નથી અને સાથે જ મામલાને કોઈપણ રીતે વધવા દેતી નથી.
ડ્રેગનની અવળચંડાઇ વધુ
મીડિયા અહેવાલો અનુસાર, સરકારી સૂત્રોએ જણાવ્યું હતું કે J-11 સહિત ઘણા વધુ ચીની ફાઇટર એરક્રાફ્ટ વાસ્તવિક નિયંત્રણ રેખાની નજીક ઉડી રહ્યા છે. તાજેતરના સમયમાં આ વિસ્તારમાં 10-કિમી કોન્ફિડન્સ બિલ્ડીંગ મેઝર (CBM) લાઇનના ઉલ્લંઘનના કિસ્સા નોંધાયા છે. ANIના અહેવાલ મુજબ ભારતીય વાયુસેનાએ આ ઉશ્કેરણીનો જવાબ આપવા માટે કડક પગલાં લીધા છે. ભારતે મિગ-29 અને મિરાજ 2000 સહિત તેના સૌથી શક્તિશાળી ફાઈટર એરક્રાફ્ટને એડવાન્સ બેઝ પર તૈનાત કર્યા છે, જ્યાંથી તેઓ ચીનની ગતિવિધિઓને સેકન્ડોમાં જવાબ આપી શકે છે.
ભારતીય વાયુસેના તૈયાર
ભારતીય વાયુસેના ચાઈનીઝ એરક્રાફ્ટના ખતરાનો સામનો કરવા માટે તેના ફાઈટર જેટને તૈનાત કરી રહી છે, પરંતુ એવું લાગે છે કે પીપલ્સ લિબરેશન આર્મી લદ્દાખ સેક્ટરમાં ઈન્ડિયન એરફોર્સ ઈન્ફ્રાસ્ટ્રક્ચરના નિર્માણને લઈને તણાવમાં છે. ભારતીય વાયુસેનાના કર્મચારીઓ આ ઈન્ફ્રાસ્ટ્રક્ચરના નિર્માણ દ્વારા તેમના નિયંત્રણ હેઠળના વિસ્તારોમાં ચીનની ગતિવિધિઓ પર નજીકથી નજર રાખી શકે છે.
ભારતીય વાયુસેનાની ચાઈનીઝ ફાઈટર જેટ પર નજર
સૂત્રોના જણાવ્યા અનુસાર, ભારતીય વાયુસેના ચાઈનીઝ હિલચાલનો કેલિબ્રેટેડ રીતે જવાબ આપી રહી છે અને તે વિસ્તારમાં ચાઈનીઝ ફ્લાઈટ પેટર્ન પર પણ નજર રાખી રહી છે જ્યાં તેઓ નીચી અને ઉંચાઈ પર ઉડાન ભરી રહ્યા છે. જણાવી દઈએ કે, એપ્રિલ-મે 2020ની સમયમર્યાદામાં ચીને એકતરફી રીતે LAC પર યથાસ્થિતિ બદલવાનો પ્રયાસ કર્યા પછી ભારત લદ્દાખમાં તેના સૈન્ય માળખાને મજબૂત કરવા માટે ખૂબ જ ઝડપી ગતિએ કામ કરી રહ્યું છે.
ચીનની ઉશ્કેરણી પર ભારત એલર્ટ
ચીની ફાઇટર એરક્રાફ્ટ દ્વારા ઉશ્કેરણી 24-25 જૂનની આસપાસ શરૂ થઈ હતી જ્યારે એક ચીની ફાઇટર જેટ પૂર્વી લદ્દાખમાં ભારતીય સૈનિકોની ખૂબ નજીકથી ઉડાન ભરી હતી. તે પછી, ચુમાર સેક્ટર પાસે એલએસી પર બંને પક્ષો વચ્ચે ઘણા સીબીએમ ઉલ્લંઘન થયા અને ત્યારથી આ ચાલુ છે. આ મહિને 17 જુલાઈના રોજ બંને દેશો વચ્ચે કોર્પ્સ કમાન્ડરની વાટાઘાટો દરમિયાન પણ આ મુદ્દો ચર્ચા માટે ઉઠાવવામાં આવ્યો હતો. એરફોર્સ ચીફ એર ચીફ માર્શલ વીઆર ચૌધરીએ તાજેતરમાં કહ્યું હતું કે અમે અમારી સિસ્ટમને ચીની એરક્રાફ્ટને લઈને હાઈ એલર્ટ પર રાખી છે.
