મુફ્રિહાત વિસ્તારમાં ડીઝલ ટેન્કર સાથે બસની જોરદાર ટક્કર; મૃતકોમાં મોટા ભાગના ઉમરા યાત્રીઓ હૈદરાબાદના હોવાનું અનુમાન; MEA અને તેલંગાણા સરકાર સંપર્કમાં
સાઉદી અરેબિયાના મુફ્રિહાત વિસ્તારમાં મક્કાથી મદીના જતી એક બસ ડીઝલ ટેન્કર સાથે અથડાતા એક મોટો માર્ગ અકસ્માત થયો છે, જેમાં ઓછામાં ઓછા 42 ભારતીય ઉમરા યાત્રીઓના મૃત્યુની આશંકા છે. સોમવારે વહેલી સવારે થયેલા આ ભયાનક અકસ્માતમાં મૃત્યુ પામેલા ઘણા યાત્રીઓ ભારતના તેલંગાણા રાજ્યના હૈદરાબાદના હોવાનું જાણવા મળ્યું છે. ટક્કર એટલી જોરદાર હતી કે ઘટનાસ્થળે જ અનેક લોકોના મોત થયા અને અન્ય કેટલાક ઘાયલ થયા છે.
તત્કાલ રાહત અને તેલંગાણા સરકારની કાર્યવાહી
પ્રાથમિક અહેવાલો મુજબ, આ ભીષણ ટક્કર બાદ ઘટનાસ્થળે અફરાતફરી મચી ગઈ હતી. સ્થાનિક વહીવટીતંત્ર અને કટોકટી ટીમો તરત જ સ્થળ પર પહોંચી અને રાહત તથા બચાવ કાર્ય શરૂ કર્યું હતું. તેલંગાણાના મુખ્યમંત્રી એ. રેવંત રેડ્ડીએ આ ઘટનાની તાત્કાલિક નોંધ લઈને મુખ્ય સચિવ કે. રામકૃષ્ણા રાવ અને ડીજીપી બી. શિવાધર રેડ્ડીને તત્કાળ સંપૂર્ણ માહિતી એકઠી કરવા નિર્દેશ આપ્યા છે. રાજ્ય સરકાર વિદેશ મંત્રાલય (MEA) અને સાઉદી દૂતાવાસ સાથે મળીને અસરગ્રસ્ત પરિવારોને મદદ પૂરી પાડવાના પ્રયાસો કરી રહી છે.
સહાય માટે કંટ્રોલ રૂમ અને ટોલ-ફ્રી નંબર જારી
પીડિતોના પરિવારોને માહિતી પૂરી પાડવા માટે, તેલંગાણા સચિવાલયમાં એક કંટ્રોલ રૂમ સ્થાપિત કરવામાં આવ્યો છે અને હેલ્પલાઇન નંબર (7997959754 અને 99129 19545) જાહેર કરવામાં આવ્યા છે. આ ગમખ્વાર અકસ્માતને ધ્યાનમાં રાખીને, જેદ્દાહ સ્થિત ભારતીય વાણિજ્ય દૂતાવાસે પણ 24×7 કંટ્રોલ રૂમ સ્થાપિત કર્યો છે અને ટોલ-ફ્રી નંબર (8002440003) જારી કર્યો છે. વહીવટીતંત્ર મૃતકો અને ઘાયલો વિશે વધુ વિગતવાર માહિતી એકઠી કરી રહ્યું છે.
વિદેશ મંત્રી એસ. જયશંકરે દુઃખ વ્યક્ત કર્યું
ભારતના વિદેશ મંત્રી એસ. જયશંકરે પણ આ માર્ગ અકસ્માત પર ઊંડું દુઃખ વ્યક્ત કર્યું છે. તેમણે કહ્યું કે રિયાદ સ્થિત ભારતીય દૂતાવાસ અને જેદ્દાહનું વાણિજ્ય દૂતાવાસ અસરગ્રસ્ત ભારતીયો અને તેમના પરિવારોને સંપૂર્ણ મદદ પૂરી પાડી રહ્યા છે. તેમણે ટ્વીટ દ્વારા પીડિત પરિવારો પ્રત્યે સંવેદના વ્યક્ત કરી હતી અને ઘાયલો ઝડપથી સ્વસ્થ થાય તેવી કામના કરી હતી.
