અમેરિકન સાંસદોએ ચીનની એપ TikTokને અમેરિકામાં પ્રતિબંધિત કરવાના પક્ષમાં મતદાન કર્યું હતું. મોટાભાગના સાંસદોએ TikTok પર પ્રતિબંધ મૂકવા માટે ભારતનું ઉદાહરણ આપ્યું અને કહ્યું કે ભારતે તેની રાષ્ટ્રીય સુરક્ષાને ધ્યાનમાં રાખીને TikTok પર પ્રતિબંધ મૂકવાનો નિર્ણય લીધો હતો તેજ રીતે અમેરિકામાં પણ થવું જોઈએ.
બુધવારે, યુએસ કોંગ્રેસના નીચલા ગૃહ, હાઉસ ઓફ રિપ્રેઝન્ટેટિવ્સમાં ‘પ્રોટેક્ટીંગ અમેરિકન્સ ફ્રોમ ફોરેન એડવાઇઝરી કંટ્રોલ્ડ એપ્લિકેશન એક્ટ’ નામના બિલ પર મતદાન થયું હતું.
આ બિલ અમેરિકામાં TikTok વગેરે જેવી વિદેશી એપને પ્રતિબંધિત કરે છે.
મહત્વનુ છે કે ભારત સરકારે વર્ષ 2020માં TikTok પર પ્રતિબંધ મૂક્યો હતો જે બાદ હવે અમેરિકન સાંસદોએ પણ ભારતનું ઉદાહરણ ટાંકીને બિલની તરફેણમાં એટલે કે ટિકટોક ઉપર પ્રતિબંધ લાવવાના તરફેણમાં મતદાન કર્યું છે.
અમેરિકન સાંસદોએ કહ્યું કે TikTokમાં પારદર્શિતાનો અભાવ છે અને તેના એક્ઝિક્યુટિવ યુઝર્સની ગોપનીયતાનું રક્ષણ કરવા પણ તૈયાર નથી. આ જ કારણ છે કે યુરોપિયન યુનિયન અને કેનેડામાં પણ આ એપના ઉપયોગ પર પ્રતિબંધ મૂકવામાં આવ્યો છે. યુએસ કોંગ્રેસમેન ગ્રેગ મર્ફીએ કહ્યું કે ચીન દ્વારા ટિકટોકનો ઉપયોગ અમેરિકન નાગરિકોની વિચારસરણી પર દેખરેખ રાખવા અને પ્રભાવિત કરવાના હેતુથી કરવામાં આવી રહ્યો છે. મર્ફીએ કહ્યું કે આ એપ યુઝરનો સંવેદનશીલ ડેટા કલેક્ટ કરે છે અને પછી તે ડેટા શાસક કોમ્યુનિસ્ટ પાર્ટી ઓફ ચાઈનાની અને તેની ઈન્ટેલિજન્સ શાખા સાથે શેર કરે છે. તેનાથી દેશની સુરક્ષા સામે ખતરો છે.
યુએસ કોંગ્રેસના નીચલા ગૃહમાં આ બિલની તરફેણમાં 352 વોટ પડ્યા જ્યારે આ બિલની વિરુદ્ધમાં 65 વોટ પડ્યા. હવે આ બિલ અમેરિકાના ઉપલા ગૃહ સેનેટમાં જશે, જ્યાં ચર્ચા બાદ તેના પર વોટિંગ થશે અને સેનેટ દ્વારા પાસ થયા બાદ અને રાષ્ટ્રપતિ દ્વારા હસ્તાક્ષર થયા બાદ આ બિલ કાયદો બની જશે. આ બિલ ભારતીય મૂળના અમેરિકન સાંસદ રાજા કૃષ્ણમૂર્તિ અને અન્ય સાંસદ માઈક ગલાગ દ્વારા રજૂ કરવામાં આવ્યું છે. બિલમાં માંગ કરવામાં આવી છે કે TikTok ચીનની કોમ્યુનિસ્ટ પાર્ટી સાથેના સંબંધો તોડી નાખે અને અમેરિકામાં જ ડેટા સાચવે, જેથી લાખો અમેરિકન નાગરિકો, ખાસ કરીને બાળકોનો ડેટા સુરક્ષિત રહી શકે.
