21 વર્ષમાં પહેલીવાર કોઈ પીએમ ફરીથી ચૂંટાયા, લેબરે 89 બેઠક જીતીને ફરીથી એકલે હાથે સરકાર બનાવશે, લિબરલ-નેશનલ ગઠબંધનને 40 સીટે જ મળી, ગ્રીન શુન્ય બેઠક અટક્યું, ઇન્ડીપેન્ડેન્ટ 8 તથા અધર્સને 2 બેઠક
PM મોદીએ એન્થની અલ્બેનીસને અભિનંદન પાઠવ્યા, કહ્યું નેતૃત્વમાં જનતાનો અતુટ વિશ્વાસ જીત્યો
ફેડરલ ચૂંટણીમાં લેબરે ઐતિહાસિક જીત નોંધાવી છે. એન્થોની અલ્બેનીઝની આગેવાની હેઠળની સરકારને જંગી બહુમતી મળી છે, જ્યારે કોલિશન અને પીટર ડટન માટે આ રાત કારમી હાર લઈને આવી છે.
પશ્ચિમ ઓસ્ટ્રેલિયામાં અંતિમ મતદાન મથકો બંધ થયાના અડધા કલાકથી પણ ઓછા સમયમાં, ઓસ્ટ્રેલિયન ચેનલોએ આગાહી કરી હતી કે લેબરે ચૂંટણી જીતી લીધી છે. થોડા સમય પછી, એ સ્પષ્ટ થઈ ગયું હતું કે પીટર ડટન ઓસ્ટ્રેલિયન ઈતિહાસમાં પોતાની બેઠક ગુમાવનારા પ્રથમ ફેડરલ વિપક્ષી નેતા બન્યા છે.
ડટનનું કારમી હાર સાથે રાજકીય ભવિષ્ય અંધકારમાં, ચૂંટણીમાં પોતે જ હારી જનારા પ્રથમ વિપક્ષી નેતા
લેબરનો આ વિજય ફેડરલ ચૂંટણીમાં અત્યાર સુધીનો સૌથી મોટો વિજય છે, જેણે 1987માં બોબ હોકની 86 બેઠકો અને 2007માં કેવિન રુડની 83 બેઠકોના રેકોર્ડને પણ વટાવી દીધો છે. પીટર ડટનની કારમી હાર સાથે તેમનું રાજકીય ભવિષ્ય પણ અંધકારમાં ધકેલાઈ ગયું છે. લેબરની આ ઐતિહાસિક જીત ઓસ્ટ્રેલિયન રાજકારણમાં એક નવો યુગ શરૂ કરશે.
21 વર્ષમાં પહેલીવાર કોઈ પીએમ ફરીથી ચૂંટાયા
ઓસ્ટ્રેલિયાના રાજકારણના 21 વર્ષમાં આ પહેલી વાર છે જ્યારે કોઈ વર્તમાન વડા પ્રધાનને સતત ફરીથી સત્તામાં આવવાની તક મળી છે. આ જીતને ઓસ્ટ્રેલિયાની વિદેશ નીતિમાં, ખાસ કરીને ઈન્ડો-પેસિફિકમાં, સાતત્ય માટેના આદેશ તરીકે જોવામાં આવી રહી છે, જેમાં ભારતે આ અંગે મજબૂત વલણ અપનાવ્યું છે.
PM મોદીએ અલ્બેનીસને અભિનંદન પાઠવ્યા
પ્રધાનમંત્રી નરેન્દ્ર મોદીએ શનિવારે ઓસ્ટ્રેલિયાના પ્રધાનમંત્રી એન્થોની અલ્બેનીસને તેમની ઐતિહાસિક જીત બદલ અભિનંદન પાઠવ્યા. પીએમએ કહ્યું કે તેમની ફરીથી ચૂંટણી ઓસ્ટ્રેલિયન લોકોના તેમના નેતૃત્વમાં “સ્થાયી વિશ્વાસ” દર્શાવે છે. ઉચ્ચ દાવવાળી રાષ્ટ્રીય ચૂંટણી પછી અલ્બેનીઝે પોતાની જીતની જાહેરાત કરી, જેના પગલે પીએમ મોદીએ તેમને અભિનંદન આપ્યા.
પીએમ મોદીએ પોતાની પોસ્ટમાં અલ્બેનીસને ટેગ કરીને કહ્યું, “ઓસ્ટ્રેલિયાના વડા પ્રધાન તરીકે તમારી જબરદસ્ત જીત અને ફરીથી ચૂંટાઈ આવવા બદલ એન્થોની અલ્બેનીઝ (@AlboMP) ને અભિનંદન! આ જીત તમારા નેતૃત્વમાં ઓસ્ટ્રેલિયન લોકોના કાયમી વિશ્વાસને પ્રતિબિંબિત કરે છે.”
પીએમ મોદીએ પ્રાદેશિક સહયોગ વધારવા પર ભાર મૂક્યો
પ્રધાનમંત્રી મોદીએ બે ઈન્ડો-પેસિફિક લોકશાહીઓ વચ્ચે વધતી ભાગીદારી પર પણ પ્રકાશ પાડ્યો અને પ્રાદેશિક સહયોગને પ્રોત્સાહન આપવા માટે અલ્બેનીઝ સરકાર સાથે કામ કરવાની પ્રતિબદ્ધતા વ્યક્ત કરી. તેમણે કહ્યું, “હું ભારત-ઓસ્ટ્રેલિયા વ્યૂહાત્મક ભાગીદારીને વધુ ગાઢ બનાવવા અને ઈન્ડો-પેસિફિકમાં શાંતિ, સ્થિરતા અને સમૃદ્ધિ માટે સહિયારી વ્યૂહરચનાઓ આગળ વધારવા માટે સાથે મળીને કામ કરવા આતુર છું.”
માર્ચ 2023 માં અલ્બેનીઝ ભારત આવ્યા હતા
માર્ચ 2023 માં અલ્બેનીઝે ભારતની મુલાકાત લીધી હતી, જ્યાં તેઓ અને પીએમ મોદી વ્યૂહાત્મક ભાગીદારી હેઠળ સહયોગ વધારવા સંમત થયા હતા. ઓસ્ટ્રેલિયામાં મોટી સંખ્યામાં ભારતીય સમુદાય રહે છે, અને બંને નેતાઓએ નિયમિતપણે લોકો વચ્ચેના સંબંધોને દ્વિપક્ષીય સંબંધોના મુખ્ય સ્તંભ તરીકે પ્રકાશિત કર્યા છે.
