વ્યાપક આર્થિક સહકાર કરાર (CECA) ને અંતિમ સ્વરૂપ આપવા માટે વાટાઘાટો, સમય પહેલા જ પૂર્ણ કરવાનો વિશ્વાસ
ભારત અને ઓસ્ટ્રેલિયા આ વર્ષના અંત સુધીમાં મુક્ત વ્યાપાર કરારના વ્યાપને વિસ્તારવા માટે વાટાઘાટો પૂર્ણ કરવા માંગે છે. બંને દેશોએ દ્વિપક્ષીય વેપારને $100 બિલિયન સુધી વધારવાનું લક્ષ્ય નક્કી કર્યું છે. આ મુદ્દે બંને દેશોએ શનિવારે પોતાની પ્રતિબદ્ધતાનો પુનરોચ્ચાર કર્યો હતો.
ભારતના વાણિજ્ય પ્રધાન પીયૂષ ગોયલ અને તેમના ઓસ્ટ્રેલિયન સમકક્ષ ડોન ફેરેલ વચ્ચેની વાતચીત દરમિયાન આ મુદ્દા પર ચર્ચા થઈ હતી. ફેરેન ઓસ્ટ્રેલિયાના વડાપ્રધાન એન્થોની અલ્બેનીઝ સાથે ભારતની સત્તાવાર મુલાકાતે છે.
ગયા વર્ષે 29 ડિસેમ્બરે ભારત અને ઓસ્ટ્રેલિયાએ બંને દેશો વચ્ચે આર્થિક સહયોગ અને વેપાર કરાર (ECTA) લાગુ કર્યો હતો. બંને દેશો હાલમાં વ્યાપક આર્થિક સહકાર કરાર (CECA) ને અંતિમ સ્વરૂપ આપવા માટે વાટાઘાટો કરી રહ્યા છે. પત્રકારો સાથે વાત કરતા ગોયલે કહ્યું કે CTA એ ભારત અને ઓસ્ટ્રેલિયા વચ્ચે આર્થિક જોડાણનો પ્રથમ તબક્કો હતો. અમે હવે વાતચીતના બીજા તબક્કામાં પ્રવેશી રહ્યા છીએ. આ રાઉન્ડમાં, અમે વાતચીતને વ્યાપક અવકાશમાં લઈ જઈશું.
આ પહેલા 10 માર્ચે ઈન્ડિયા ઓસ્ટ્રેલિયા સમિટ દરમિયાન ઓસ્ટ્રેલિયાના વડાપ્રધાન અલ્બેનિસે કહ્યું હતું કે બંને દેશો 2023 સુધીમાં CECAને અંતિમ સ્વરૂપ આપવા માંગે છે. આ દરમિયાન, એક સંયુક્ત નિવેદન જારી કરવામાં આવ્યું હતું કે બંને દેશો આગામી ત્રણ મહિનામાં માઇગ્રેશન એન્ડ મોબિલિટી પાર્ટનરશિપ એરેન્જમેન્ટ (MMPA) ને લાગુ કરવા પર કામ કરી રહ્યા છે. આ માટે બંને દેશો (ભારત અને ઓસ્ટ્રેલિયા)ના વડાપ્રધાનોએ પોતપોતાના મંત્રીઓને સૂચના આપી છે.
