વિશાખાપટ્ટનમમાં રમાયેલી શ્રેણીની બીજી વનડેમાં ઓસ્ટ્રેલિયન ટીમે 10 વિકેટથી મેચ જીતીને શ્રેણી 1-1થી બરાબર કરી લીધી હતી.
ઓસ્ટ્રેલિયન ટીમે ભારત સામેની 3 મેચની ODI શ્રેણીની પ્રથમ મેચમાં 5 વિકેટથી હાર્યા બાદ બીજી ODIમાં શાનદાર વાપસી કરી હતી અને એકતરફી 10 વિકેટથી જીત મેળવી હતી. વિશાખાપટ્ટનમમાં રમાયેલી શ્રેણીની બીજી મેચમાં ભારતીય ટીમનો દાવ માત્ર 117 રનમાં સમેટાઈ ગયો હતો, જેમાં મિચેલ સ્ટાર્કે 5 વિકેટ ઝડપી હતી. આ પછી ટ્રેવિસ હેડ અને મિશેલ માર્શની જોડીએ આ લક્ષ્ય માત્ર 11 ઓવરમાં હાંસલ કરીને ટીમને જીત અપાવી હતી.
118 રનના ટાર્ગેટનો પીછો કરવા ઉતરેલી ઓસ્ટ્રેલિયન ટીમના ઓપનિંગ બેટ્સમેનોએ પહેલા જ ઓવરથી જ આક્રમક રીતે રન બનાવવાનું શરૂ કરી દીધું હતું. આ પછી, તેને રોકવો ભારતીય બોલરો માટે સંપૂર્ણપણે અશક્ય લાગતું હતું. ટ્રેવિસ હેડે 30 બોલમાં 51 રનની શાનદાર ઇનિંગ રમી તો મિચેલ માર્શના બેટમાં 36 બોલમાં 66 રનની ઇનિંગ જોવા મળી હતી. બંનેએ માત્ર 9 ઓવરમાં જ ટીમનો સ્કોર 100 રન સુધી પહોંચાડી દીધો હતો.
મેચની શરૂઆતમાં ઓસ્ટ્રેલિયન કેપ્ટન સ્ટીવ સ્મિથે ટોસ જીતીને પ્રથમ બોલિંગ કરવાનો નિર્ણય કર્યો હતો, જે મિચેલ સ્ટાર્કે સંપૂર્ણ રીતે સાચો સાબિત કર્યો હતો. ટીમ ઈન્ડિયાને ઇનિંગ્સની પ્રથમ ઓવરમાં જ શુભમન ગિલના રૂપમાં આંચકો લાગ્યો હતો, જે ખાતું ખોલાવ્યા વિના જ પેવેલિયન પરત ફર્યા હતા.
ભારતીય ટીમના 4 બેટ્સમેન ખાતું પણ ખોલાવી શક્યા
જો આ મેચમાં ભારતીય ટીમનું પ્રદર્શન જોવામાં આવે તો તે ખૂબ જ ખરાબ રહ્યું હતું, જેમાં ટીમના 4 ખેલાડી પોતાનું ખાતું પણ ખોલી શક્યા નહોતા, આ સિવાય માત્ર 4 બેટ્સમેન ડબલ ફિગરને સ્પર્શી શક્યા હતા. ભારતીય ટીમ માટે વિરાટ કોહલીએ સૌથી વધુ 31 રનની ઇનિંગ રમી હતી.
કાંગારૂ ટીમ માટે બોલિંગમાં મિચેલ સ્ટાર્કે 8 ઓવરમાં 53 રન આપીને અડધી ભારતીય ટીમને પેવેલિયનમાં મોકલવાનું કામ કર્યું હતું. આ સિવાય સીન એબોટે 3 જ્યારે નાથન એલિસે 2 વિકેટ ઝડપી હતી. હવે બંને ટીમો વચ્ચે શ્રેણીની છેલ્લી અને નિર્ણાયક મેચ 22 માર્ચે ચેન્નાઈના એમએ ચિદમ્બરમ સ્ટેડિયમમાં રમાશે.
