બોલ ટેમ્પરિંગમાં દોષિત ઠર્યા બાદ ડેવિડ વોર્નર પર કેપ્ટનશિપ માટે આજીવન પ્રતિબંધ હતો. હવે ક્રિકેટ ઓસ્ટ્રેલિયાએ તેની આચારસંહિતા બદલી
ક્રિકેટ ઓસ્ટ્રેલિયાના એક પગલાથી ડેવિડ વોર્નરને મોટી રાહત મળી છે. હકીકતમાં, ક્રિકેટ ઓસ્ટ્રેલિયાએ સોમવારે ખેલાડીઓ અને સપોર્ટ સ્ટાફ સાથે સંબંધિત તેની આચાર સંહિતામાં સુધારો કર્યો હતો, જેના પછી આ ઓપનર રાષ્ટ્રીય ટીમની કેપ્ટનશીપ પરના આજીવન પ્રતિબંધમાં ‘સુધારો’ કરી શકે છે. ક્રિકેટ ઓસ્ટ્રેલિયાના નવા સંશોધિત આચાર સંહિતા અનુસાર હવે ખેલાડીઓ અને સપોર્ટ સ્ટાફ લાંબી સજાના સુધારા માટે અરજી કરી શકે છે. તમને જણાવી દઈએ કે ડેવિડ વોર્નર પર 2018માં દક્ષિણ આફ્રિકામાં બોલ ટેમ્પરિંગ કેસમાં ભૂમિકા બદલ રાષ્ટ્રીય ટીમની કેપ્ટનશીપ પરથી આજીવન પ્રતિબંધ લગાવવામાં આવ્યો હતો. આ કેસ સેન્ડપેપર ગેટ તરીકે ઓળખાય છે.
આક્રમક ડાબોડી બેટ્સમેન, જોકે, હવે તેના પ્રતિબંધની સમીક્ષા કરી શકે છે કારણ કે CA બોર્ડે આચારસંહિતાની સમીક્ષા કરવાની મંજૂરી આપી છે. CAના નિવેદન અનુસાર, ‘ક્રિકેટ ઓસ્ટ્રેલિયા (CA) એ તેના ઈન્ટિગ્રિટી ચીફ (જેકી પાર્ટ્રીજ)ની સમીક્ષા બાદ ખેલાડીઓ અને ખેલાડીઓના સપોર્ટ સ્ટાફ સાથે સંબંધિત આચારસંહિતામાં ફેરફાર કર્યા છે. CA બોર્ડે ઓક્ટોબરમાં બોર્ડની બેઠકમાં આચારસંહિતાની સમીક્ષા કરવા વિનંતી કરી હતી. આ સમીક્ષાની ભલામણોને સ્વીકારવામાં આવી છે અને ત્યારબાદ તેને ઔપચારિક પરવાનગી આપવામાં આવી છે. નિવેદનમાં કહેવામાં આવ્યું છે કે, ‘ફેરફારો હેઠળ, ખેલાડીઓ અને સપોર્ટ સ્ટાફ હવે લાંબા ગાળાના પ્રતિબંધમાં ફેરફાર કરવા માટે અરજી કરી શકે છે.
શું છે સુધારેલી આચારસંહિતામાં?
ક્રિકેટ ઓસ્ટ્રેલિયાની સંશોધિત આચાર સંહિતા અનુસાર, કોઈપણ ખેલાડીની અરજી પર ત્રણ સભ્યોની સમીક્ષા પેનલ દ્વારા વિચારણા કરવામાં આવશે. આમાં સ્વતંત્ર આચાર સંહિતા કમિશનરનો સમાવેશ થાય છે, જેમણે સંતુષ્ટ હોવું જોઈએ કે સજામાં ફેરફાર કરવા માટે અસાધારણ સંજોગો અસ્તિત્વમાં છે. નવી ભલામણો અનુસાર, જો દોષિત ખેલાડી પસ્તાવો અને સારું વર્તન બતાવે તો આજીવન પ્રતિબંધની સમીક્ષા કરી શકાય છે.
