ડોનાલ્ડ ટ્રમ્પની 2016 ની રાષ્ટ્રપતિની ચૂંટણી પહેલા મોં બંધ રાખવા માટે porn ફિલ્મ અભિનેત્રીને ચૂકવણી કરવાના આરોપ સાથે સંબંધિત ફોજદારી કેસમાં ધરપકડ કરવામાં આવી
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પની મંગળવારે (4 એપ્રિલ) ધરપકડ કરવામાં આવી હતી. ડોનાલ્ડ ટ્રમ્પ ક્રિમિનલ કેસની સુનાવણી માટે મેનહટન કોર્ટ પહોંચ્યા હતા. એડલ્ટ સ્ટાર કેસમાં ન્યૂયોર્ક ગ્રાન્ડ જ્યુરીએ પૂર્વ રાષ્ટ્રપતિ વિરુદ્ધ ફોજદારી કેસને મંજૂરી આપી હતી. ડોનાલ્ડ ટ્રમ્પની 2016 ની રાષ્ટ્રપતિની ચૂંટણી પહેલા મોં બંધ રાખવા માટે પુખ્ત ફિલ્મ અભિનેત્રીને ચૂકવણી કરવાના આરોપ સાથે સંબંધિત ફોજદારી કેસમાં ધરપકડ કરવામાં આવી છે. તેને કોર્ટમાં હાજર કરવા લઈ જવામાં આવ્યો છે.
ટ્રમ્પના આગમન પહેલા ત્યાં કડક સુરક્ષા વ્યવસ્થા કરવામાં આવી હતી. ટ્રમ્પ આઠ કારના કાફલામાં કોર્ટ પહોંચ્યા હતા. ફોજદારી ટ્રાયલનો સામનો કરનાર તેઓ પ્રથમ અમેરિકી રાષ્ટ્રપતિ છે. રિપબ્લિકન પાર્ટી સાથે જોડાયેલા ટ્રમ્પે સોમવારે ફ્લોરિડા છોડતા પહેલા ‘ટ્રુથ સોશિયલ’ પ્લેટફોર્મ પર લખ્યું કે તેમને સતત હેરાન કરવામાં આવી રહ્યા છે. ટ્રમ્પે સ્ટોર્મી ડેનિયલ્સને પૈસા આપવાના સંબંધમાં કોઈપણ પ્રકારની ગેરરીતિનો ઈન્કાર કર્યો છે. જ્યારે ટ્રમ્પ રાષ્ટ્રપતિ હતા ત્યારે મેનહટન ડિસ્ટ્રિક્ટ એટર્ની ઓફિસ દ્વારા આ મામલે તપાસ શરૂ કરવામાં આવી હતી.
ડોનાલ્ડ ટ્રમ્પે આ આરોપોને નકારી કાઢ્યા
આ કેસ રાષ્ટ્રપ્રમુખની ચૂંટણીના દિવસો પહેલા ઓક્ટોબર 2016ના અંતમાં તેના તત્કાલિન અંગત વકીલ માઈકલ કોહેન વતી ડેનિયલ્સને કરવામાં આવેલી US$130,000 ચૂકવણી સાથે સંબંધિત છે. આ પૈસા કથિત રીતે ડેનિયલ્સને એટલા માટે આપવામાં આવ્યા હતા કે તે એક દાયકા પહેલા ટ્રમ્પ સાથેના તેના કથિત સંબંધો વિશે કોઈ ખુલાસો ન કરે. ટ્રમ્પ આ આરોપને નકારી રહ્યા છે.
સુનાવણી પહેલા સમર્થકોને ઇમેઇલ મોકલ્યો
ડોનાલ્ડ ટ્રમ્પે કોર્ટમાં તેમની હાજરીના થોડા કલાકો પહેલા તેમના સમર્થકોને એક ઈમેલ મોકલ્યો હતો. જેમાં તેણે દાવો કર્યો હતો કે તેની ધરપકડ પહેલાનો આ છેલ્લો ઈમેલ હતો. જેમાં તેમણે કહ્યું કે અમેરિકા ‘માર્ક્સવાદી થર્ડ વર્લ્ડ’નો દેશ બની રહ્યો છે. ટ્રમ્પે લખ્યું કે આજે અમે અમેરિકામાં ન્યાય ગુમાવવાનો શોક મનાવી રહ્યા છીએ. આજનો દિવસ એવો છે જ્યારે સત્તાધારી રાજકીય પક્ષ તેના મુખ્ય હરીફની ધરપકડ કરે છે પછી ભલે તેણે કોઈ ગુનો ન કર્યો હોય.
તેણે પોતાના ઈ-મેલમાં કહ્યું કે હું તમારા સમર્થન માટે તમારો આભાર માનું છું. અમને મળેલા તમામ દાન, સમર્થન અને પ્રાર્થનાઓથી હું અભિભૂત છું. મારા માટે નહીં – પણ આપણા દેશ માટે શું થઈ રહ્યું છે તે જોઈને દુઃખ થાય છે.
