National Herald Case Congress Protest: ED દ્વારા મની લોન્ડરિંગ કેસમાં કોંગ્રેસ અધ્યક્ષ સોનિયા ગાંધીની બીજી વખત પૂછપરછ
National Herald Case Congress Protest: ED મની લોન્ડરિંગ કેસમાં કોંગ્રેસ અધ્યક્ષ સોનિયા ગાંધીની બીજી વખત પૂછપરછ કરી રહી છે. આ પૂછપરછ લગભગ 3 કલાક ચાલી હતી. બીજી તરફ EDની આ કાર્યવાહી સામે કોંગ્રેસે રોડથી સંસદ સુધી હંગામો મચાવ્યો હતો. જ્યારે કોંગ્રેસના સાંસદોએ ગૃહમાં આ મુદ્દે સરકારને ઘેરી હતી, ત્યારે કોંગ્રેસના નેતાઓ અને કાર્યકરોએ કાર્યવાહીનો વિરોધ કર્યો હતો.
કોંગ્રેસ કાર્યકર્તાઓ અને મહિલા પાંખએ પાર્ટીના રાષ્ટ્રીય કાર્યાલય ખાતે કેન્દ્ર સરકાર સામે વિરોધ પ્રદર્શન કર્યું હતું. તો ત્યાં રાહુલ ગાંધીના નેતૃત્વમાં પાર્ટીના સાંસદોએ સંસદથી વિજય ચોક સુધી કૂચ કરી હતી. આ પછી રાહુલ ગાંધી સાંસદો સાથે વિજય ચોક પર ધરણા પર બેસી ગયા. આ પછી દિલ્હી પોલીસે રાહુલ ગાંધી અને અન્ય ઘણા સાંસદોને કસ્ટડીમાં લીધા હતા.
રાહુલ ગાંધીએ શું કહ્યું?
કસ્ટડીમાં લીધા પહેલા રાહુલ ગાંધીએ કહ્યું કે, કોંગ્રેસના તમામ સાંસદો અહીં બેરોજગારી, મોંઘવારી વિશે વાત કરવા આવ્યા હતા. પરંતુ પોલીસ તેમને અહીં બેસવા દેતી નથી. સંસદની અંદર ચર્ચાની મંજૂરી નથી. અહીં અમારી ધરપકડ કરવામાં આવી રહી છે.
અજય માકને કહ્યું- આ કેસ 2016માં જ બંધ થઈ ગયો હતો
કોંગ્રેસ નેતા અજય માકને કહ્યું કે અમે રાજઘાટ પર સત્યાગ્રહ કરવા માગતા હતા. પરંતુ ભાજપ અમને સત્યાગ્રહ કરવા દેતું નથી. તેમણે નેશનલ હેરાલ્ડ વિશે કહ્યું કે આ કેસ 2016માં પણ પૂરો થઈ ગયો હતો. EDએ તેને બંધ કરી દીધું હતું. પરંતુ સરકારે તેને ફરીથી ખોલી દીધો છે. અજય માકને આરોપ લગાવ્યો કે કોંગ્રેસના નેતાઓને પણ પાર્ટી ઓફિસમાં પ્રવેશવા દેવામાં નથી આવી રહ્યા. સમગ્ર દેશમાં કોંગ્રેસના નેતાઓ અને કાર્યકરો સત્યાગ્રહ કરી રહ્યા છે.
