સુદર્શન-શમી અને રાશિદનો શાનદાર દેખાવ, દિલ્હી 162/8, ગુજરાત ટાઇટન્સ 163/4
ગુજરાત ટાઇટન્સે દિલ્હી કેપિટલ્સને સતત બીજી વખત હરાવ્યું છે. તેણે ગત સિઝનમાં મેળવેલ વિજયને આગળ વધાર્યો. ગુજરાતે મંગળવારે (4 એપ્રિલ) દિલ્હી સામે છ વિકેટે જીત મેળવી હતી. છેલ્લી વખત 2022માં તેણે પુણેમાં દિલ્હીને 14 રનથી હરાવ્યું હતું. અરુણ જેટલી સ્ટેડિયમમાં હાર્દિક પંડ્યાએ ટોસ જીતીને પ્રથમ બોલિંગ કરવાનો નિર્ણય કર્યો હતો. દિલ્હીએ 20 ઓવરમાં આઠ વિકેટે 162 રન બનાવ્યા હતા. જવાબમાં ગુજરાતે 18.1 ઓવરમાં ચાર વિકેટે 163 રન બનાવીને મેચ જીતી લીધી હતી.
વર્તમાન સિઝનમાં ગુજરાતની આ સતત બીજી જીત છે. તેણે ઉદ્ઘાટન મેચમાં ચાર વખતની ચેમ્પિયન ચેન્નાઈ સુપર કિંગ્સને હરાવ્યું હતું. આ સાથે જ દિલ્હી કેપિટલ્સનો સતત બીજો પરાજય થયો છે. છેલ્લી મેચમાં તેને લખનૌ સુપર જાયન્ટ્સ સામે હારનો સામનો કરવો પડ્યો હતો.
ગુજરાત આગામી રવિવારે (9 એપ્રિલ) અમદાવાદમાં કોલકાતા નાઈટ રાઈડર્સ સામે ટકરાશે. તે જ સમયે, દિલ્હીને શનિવારે (8 એપ્રિલ) ગુવાહાટીમાં રાજસ્થાન રોયલ્સ સામે રમવાનું છે. 20 વર્ષીય બેટ્સમેન સાઈ સુદર્શનની અણનમ અડધી સદીએ ટીમને શાનદાર જીત અપાવી હતી. સુદર્શને 48 બોલમાં અણનમ 62 રન બનાવ્યા હતા. ડેવિડ મિલર 16 બોલમાં 31 રન બનાવીને અણનમ રહ્યો હતો. વિજય શંકરે 23 બોલમાં 29 રન બનાવ્યા હતા. તેને ઈમ્પેક્ટ પ્લેયર તરીકે ડ્રાફ્ટ કરવામાં આવ્યો હતો.
સાહા-ગિલ અને હાર્દિકે બેટિંગમાં રહ્યા ફ્લોપ
રિદ્ધિમાન સાહા અને શુભમન ગીલે 14-14 રન બનાવ્યા હતા. હાર્દિક પંડ્યાએ પાંચ રન બનાવ્યા હતા. દિલ્હી કેપિટલ્સ તરફથી એનરિચ નોર્ટજેએ બે વિકેટ ઝડપી હતી. ખલીલ અહેમદ અને મિશેલ માર્શને એક-એક સફળતા મળી.
અક્ષર પટેલે ટીમને 160થી આગળ પહોંચાડી
સતત આંચકાઓ બાદ દિલ્હી કેપિટલ્સે 162 રન બનાવ્યા હતા. તેના માટે કેપ્ટન ડેવિડ વોર્નરે 32 બોલમાં 37 અને વાઇસ કેપ્ટન અક્ષર પટેલે 22 બોલમાં 36 રન બનાવ્યા હતા. સરફરાઝ ખાન 30 અને અભિષેક પોરેલે 20 રન બનાવીને આઉટ થયા હતા.
શમી અને રાશિદની કિલર બોલિંગ
દિલ્હીના 10માં માત્ર ચાર બેટ્સમેન ડબલ આંકડો પાર કરી શક્યા હતા. ગુજરાત ટાઇટન્સ તરફથી મોહમ્મદ શમી અને રાશિદ ખાને કિલર બોલિંગ કરી હતી. બંનેએ ત્રણ-ત્રણ વિકેટ લીધી હતી. અલઝારી જોસેફને બે સફળતા મળી.
